آج نیوز کے مطابق منصوبے کے حفاظتی پشتے میں شگاف پڑنے سے بڑی مقدار میں پانی سرنگ میں داخل ہوا۔

ہری پور کے ڈپٹی کمشنر وسیم احمد نے ریسکیو اور انتظامی ٹیموں کے ہمراہ جائے وقوعہ کا دورہ کیا اور سرنگ میں پانی داخل ہونے کی تصدیق کی۔ پانی کے تیز بہاؤ میں ایک پاکستانی کارکن بہہ گیا، تاہم ریسکیو ٹیموں نے اسے بچا لیا۔ واقعے میں کسی جانی نقصان کی اطلاع نہیں ملی۔

واپڈا نے سرنگ منہدم ہونے کی خبروں کی تردید کرتے ہوئے کہا کہ رابطہ سرنگ کی کھدائی کے دوران چٹان کا کمزور حصہ گرنے سے پانی سرنگ اور پاور ہاؤس کے علاقے میں داخل ہوا۔

واپڈا کے مطابق انٹیک پٹ سے پانی مکمل طور پر نکال دیا گیا ہے، جبکہ زیر تعمیر پاور ہاؤس سے پانی نکالنے کا عمل جاری ہے۔ تعمیراتی مقامات میں مزید پانی داخل نہیں ہو رہا ہے۔

ادارے کا کہنا ہے کہ مرکزی سرنگ، پاور ہاؤس، ٹیل ریس کلورٹ اور سوئچ یارڈ کو نقصان نہیں پہنچا۔ واپڈا کے اعلیٰ حکام، منصوبے کے مشیر اور ٹھیکیدار جائے وقوعہ پر حفاظتی اقدامات اور آئندہ لائحہ عمل کا جائزہ لے رہے ہیں۔

واقعے کی وجوہات جاننے کے لیے تحقیقات شروع کر دی گئی ہیں۔ اعلیٰ سطح کی کمیٹی اس بات کا تعین کرے گی کہ حادثہ ساختی کمزوری یا تکنیکی خرابی کے باعث پیش آیا۔ تحقیقات کی روشنی میں تعمیراتی کام دوبارہ شروع کیا جائے گا۔

ٹی 5 منصوبے سے 510 میگاواٹ کے تین یونٹس کے ذریعے مجموعی طور پر 1,530 میگاواٹ بجلی قومی نظام میں شامل ہوگی، جس سے تربیلا ڈیم کی پیداواری صلاحیت 4,888 میگاواٹ سے بڑھ کر 6,418 میگاواٹ ہو جائے گی۔ منصوبے سے سالانہ اوسطاً ایک ارب 34 کروڑ 70 لاکھ یونٹ بجلی پیدا ہونے کی توقع ہے۔

منصوبے کی منظور شدہ لاگت 807 ملین ڈالر ہے، جس میں عالمی بینک 390 ملین ڈالر اور ایشیائی انفرااسٹرکچر انویسٹمنٹ بینک 300 ملین ڈالر فراہم کر رہے ہیں۔ واپڈا نے مئی 2021 میں سول ورکس کا 354.6 ملین ڈالر کا ٹھیکہ چین کی پاور کنسٹرکشن کارپوریشن کو دیا تھا۔

منصوبہ پہلے ہی تاخیر کا شکار ہے اور اس کی تکمیل کی آخری تاریخ ستمبر 2027 مقرر کی گئی ہے۔ 2024 میں سرنگ بند کرنے کے لیے انڈس ریور سسٹم اتھارٹی (ارسا) سے این او سی کے حصول میں مشکلات پیش آئی تھیں، جبکہ اگست 2025 میں بھی تعمیراتی کام کچھ عرصے کے لیے روک دیا گیا تھا۔

دونوں ممالک کی حکومتوں کے اشتراک سے قائم سعودی پاک مشترکہ بزنس کونسل کے مطابق فنڈ کا ابتدائی حجم کئی سو ملین ڈالر ہے، جس میں مختلف شعبوں میں سرمایہ کاری کے مواقع کے مطابق مزید اضافہ متوقع ہے۔

کونسل کے جاری کردہ بیان کے مطابق فنڈ کا 75 فیصد حصہ پاکستان میں جبکہ باقی 25 فیصد سعودی عرب کے منصوبوں میں سرمایہ کاری کے لیے مختص کیا جائے گا۔

یہ پیش رفت ایسے وقت میں سامنے آئی ہے جب اسلام آباد اور ریاض اپنے دیرینہ تعلقات، بالخصوص دفاعی شعبے میں تعاون کو مزید مضبوط بنا رہے ہیں، جبکہ کئی ماہ سے جاری امریکا ایران تنازع کے خاتمے کے لیے تاحال کوئی بڑی سفارتی پیش رفت دکھائی نہیں دے رہی۔

28 فروری سے جاری جنگ آٹھ ماہ سے زائد گزرنے کے باوجود کسی فیصلہ کن نتیجے پر نہیں پہنچی۔ ایران نے جنگ بندی کے لیے امریکی بحری ناکہ بندی ختم کرنے، پابندیاں نرم کرنے اور بمباری روکنے کا مطالبہ کیا ہے، جبکہ بدلے میں آبنائے ہرمز کی ناکہ بندی ختم کرنے کی پیشکش کی ہے۔

امریکی وزیر خارجہ مارکو روبیو نے ایرانی شرائط کو ناقابلِ قبول قرار دیا لیکن تہران نے اپنی تجویز کا دفاع کرتے ہوئے مذاکرات کی بحالی کی مدت سات روز سے کم کرکے دو روز کرنے کی پیشکش کی ہے۔

ادھر خلیج میں بحری جہازوں پر حملے جاری ہیں اور امریکی حملوں میں ایران کا جزیرہ قشم بھی نشانہ بنایا گیا ہے۔

ایرانی وزارت خارجہ کے ترجمان اسماعیل بقائی نے ہفتہ وار پریس کانفرنس میں کہا کہ کیا یہ مطالبہ غیر معقول ہے کہ مذاکرات شروع ہونے سے پہلے امریکا اپنی غیر قانونی پابندیاں اور بحری ناکہ بندی ختم کرے اور تمام محاذوں پر جنگ کا خاتمہ کیا جائے؟

ایران نے مذاکرات کی بحالی کے لیے پہلے سات روز کی مہلت دینے کی تجویز پیش کی تھی، تاہم اب اس مدت کو کم کرکے دو روز کرنے کی پیشکش کی ہے۔ اس تجویز کے تحت امریکا کو پہلے جنگی کارروائیاں روکنے، بحری ناکہ بندی ختم کرنے اور پابندیوں سے دستبردار ہونے سمیت ایرانی شرائط پوری کرنا ہوں گی۔

