آبنائے ہرمز میں بحری جہاز پر حملے کی نئی اطلاع، تیل کی ترسیل کو خطرات بڑھ گئے

آبنائے ہرمز میں اتوار کو ایک بحری جہاز پر حملے کی نئی اطلاع سامنے آئی ہے، جس سے ایران سے متعلق توانائی کی ترسیل کو لاحق خطرات میں مزید اضافہ ہوگیا ہے۔ برطانوی بحریہ سے وابستہ ادارے یو کے ایم ٹی او کے مطابق آبنائے ہرمز سے گزرنے والے ایک بحری جہاز کو ایک پروجیکٹائل نے نشانہ بنایا، تاہم جہاز کو پہنچنے والے نقصان اور عملے کی صورتحال کے بارے میں فوری طور پر معلومات دستیاب نہیں تھیں۔

یہ اطلاع سعودی عرب کی جانب سے مشرقی مغربی تیل پائپ لائن کو عارضی طور پر بند کیے جانے کے ایک روز بعد سامنے آئی۔ سعودی حکام کے مطابق عراق سے آنے والے ڈرون حملے کے بعد احتیاطی اقدام کے طور پر پائپ لائن بند کی گئی، جبکہ بغداد اور ریاض دونوں نے حملے کا ماخذ عراق کو قرار دیا ہے، جہاں ایران نواز ملیشیا سرگرم ہیں۔

خطے میں جاری حملوں کے باعث عالمی توانائی کی قیمتوں میں مزید اضافہ ہوسکتا ہے۔ گزشتہ ہفتے برینٹ خام تیل کی قیمت دوبارہ 100 ڈالر فی بیرل سے تجاوز کر گئی۔ سعودی عرب کی 1200 کلومیٹر طویل مشرقی مغربی پائپ لائن گزشتہ چھ ماہ سے عالمی منڈیوں تک مشرق وسطیٰ کے تیل کی ترسیل کا اہم راستہ رہی ہے، کیونکہ جنگ کے باعث آبنائے ہرمز بڑی حد تک بند ہے۔ پائپ لائن کے ذریعے روزانہ 4 سے 5 ملین بیرل تیل منتقل کیا جارہا تھا، جو عالمی رسد کا تقریباً 4 سے 5 فیصد بنتا ہے۔

پائپ لائن پر حملے کی فوری طور پر کسی نے ذمہ داری قبول نہیں کی۔ سیٹلائٹ تصاویر میں مدینہ کے جنوب میں پائپ لائن کے ایک مقام سے سیاہ دھواں اٹھتا دکھائی دیا۔ سعودی وزارت خارجہ کے مطابق حملے میں کچھ افراد زخمی ہوئے اور نقصان کا جائزہ لیا جارہا ہے۔

ادھر سعودی ولی عہد محمد بن سلمان نے امریکی صدر ڈونلڈ ٹرمپ سے حوثیوں کے خلاف فوجی مدد طلب کی ہے۔ ذرائع کے مطابق امریکا نے براہ راست مداخلت سے گریز کرتے ہوئے فی الحال انٹیلی جنس تعاون کی پیشکش کی ہے۔

ایرانی حکام نے عمان میں ہونے والے اجلاس سے کسی بڑی پیش رفت کی توقعات بھی کم کردی ہیں۔ ایران اور خلیجی ممالک کے اجلاس میں پیر کو آبنائے ہرمز کی صورتحال پر بات ہوگی، تاہم ایک ایرانی عہدیدار کے مطابق اجلاس میں کسی باقاعدہ معاہدے پر دستخط کا امکان نہیں۔ ایران نے آبنائے ہرمز پر اپنے کنٹرول کو تسلیم کرنے اور جہازوں سے فیس وصول کرنے کا مطالبہ کیا ہے، جسے امریکا مسترد کرتا ہے۔