اسماعیل بقائی نے عراق پر امریکی دباؤ پر بھی تشویش کا اظہار کیا، جس کا مقصد عراق کی ایران کے ساتھ بیشتر سرحدیں بند کروانا ہے۔ انہوں نے کہا کہ اس معاملے سے بغداد اور تہران کے دوطرفہ تعلقات متاثر نہیں ہونے چاہئیں۔

انہوں نے ایران کی زمینی تجارت محدود کرنے کے لیے امریکی فوجی ٹاسک فورس کے قیام کو امریکی صدر ڈونلڈ ٹرمپ کی جماعت ری پبلکن کو وسط مدتی انتخابات میں ہونے والے نقصان سے توجہ ہٹانے کی کوشش قرار دیا۔

عالمی بلین مارکیٹ میں سونا 32 ڈالر کے اضافے سے 4098 ڈالر فی اونس کی سطح پر جا پہنچا۔

بین الاقوامی مارکیٹ میں سونے کے نرخ میں اضافے کے باعث مقامی سطح پر بھی فی تولہ سونا 3 ہزار 200 روپے کے اضافے سے 4 لاکھ 32 ہزار 336 روپے کا ہوگیا۔

اسی طرح دس گرام سونے کی قیمت بھی 2744 روپے کے اضافے سے 3 لاکھ 70 ہزار658 روپے ہوگئی۔

یاد رہے کہ ہفتے کو سونے کی فی تولہ قیمت4 لاکھ 29 ہزار 136 روپے پر مستحکم رہی تھی۔

دریں اثنا چاندی کی فی تولہ قیمت 55 روپے کے اضافے سے 5723 روپے ہوگئی۔

آئی ایس پی آر کے مطابق 8 نومبر کو میر علی کے جنوبی مضافات میں واقع گاؤں موزک میں بھارتی حمایت یافتہ فتنہ الخوارج کے ٹھکانوں کے خلاف آپریشن کیا گیا۔

آپریشن کے دوران سیکیورٹی فورسز نے مساجد میں قائم دو ٹھکانوں کو کلیئر کیا اور وہاں سے بڑی تعداد میں تیار شدہ دیسی ساختہ دھماکا خیز آلات (آئی ای ڈیز)، دھماکا خیز مواد تیار کرنے میں استعمال ہونے والی اشیا، اسلحہ اور گولہ بارود برآمد کیا۔

آئی ایس پی آر نے بتایا کہ دہشت گردوں نے دھماکا خیز مواد ذخیرہ کرنے اور تشدد کے مراکز چلانے کے لیے جان بوجھ کر مساجد کا استعمال کیا تھا۔ بیان میں کہا گیا کہ عبادت گاہوں کو ایسی سرگرمیوں کے لیے استعمال کرنا مذہبی مقامات کی بے حرمتی ہے اور ان دہشت گردوں کا اسلام سے کوئی تعلق نہیں۔

وزیراعظم شہباز شریف نے انٹیلی جنس بنیادوں پر کامیاب آپریشن پر سیکیورٹی فورسز کو سراہتے ہوئے ان کی پیشہ ورانہ صلاحیتوں کی تعریف کی۔

وزیراعظم آفس سے جاری بیان کے مطابق شہباز شریف نے کہا کہ دھماکا خیز مواد ذخیرہ کرنے اور تشدد کے مراکز چلانے کے لیے مساجد کا استعمال اسلام اور مقدس مقامات کی کھلی بے حرمتی ہے۔

وزیراعظم نے کہا کہ فتنہ الخوارج کی جانب سے مساجد کو دہشت گردی کی سرگرمیوں کے لیے استعمال کرنا، جو ان کے بقول بھارتی سرپرستی میں کام کرتی ہے، اس گروہ کے اسلامی تعلیمات سے انحراف کو ظاہر کرتا ہے۔

انہوں نے کہا کہ دہشت گردی کے خاتمے کے لیے سیکیورٹی فورسز اور قانون نافذ کرنے والے اداروں کی کارروائیاں پوری قوت سے جاری رہیں گی۔

آئی ایس پی آر کے مطابق علاقے میں کلیئرنس آپریشن جاری ہے تاکہ دہشت گردوں کے باقی ماندہ ٹھکانوں کا خاتمہ کیا جاسکے۔

بیان میں مزید کہا گیا کہ قومی ایکشن پلان کے تحت وفاقی ایپکس کمیٹی کی منظور کردہ عزمِ استحکام مہم کے تحت ملک سے بیرونی سرپرستی میں ہونے والی دہشت گردی کے خاتمے کے لیے کارروائیاں پوری رفتار سے جاری رہیں گی۔

ایسوسی ایشن نے الزام عائد کیا ہے کہ بجلی کی اضافی کھپت کے پیکیج کی قیمت کے تعین میں ڈیٹا، ماڈلنگ اور تجزیے کی سنگین خامیاں موجود ہیں۔

وزیر توانائی کو ارسال کردہ خط میں کاٹی کے صدر شیخ عمر ریحان نے کہا کہ صنعتی صارفین پر بجلی کی اضافی لاگت کی مد میں اربوں روپے کا بوجھ پڑنے کا خدشہ ہے، کیونکہ پیکیج کے تحت بجلی کی حقیقی اضافی پیداواری لاگت کا درست تعین نہیں کیا گیا۔

کاٹی کے مطابق نیپرا نے 9 دسمبر 2025 کو اس پیکیج کے لیے 22.98 روپے فی یونٹ نرخ منظور کیا تھا، تاہم بعد ازاں ریگولیٹر کی جانب سے لاگت کا تخمینہ 31.83 روپے فی یونٹ لگایا گیا، جو آئی ایس ایم او کے آپریشنل ڈیٹا شامل کرنے کے بعد 29.65 روپے رہ گیا۔

ایسوسی ایشن کا مؤقف ہے کہ منظور شدہ نرخ اور حقیقی لاگت کے درمیان فرق فیول کاسٹ ایڈجسٹمنٹ (ایف سی اے) کے ذریعے دیگر صارفین سے وصول کیا گیا، جس سے عام بجلی صارفین پر اضافی مالی بوجھ پڑنے کا خدشہ ہے۔

کاٹی نے کہا کہ نیپرا کے جائزے میں پی پی ایم سی اور آئی ایس ایم او کی جانب سے مطلوبہ معلومات اور تجزیہ فراہم نہ کرنے کی نشاندہی کی گئی۔ ایسوسی ایشن کے مطابق بجلی کی اضافی کھپت سے متعلق پلیکسوس ماڈلنگ بھی تاحال مکمل نہیں ہوئی، جس سے پیکیج کی لاگت کے تعین پر سوالات اٹھتے ہیں۔

کاٹی نے مطالبہ کیا کہ کسی عالمی شہرت یافتہ چارٹرڈ اکاؤنٹنگ فرم کے ذریعے ماہرین کی معاونت سے دونوں اداروں کا ڈیٹا، ماڈلنگ اور طریقہ کار آڈٹ کرایا جائے۔

ایسوسی ایشن نے صنعتی بجلی کے نرخ کم کرکے انہیں نیپرا کے متعین کردہ لاگتِ فراہمی کے مطابق کرنے اور مجوزہ دو حصوں پر مشتمل ٹیرف کو آزادانہ آڈٹ مکمل ہونے تک مؤخر کرنے کی بھی درخواست کی۔

کاپی رائٹ : بزنس ریکارڈر 2026

صوبائی وزیر نے نمائش کا دورہ کیا اور جدید، لگژری اور نایاب گاڑیوں میں گہری دلچسپی کا اظہار کیا۔ ایکسپو میں سپر کارز، جاپانی گاڑیوں، کلاسک کارز، خصوصی طور پر تیار کردہ گاڑیوں، فور بائی فور گاڑیوں اور جدید سپر بائیکس کی نمائش کی گئی۔ مٹسوبشی ایوو سمیت اسپورٹس اور پرفارمنس کارز بھی شرکا کی خصوصی توجہ کا مرکز رہیں۔

اس موقع پر فیصل ایوب کھوکھر نے کہا کہ پاک ویلز ایکسپو پاکستان میں آٹو موبائل کلچر کے فروغ کے لیے بہترین پلیٹ فارم ہے۔ ایسی نمائشوں سے نوجوانوں کو جدید ٹیکنالوجی، گاڑیوں میں تبدیلی اور آٹو موبائل انڈسٹری کے نئے رجحانات سے آگاہی ملتی ہے۔

انہوں نے کہا کہ پاکستان میں آٹو موبائل اور موٹر اسپورٹس کے شعبوں میں بے پناہ صلاحیت موجود ہے، جسے اجاگر کرنے کی ضرورت ہے۔ انہوں نے ایکسپو کے منتظمین کی کاوشوں کو بھی سراہا۔

مارکیٹ کیپٹلائزیشن کے لحاظ سے سب سے بڑی کرپٹو کرنسی بٹ کوائن کی قیمت 2 فیصد سے زائد کمی کے بعد 73 ہزار 708 ڈالر پر آ گئی، جو اگست کے بعد کی کم ترین سطح ہے۔ اسی طرح ایتھیریم کی قیمت بھی تقریباً 5 فیصد گر کر 2 ہزار 223 ڈالر پر پہنچ گئی۔

رپورٹ کے مطابق کرپٹو مارکیٹ میں حالیہ مندی کی ایک وجہ دنیا کے سب سے بڑے کرپٹو ایکسچینج بائنانس میں 6 ارب ڈالر کی مبینہ چوری اور امریکی وسط مدتی انتخابات میں کرپٹو کرنسیوں کے نمایاں ناقدین کی کامیابی بھی ہے۔ سرمایہ کاروں کو خدشہ ہے کہ ڈیموکریٹک پارٹی کے زیرِ کنٹرول امریکی کانگریس اس شعبے پر مزید سخت ضابطے نافذ کر سکتی ہے۔

سماجی رابطے کی ویب سائٹ ایکس پر اپنی ایک پوسٹ میں انہوں نے ان دلخراش مناظر کی جانب توجہ دلائی جن میں بے گھر فلسطینیوں کے خیمے سیلابی پانی میں ڈوبے ہوئے ہیں اور غزہ کے بچے، جن کے پاس پناہ لینے کی کوئی جگہ نہیں، شدید سردی اور بھوک کا سامنا کر رہے ہیں۔

وزیراعظم نے جنگ بندی اور بین الاقوامی قوانین کی خلاف ورزیوں اور فلسطینی عوام کے خلاف مسلسل جارحیت کی شدید مذمت کی۔

شہباز شریف نے کہا کہ انہوں نے وزارت خارجہ کو ہدایت کی ہے کہ انسانی امداد فوری طور پر بڑھانے کے لیے تمام ممکنہ ذرائع بروئے کار لائے جائیں۔

یہ پیش رفت ایسے وقت میں سامنے آئی ہے جب غزہ کی پٹی میں شدید بارشوں کے باعث بے گھر فلسطینیوں کی گنجان آبادی والے کیمپوں میں قائم ہزاروں خیمے زیر آب آگئے ہیں۔ بارش کے پانی نے پناہ گاہیں بہا دیں جبکہ کمبل اور گدے بھی بھیگ گئے۔

غزہ کے سرکاری میڈیا آفس کے مطابق گزشتہ 12 گھنٹوں کے دوران کم از کم 70 ہزار خیمے زیر آب آئے، جس سے ہزاروں بے گھر افراد متاثر ہوئے اور بعض زخمی بھی ہوئے، تاہم کسی ہلاکت کی اطلاع نہیں ملی۔

علاقے کی شہری دفاع کی سروس نے بتایا کہ اسے بے گھر شہریوں کی جانب سے مدد کے لیے 1,500 ہنگامی کالز موصول ہوئیں۔ اس کے مطابق تین خالی مکانات بھی منہدم ہوئے، تاہم ان واقعات میں کوئی زخمی نہیں ہوا۔

یہ مقابلہ مسافروں کے سفر کو مزید آرام دہ بنانے اور طیاروں کے اندر صفائی کے معیار کو بہتر بنانے کی کوششوں کا حصہ تھا۔

اس مقصد کے تحت پی آئی اے نے تینوں شہروں میں بیک وقت خصوصی صفائی مہم شروع کی، جس کے دوران جائزہ ٹیموں نے طیاروں کا معائنہ کرکے صفائی اور دیکھ بھال کے معیار کا جائزہ لیا۔

پی آئی اے کے مطابق یہ اقدام ایئرلائن کے مختلف انتظامی امور کو بہتر بنانے اور خدمات کا معیار بلند کرنے کی وسیع تر کوششوں کا حصہ ہے۔

اس مہم کے دوران بہترین کارکردگی دکھانے والے ملازمین کی حوصلہ افزائی کے لیے ایئرلائن کے اسلام آباد دفتر میں ایک تقریب منعقد کی گئی۔

پی آئی اے کے چیف ایگزیکٹو آفیسر ایڈرین ہیملٹن مینز نے کہا کہ طیاروں کی صفائی انتہائی اہمیت رکھتی ہے اور ایئرلائن کے برانڈ کا معیار بلند ترین سطح پر برقرار رکھنا ناگزیر ہے۔

ان کا کہنا تھا کہ اپنے طیاروں کو بہترین ممکنہ حالت میں رکھنا ہماری اولین ترجیح ہے۔

کیبن کی صفائی برقرار رکھنے میں نمایاں کردار ادا کرنے والے ملازمین کو شیلڈز اور تعریفی اسناد پیش کی گئیں، جبکہ ان کی کارکردگی کے اعتراف میں نقد انعامات بھی دیے گئے۔

ایئرلائن نے کہا کہ صفائی، معیار اور خدمات کو مزید بہتر بنانے کے لیے اقدامات کا سلسلہ جاری رکھا جائے گا۔

یہ پیش رفت پی آئی اے کے نئے چیف ایگزیکٹو آفیسر ایڈرین ہیملٹن مینز کے باضابطہ طور پر عہدے کا چارج سنبھالنے کے چند روز بعد سامنے آئی ہے۔ انہیں کمرشل ایوی ایشن کے شعبے میں 30 سال سے زائد تجربہ حاصل ہے اور وہ عمان، قازقستان اور افریقی خطے کی تین ایئرلائنز میں بطور چیف ایگزیکٹو خدمات انجام دے چکے ہیں۔

انہیں قومی ایئرلائن کی خدمات کا معیار بہتر بنانے اور عالمی فضائی صنعت میں اس کی پوزیشن مستحکم کرنے کی ذمہ داری سونپی گئی ہے۔ ہیملٹن کو ایوی ایشن کے شعبے میں اصلاحات کے نفاذ اور ادارہ جاتی ڈھانچے کی ازسرنو تشکیل کا ماہر سمجھا جاتا ہے۔

چیف سلیکٹر جارج بیلی نے تصدیق کی کہ لبوشین کو کم از کم پہلے ٹیسٹ کے لیے زیرِ غور نہیں لایا جائے گا۔ وہ گزشتہ 49 اننگز سے سنچری بنانے میں ناکام رہے ہیں، جبکہ جنوبی افریقہ کے خلاف آخری ٹیسٹ میں صفر اور چار رنز بنا سکے تھے۔

بیلی کے مطابق لبوشین شیفیلڈ شیلڈ میں کوئنز لینڈ کی قیادت کریں گے اور مستقبل میں اپنی کارکردگی سے ٹیم میں واپسی کا راستہ بنا سکتے ہیں۔

انہوں نے کہا کہ بھارت اور انگلینڈ کے آئندہ دوروں کے لیے لبوشین کی واپسی کے امکانات موجود ہیں، تاہم انہیں اپنی بہترین فارم بحال کرنا ہوگی۔

آسٹریلیا کا اسکواڈ شیفیلڈ شیلڈ کے اگلے راؤنڈ کے بعد حتمی شکل اختیار کرے گا، جس کا آغاز بدھ سے ہوگا۔

الکاراز نے پیرس ماسٹرز کے فائنل میں امریکا کے بین شیلٹن کو 6-7 (5) اور 5-7 سے شکست دے کر رواں سال کا پانچواں ٹائٹل اپنے نام کیا۔ یہ اگست میں کلائی کی انجری کے بعد ٹینس میں واپسی کے بعد ان کا تیسرا ٹائٹل ہے۔

سات مرتبہ کے گرینڈ سلیم چیمپئن نے کہا کہ واپسی کے بعد یہ ان کا بہترین ہفتہ تھا اور انہوں نے ذہنی طور پر بھی نمایاں بہتری دکھائی۔

الکاراز کا کہنا تھا کہ اے ٹی پی فائنلز ان کا پسندیدہ ہدف ہے اور وہ اس مرتبہ بھرپور اعتماد کے ساتھ ٹورنامنٹ میں شرکت کریں گے۔اے ٹی پی فائنلز کا آغاز اتوار کو اٹلی کے شہر ٹیورن میں ہوگا۔

گوف نے شاندار کھیل کا مظاہرہ کرتے ہوئے فیصلہ کن سیٹ میں برتری حاصل کی۔ دوسرے سیٹ میں پیگولا نے ابتدائی تین گیمز جیت کر دباؤ بڑھایا، تاہم کوکو گوف نے تین سیٹ پوائنٹس بچا کر مقابلہ برابر کر دیا۔ پیگولا نے ٹائی بریکر جیت کر میچ کو فیصلہ کن سیٹ تک پہنچایا، مگر گوف نے آخری سیٹ میں 2-6 سے کامیابی سمیٹ لی۔

کوکو گوف نے کہا کہ ایک ماہ کے وقفے کے بعد کورٹ میں واپسی پر وہ خوش ہیں، تاہم یہ ایک مشکل مقابلہ تھا۔

دوسری جانب نوسکووا نے جارحانہ کھیل پیش کرتے ہوئے کوستیُک کو باآسانی شکست دی اور ڈبلیو ٹی اے فائنلز میں فاتحانہ آغاز کیا۔

ریلوے حکام کے مطابق جیزہ سے فیوم جانے والی ٹرین قاہرہ سے اسوان کی جانب روانہ ہونے والی دوسری ٹرین سے پیچھے سے ٹکرا گئی، جس کے نتیجے میں کئی بوگیاں پٹری سے اتر گئیں۔

ریلوے اتھارٹی نے بتایا کہ امدادی ٹیمیں ملبہ ہٹانے اور قاہرہ سے بالائی مصر جانے والی ریلوے لائن پر سروس بحال کرنے میں مصروف ہیں، تاہم بحالی میں لگنے والے وقت سے متعلق کوئی تفصیل نہیں دی گئی۔

صدر عبدالفتاح السیسی نے حادثے کی فوری تحقیقات کا حکم دیتے ہوئے کہا ہے کہ غفلت کے مرتکب افراد کو جواب دہ ٹھہرایا جائے۔ سرکاری استغاثہ کے مطابق حادثے کی تکنیکی وجوہات جاننے کے لیے تحقیقات جاری ہیں۔

مصر کا ریلوے نظام خطے کے قدیم ترین اور بڑے نظاموں میں شمار ہوتا ہے، جہاں ٹرین حادثات میں جانی نقصان کے واقعات پیش آتے رہتے ہیں۔ حکومت ریلوے نظام کو جدید بنانے کے لیے اربوں مصری پاؤنڈ خرچ کر رہی ہے۔

پولیس کے مطابق جاں بحق خاتون کی شناخت رابیہ احسن کے نام سے ہوئی ہے، جن کی لاش اڈیالہ روڈ کے علاقے گلشن آباد میں واقع ان کے گھر سے ملی۔

پولیس کی ابتدائی تحقیقات کے مطابق رابیہ احسن کو گولی لگی تھی۔ تفتیشی حکام دستیاب شواہد کا جائزہ لے رہے ہیں تاکہ یہ معلوم کیا جاسکے کہ فائرنگ کس طرح ہوئی اور آیا یہ واقعہ حادثاتی تھا یا جان بوجھ کر پیش آیا۔

سٹی پولیس آفیسر (سی پی او) راولپنڈی نے تصدیق کی کہ واقعے کے سلسلے میں مقتولہ کے شوہر احسن کو پوچھ گچھ کے لیے حراست میں لیا گیا ہے۔

تفتیش کاروں کو اپنے ابتدائی بیان میں احسن نے دعویٰ کیا کہ اسلحے سے گولی حادثاتی طور پر چلی تھی اور انہوں نے جان بوجھ کر فائر نہیں کیا۔ ان کے مطابق میں نے جان بوجھ کر گولی نہیں چلائی، یہ اتفاقاً چل گئی۔

انہوں نے یہ بھی بتایا کہ رابیہ کی والدہ اور بہن بھی اسی گھر میں موجود تھیں اور تفتیش کاروں کو ان سے بھی واقعے کے بارے میں معلومات حاصل کرنی چاہئیں۔ انہوں نے مبینہ طور پر کہا، آپ ان کی بہن اور والدہ سے پوچھ سکتے ہیں، کیونکہ وہ بھی گھر میں رہتی ہیں۔

پولیس متعلقہ افراد کے بیانات قلم بند کر رہی ہے اور دستیاب شواہد کا جائزہ لے رہی ہے تاکہ رابیہ کی موت کے اصل حالات کا تعین کیا جاسکے۔

کاپی رائٹ بزنس ریکارڈر، 2026

یوم اقبال کے موقع پر اپنے پیغام میں وزیراعظم نے بتایا کہ تقریبات کا آغاز 9 نومبر 2026 کو ہوگا اور یہ سلسلہ 9 نومبر 2027 تک جاری رہے گا۔ انہوں نے کہا کہ اس سلسلے میں عالمی کانفرنسیں، علمی و تحقیقی سیمینارز، ادبی میلوں، نمائشوں، تعلیمی مقابلوں اور ثقافتی پروگراموں کا انعقاد کیا جائے گا، تاکہ اقبال کی فکری میراث کو محفوظ اور آئندہ نسلوں تک منتقل کیا جاسکے۔

شہباز شریف نے کہا کہ علامہ اقبال نے برصغیر کے مسلمانوں میں سیاسی شعور بیدار کیا اور انہیں اپنی منفرد قومی شناخت کا احساس دلایا، جس نے ایک آزاد وطن کے حصول کی تاریخی جدوجہد میں اہم کردار ادا کیا۔

وزیراعظم کے مطابق اقبال کا تصورِ خودی افراد اور قوموں کو خود شناسی، بامقصد جدوجہد اور روحانی آزادی کے ذریعے اپنی تقدیر بدلنے کا درس دیتا ہے۔ انہوں نے نوجوانوں کے بارے میں اقبال کے اعتماد اور شاہین کے تصور کو بھی اجاگر کیا، جو جرات، خودمختاری، بلند عزائم اور اعلیٰ کارکردگی کی علامت ہے۔

انہوں نے کہا کہ اقبال کا فلسفہ امن، سماجی ہم آہنگی، رواداری اور انصاف کو پائیدار قومی ترقی کے لیے بنیادی اہمیت دیتا ہے، جبکہ نفرت، انتہا پسندی، فرقہ واریت اور امتیازی سلوک کی مخالفت کرتا ہے۔

وزیراعظم نے کہا کہ اقبال کا پیغام مسلم اتحاد، عالمگیر اخوت اور پرامن بقائے باہمی کے حوالے سے آج بھی اہمیت رکھتا ہے۔ پاکستان مسلم امہ میں اتحاد کے فروغ اور عالمی تنازعات کے پرامن حل کی حمایت جاری رکھے گا۔

انہوں نے قوم پر زور دیا کہ اقبال کے فلسفے کو گہرائی سے سمجھنے، ان کے افکار پر تحقیقی کام، تخلیقی سوچ اور قومی کردار کی تعمیر کے لیے عزم کی تجدید کی جائے۔

کاپی رائٹ بزنس ریکارڈر، 2026

لندن میں قائم قانونی فرم میٹرکس چیمبرز کے وکلا نے نئی دہلی میں بنگلہ دیشی سفارت خانے کی قائم مقام ہائی کمشنر پریتی رحمان کو خط لکھ کر درخواست کی کہ منسوخ کیے گئے پاسپورٹ اور قومی شناختی کارڈ کی جگہ نئی دستاویزات جاری کی جائیں۔ خط میں درخواست پر جلد کارروائی کرنے اور شیخ حسینہ کی بنگلہ دیشی شہریت کو بنیاد بنانے کا مطالبہ کیا گیا ہے۔

شیخ حسینہ نے رائٹرز کو بتایا تھا کہ وہ دسمبر میں بنگلہ دیش واپس آکر عدالت کے سامنے خود کو پیش کرنے کا ارادہ رکھتی ہیں۔ ان کے معاونین کے مطابق واپسی کی تاریخ ضروری قانونی اور انتظامی کارروائیاں مکمل ہونے کے بعد بتائی جائے گی۔

بنگلہ دیش کی جنگی جرائم کی عدالت نے گزشتہ سال نومبر میں طلبہ کی قیادت میں ہونے والی تحریک کے دوران ہلاکت خیز کریک ڈاؤن کا حکم دینے پر ان کی غیر موجودگی میں سزائے موت سنائی تھی، تاہم حسینہ واجد الزامات مسترد کرتی ہیں۔

ان کی جماعت عوامی لیگ پر پابندی عائد ہے اور متعدد رہنما جیلوں یا جلاوطنی میں ہیں۔ ان کی واپسی سے بنگلہ دیش میں سیاسی کشیدگی بڑھنے کا خدشہ ہے، تاہم اس سے بھارت کے ساتھ خراب تعلقات بہتر ہونے کا امکان بھی ظاہر کیا جا رہا ہے۔

آئیسکو نے اپنے ایک قرض دہندہ کو بھیجے گئے خط میں بتایا کہ کمپنی کی تنظیم نو کا منصوبہ کابینہ کمیٹی برائے نجکاری نے اگست 2026 میں منظور کیا تھا، جبکہ وفاقی کابینہ نے 23 ستمبر 2026 کو اس کی توثیق کی تھی۔

منصوبے کے تحت کمپنیز ایکٹ 2017 کے تحت اسکیم آف ارینجمنٹ کے ذریعے آئیسکو کے منتخب اثاثے، قرض اور دیگر واجبات الگ کرکے حکومت کی جانب سے حصص فروخت کرنے سے پہلے پی ایچ ایل کو منتقل کیے جائیں گے۔ پی ایچ ایل کو حکومت کی ملکیت میں خصوصی مقصد کی کمپنی نامزد کیا گیا ہے، جسے آئیسکو، فیصل آباد الیکٹرک سپلائی کمپنی (فیسکو) اور گوجرانوالہ الیکٹرک پاور کمپنی (گیپکو) کے مخصوص اثاثے اور واجبات منتقل ہوں گے۔

منصوبے کے مطابق آئیسکو کی تمام ملکیتی زمین پی ایچ ایل کو منتقل ہوگی، تاہم بعد ازاں آئیسکو یہ زمین طویل مدتی لیز پر حاصل کرے گی۔ حاضر سروس ملازمین کے ریٹائرمنٹ فوائد کی ذمہ داری کمپنی کے پاس رہے گی، جبکہ ریٹائرڈ ملازمین کی پنشن اور دیگر واجبات پی ایچ ایل کو منتقل ہوں گے۔

آئیسکو کے موجودہ ریٹائرمنٹ بینیفٹ ٹرسٹ فنڈز میں سے ڈیڑھ ارب روپے حاضر سروس ملازمین کے لیے برقرار رکھے جائیں گے، جبکہ باقی رقم پی ایچ ایل کے قائم کردہ ٹرسٹ کو منتقل ہوگی۔

اس کے علاوہ پنجاب حکومت کے قابل ادائیگی اور قابل وصول واجبات، قرضوں کی مقررہ تاریخ سے زائد المیعاد اقساط اور ان پر مارک اپ بھی پی ایچ ایل کو منتقل کیے جائیں گے۔ تاہم آئیسکو کے قرضوں کی وہ اقساط جن کی ادائیگی کی تاریخ نہیں آئی، کمپنی کی بیلنس شیٹ پر برقرار رہیں گی۔

ایف بی آر سے حاصل ہونے والی ٹیکس وصولیاں اور متعلقہ عدالتی مقدمات بھی پی ایچ ایل کو منتقل ہوں گے۔

آئیسکو نے 30 جون 2026 تک کے بقایا جات رکھنے والے قرض دہندگان سے مجوزہ تنظیم نو پر عدم اعتراض طلب کیا ہے۔ اسکیم کی منظوری سیکیورٹیز اینڈ ایکسچینج کمیشن آف پاکستان سے حاصل کی جائے گی، جس کے مؤثر ہونے کے بعد منتقل شدہ واجبات کی ادائیگی پی ایچ ایل کی ذمہ داری ہوگی۔

کاپی رائٹ بزنس ریکارڈر، 2026

یہ پیش رفت ایک میڈیا رپورٹ کے بعد سامنے آئی ہے جس میں دعویٰ کیا گیا تھا کہ ہوانگ کے سنگاپور کی کمپنی میگاسپیڈ کی سابق عہدیدار ایلس ہوانگ سے قریبی تعلقات تھے، جنہیں امریکی حکام نے چینی انٹیلی جنس کا اثاثہ قرار دیا تھا۔

اینویڈیا کے مطابق بورڈ کو فی الحال یہ یقین کرنے کی کوئی وجہ نہیں کہ امریکی قومی سلامتی یا کمپنی کے خفیہ راز متاثر ہوئے ہیں، تاہم تحقیقات میں تمام دستیاب معلومات کا جائزہ لیا جائے گا۔ آزاد ڈائریکٹرز کی کمیٹی بیرونی قانونی مشیروں کی معاونت سے تحقیقات کی نگرانی کرے گی۔

ہوانگ نے ملازمین کو پیغام میں اپنی اہلیہ سے بے وفائی کا اعتراف کرتے ہوئے اپنے عمل کی مکمل ذمہ داری قبول کی اور معافی مانگی۔ انہوں نے کمپنی اور امریکی قومی سلامتی کے تحفظ کے عزم کا بھی اظہار کیا۔

تجزیہ کاروں کے مطابق تحقیقات سے اینویڈیا کے حصص پر دباؤ بڑھ سکتا ہے، جو پہلے ہی مصنوعی ذہانت کی صنعت میں سرمایہ کاری کے مستقبل سے متعلق خدشات کے باعث گراوٹ کا شکار ہیں۔

امریکی صدر ڈونلڈ ٹرمپ نے ہوانگ کو ایک اچھا شخص قرار دیتے ہوئے کہا کہ انہیں امید ہے معاملہ ٹھیک ہوگا۔ ادھر امریکی قانون سازوں نے بھی ہوانگ سے کانگریس کو بریفنگ دینے کا مطالبہ کیا ہے۔

امریکی ڈالر انڈیکس، جو چھ بڑی کرنسیوں کے مقابلے میں ڈالر کی قدر ظاہر کرتا ہے، پیر کو 102.20 پر مستحکم رہا۔ جمعے کو اس میں تقریباً 0.7 فیصد اضافہ ہوا تھا، جب اعداد و شمار کے مطابق اکتوبر میں روزگار میں اضافہ تیز ہوا اور بے روزگاری کی شرح کم ہوگئی۔

یورو 0.1 فیصد اضافے سے 1.11485 ڈالر پر آگیا، جبکہ آسٹریلوی ڈالر 0.3 فیصد بڑھ کر 0.6875 ڈالر پر پہنچ گیا۔ جاپانی ین کے مقابلے میں ڈالر 0.2 فیصد کمی سے 158.185 ین پر آگیا۔

سی ایم ای گروپ کے فیڈ واچ ٹول کے مطابق 9 دسمبر کو امریکی فیڈرل ریزرو کی جانب سے شرح سود بڑھانے کے امکانات 79 فیصد ہوگئے ہیں، جو ایک ہفتہ قبل 71 فیصد تھے۔

فیڈرل ریزرو کے عہدیداروں نے بھی مہنگائی پر قابو پانے کے لیے شرح سود میں مزید اضافے کی ضرورت پر زور دیا ہے۔

دوسری جانب نیوزی لینڈ کا ڈالر 0.4 فیصد اضافے سے 0.5557 امریکی ڈالر پر آگیا۔ ملک میں انتخابات کے ابتدائی نتائج کے مطابق وزیر اعظم کرسٹوفر لکسن کی جماعت کو اکثریت حاصل ہوئی ہے، تاہم تقریباً 15 فیصد ووٹوں کی گنتی باقی ہے اور حتمی نتائج 27 نومبر کو متوقع ہیں۔

اسپاٹ گولڈ کی قیمت 1.4 فیصد اضافے کے بعد 4,123.46 ڈالر فی اونس ہوگئی، جبکہ دسمبر میں فراہمی کے لیے امریکی گولڈ فیوچرز بھی 1.4 فیصد بڑھ کر 4,132.70 ڈالر فی اونس پر پہنچ گئے۔ گزشتہ ہفتے سونے کی قیمت میں تقریباً 5 فیصد اضافہ ہوا تھا۔

امریکی صدر ڈونلڈ ٹرمپ کے اس بیان کے بعد کہ ایران کے خلاف مزید حملوں کا امکان انتہائی کم ہے، عالمی منڈی میں خام تیل کی قیمتیں گر گئیں، جس سے ممکنہ رسدی تعطل کے خدشات کم ہوئے۔

خام تیل کی کم قیمتیں افراط زر کے دباؤ کو کم کرسکتی ہیں اور اس توقع کو محدود کرسکتی ہیں کہ شرح سود طویل عرصے تک بلند رہے گی۔ اس طرح سونے جیسے ایسے اثاثے رکھنے کی لاگت کم ہوجاتی ہے جن پر کوئی منافع یا سود حاصل نہیں ہوتا۔

کے سی ایم ٹریڈ کے چیف مارکیٹ تجزیہ کار ٹم واٹرر کے مطابق ایران کے معاملے پر ٹرمپ کے نسبتاً مفاہمتی رویے سے تیل کی قیمتیں محدود رہنے میں مدد مل رہی ہے، جس سے سونے پر افراط زر کا دباؤ کم ہوا ہے، جبکہ ڈالر کی قدر میں معمولی کمی نے بھی قیمتوں کو سہارا دیا۔

دوسری جانب امریکی ڈالر کمزور ہونے سے دیگر ممالک کے خریداروں کے لیے ڈالر میں قیمت والا سونا نسبتاً سستا ہوگیا۔

امریکا میں اکتوبر کے دوران روزگار میں اضافے کی رفتار تیز ہوئی اور بے روزگاری کی شرح کم ہوکر 4.1 فیصد پر آگئی، جس سے امریکی لیبر مارکیٹ کی مضبوطی کا عندیہ ملا اور دسمبر میں فیڈرل ریزرو کی جانب سے شرح سود میں اضافے کے امکانات مزید مضبوط ہوئے۔

سی ایم ای کے فیڈ واچ ٹول کے مطابق دسمبر میں شرح سود بڑھنے کے امکانات 81 فیصد ہوگئے ہیں، جو روزگار کے اعداد و شمار جاری ہونے سے قبل 71 فیصد تھے۔

دیگر قیمتی دھاتوں میں چاندی کی قیمت 2.5 فیصد اضافے سے 53.15 ڈالر فی اونس، پلاٹینم 1.3 فیصد بڑھ کر 1,553.23 ڈالر اور پیلیڈیم 2.1 فیصد اضافے سے 1,045.11 ڈالر فی اونس ہوگیا۔

گرینچ معیاری وقت (جی ایم ٹی) کے مطابق صبح 8 بج کر 30 منٹ پر برینٹ خام تیل کی قیمت 1.65 ڈالر یا 1.7 فیصد کمی کے بعد 96.67 ڈالر فی بیرل ہوگئی، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل 96 سینٹ یا ایک فیصد کمی سے 89.87 ڈالر فی بیرل پر آگیا۔

گزشتہ ہفتے برینٹ خام تیل کی قیمت میں 16 فیصد کی بڑی کمی ریکارڈ کی گئی، جو کورونا وبا کے آغاز کے بعد ہفتہ وار بنیاد پر سب سے بڑی گراوٹ ہے۔

نئی دہلی میں قائم تحقیقی ادارے ایس ایس ویلتھ اسٹریٹ کی بانی سگندھا سچدیوا نے کہا کہ تیل کی مارکیٹ بظاہر کشیدگی میں کمی کے نسبتاً پُرامید منظرنامے کو قیمتوں میں شامل کر رہی ہے، حالانکہ واشنگٹن اور تہران کے درمیان ابھی تک کوئی جامع معاہدہ طے نہیں پایا۔

انہوں نے کہا کہ جب تک سفارتی محاذ پر کوئی اہم پیش رفت نہیں ہوتی اور آبنائے ہرمز سے بحری جہازوں کی آمدورفت معمول کے مطابق مسلسل بحال نہیں ہوتی، خام تیل کی قیمتوں میں جغرافیائی سیاسی خطرات کے باعث اضافی پریمیم برقرار رہنے کا امکان ہے۔

ان کے مطابق قلیل مدت میں برینٹ خام تیل کی قیمت کو 93 ڈالر فی بیرل کی سطح پر سپورٹ ملنے کی توقع ہے۔

ٹرمپ نے سی این این کو بتایا کہ اگر ایران کے ساتھ مضبوط معاہدہ طے پا جاتا ہے تو نئے حملوں کی ضرورت پیش آنے کا امکان انتہائی کم ہے۔

کے سی ایم ٹریڈ کے چیف تجزیہ کار ٹم واٹرر کے مطابق ٹرمپ کے حالیہ بیانات میں محتاط رویہ نظر آتا ہے، تاہم مارکیٹ اب بھی یہ دیکھ رہی ہے کہ آیا وسط مدتی انتخابات کے بعد ایران تنازع پر ان کی پالیسی میں مستقل تبدیلی آئی ہے یا یہ محض عارضی تبدیلی ہے۔

دنیا بھر میں امریکا، چین اور دیگر ممالک میں تیار کیے جانے والے جدید اور تیزی سے حرکت کرنے والے انسان نما روبوٹس کے حوالے سے دلچسپی بڑھ رہی ہے، تاہم جنوبی ایشیائی ملک پاکستان میں روبوٹ عملے کا نظر آنا اب بھی ایک غیر معمولی بات ہے۔

روبوٹ ویٹریس اپنی الیکٹرانک آواز میں کہتی ہے، ’’سسلیئن(Sicilian) میں خوش آمدید، میرا نام روبیا ہے۔‘‘ اس دوران وہ اپنی سرخ ایل ای ڈی آنکھیں جھپکاتے ہوئے کھانے کے منتظر افراد کی جانب دیکھتی ہے۔

روبیہ اور اس کا ساتھی جوجو پاکستانی انجینئر سید اسامہ عزیز کی اپنی تیار کردہ تخلیقات ہیں، جو کراچی کے مشہور ریستورانوں کے منظرنامے کو سائنس فکشن فلموں جیسا نیا رنگ دے رہے ہیں۔

ان روبوٹس کے سفید گول سر اور سیاہ رنگ کے چہرے کے حصے ہیں، جو موٹر سائیکل کے ہیلمٹ سے مشابہت رکھتے ہیں، جبکہ ان کی گردنوں کے گرد سیاہ شالیں ہیں، جو خطے میں خواتین کے دوپٹے کے انداز میں پہنی جاتی ہیں۔

سید اسامہ عزیز، جو دی سسلیئن ریستوران کے بانی بھی ہیں نے زیادہ تر مقامی طور پر تیار کردہ پرزوں کی مدد سے یہ مشینیں تیار کی ہیں۔ انہوں نے اپنے لیبارٹری میں ان کے سرکٹ بورڈز ڈیزائن کیے اور ان کی پروگرامنگ بھی خود کی۔

انہوں نے اے ایف پی کو بتایا کہ روبوٹس بنانے کے لیے درکار آلات اور دیگر ضروری اشیا یہاں اتنی آسانی سے دستیاب نہیں ہیں، اس لیے ہمیں ان کا انتظام خود کرنا پڑا۔

یہ دونوں روبوٹس ان کی روبوٹکس کمپنی کوبوٹ کے ذریعے تیار کیے گئے، جس میں ان کے دوستوں نے بھی مدد کی، جبکہ بعض الیکٹرانک پرزے بیرون ملک سے درآمد کیے گئے۔

خاص طور پر چین اور مشرقی ایشیا کے دیگر ممالک میں روبوٹس تیزی سے عام ہوتے جا رہے ہیں، جہاں وہ چین ریستورانوں میں صارفین تک کھانا پہنچانے کے علاوہ صفائی کرنے اور ہوٹلوں میں مہمانوں کا استقبال کرنے جیسے دیگر کام بھی انجام دے رہے ہیں۔

تاہم پاکستان میں یہ اب بھی ایک نئی اور حیران کن چیز ہیں، جہاں اسامہ عزیز کے مقامی طور پر تیار کردہ روبوٹس متجسس صارفین کی توجہ کا مرکز بن رہے ہیں۔

جب یہ روبوٹس کسی میز پر پہنچتے ہیں تو صارفین کو یا تو خود ان کی ٹرے سے کھانا اٹھانا پڑتا ہے یا پھر ریستوران کے انسانی عملے کے کسی رکن کی مدد کا انتظار کرنا ہوتا ہے۔

پرجوش صارفین

اسامہ عزیز کی روبوٹس تیار کرنے کی ورکشاپ پاکستان کے وسطی صوبے پنجاب کے شہر ملتان میں واقع ہے۔ وہ مستقبل میں اپنی ان تخلیقات کو مزید جدید اور بہتر بنانے کے خواہش مند ہیں۔

انہوں نے کہا کہ ہمارے منصوبوں میں کیمروں کی مدد سے ڈیٹا پراسیسنگ اور تصاویر کی شناخت و تجزیے کی خصوصیات شامل کرنا ہے۔

انہوں نے مزید کہا کہ اس کا مطلب ہے کہ روبوٹ آپ کو دیکھ کر پہچان بھی سکے گا اور اسے یاد رہے گا کہ آپ نے پچھلی مرتبہ کیا آرڈر دیا تھا، جس کے مطابق وہ آپ کو بہتر تجاویز بھی دے سکے گا۔

فی الحال یہ روبوٹس خاندانوں میں خاصے مقبول ہو رہے ہیں، جو انہیں کام کرتے ہوئے دیکھنے کے لیے بڑی تعداد میں ریستوران کا رخ کر رہے ہیں۔

اے ایف پی سے گفتگو کرتے ہوئے ایک پرجوش صارف احمر ضمیر نے کہا کہ اس کی سب سے اچھی بات یہ ہے کہ یہ اپنا تعارف خود کرواتا ہے۔

انہوں نے وضاحت کی کہ روبوٹ انہیں یہ بھی بتاتا ہے کہ وہ کون کون سی چیزیں آرڈر کر سکتے ہیں۔

بچے ان روبوٹس کو چھونے کے لیے ہاتھ بڑھاتے ہیں، جبکہ ان کے والدین ان کے ساتھ تصاویر اور سیلفیاں بناتے ہیں۔

نوجوان صارف سونیا ڈیلوسکر نے ان انسان نما روبوٹس کی ظاہری شکل کو متاثر کن قرار دیا اور کہا کہ وہ صارفین کو کھانا پیش کرنے کے ان کے انداز کو زیادہ پسند کرتی ہیں، کیونکہ یہ ایک مشین ہے اور اس میں کوئی جذبات نہیں ہیں۔

ریستوران کے عملے کا کہنا ہے کہ ان روبوٹس کی انفرادیت نے صارفین کی تعداد میں نمایاں اضافہ کیا ہے، یہاں تک کہ کچھ لوگ ان روبوٹس کو دیکھنے کے لیے وسیع و عریض بندرگاہی شہر کے دور دراز علاقوں سے بھی آ رہے ہیں۔

ریستوران کی ایک ملازم ہیلن نے اے ایف پی کو بتایا کہ ہمارا کاروبار بڑھ گیا ہے۔ لوگ اسے دیکھنے کے لیے دور دور سے آ رہے ہیں۔ انہوں نے یہاں پہلی مرتبہ روبوٹ دیکھا ہے۔

انہوں نے مزید کہا کہ لوگ انہیں دیکھ کر بہت پرجوش ہیں۔

یہ سہولت ایف بی آر کے آئی آر آئی ایس پورٹل کے ذریعے دستیاب ہوگی، جس کے لیے متعلقہ کمشنر ان لینڈ ریونیو (سی آئی آر) کی پیشگی منظوری لازمی ہوگی۔ اس کا مقصد ٹیکس دہندگان کو ایسی درست الیکٹرانک سیلز ٹیکس (ڈی آئی) انوائسز میں غلطیوں یا تضادات کی اصلاح کا موقع فراہم کرنا ہے، جن کا پتا 72 گھنٹے کی مقررہ مدت گزرنے کے بعد چلے۔

پاکستان ریونیو آٹومیشن لمیٹڈ (پرال) کی جانب سے جاری کردہ صارف رہنما کتابچے کے مطابق، ٹیکس دہندگان آئی آر آئی ایس کے ذریعے درخواست جمع کراسکتے ہیں اور ٹیکس حکام کے جائزے کے لیے معاون دستاویزات بھی منسلک کرسکتے ہیں۔

اس سہولت سے استفادہ کرنے کا مرحلہ وار طریقہ درج ذیل ہے۔

ترمیم یا منسوخی کے لیے درخواست کیسے دیں؟

پہلا مرحلہ: آئی آر آئی ایس میں لاگ اِن کریں

ایف بی آر کے آئی آر آئی ایس پورٹل پر اپنے اکاؤنٹ میں لاگ اِن کریں۔ مرکزی مینیو سے سیلز ٹیکس کا سیکشن کھولیں اور درخواستوں (Applications) کا انتخاب کریں۔

دوسرا مرحلہ: متعلقہ درخواست منتخب کریں

دستیاب اختیارات میں سے 72 گھنٹے کے بعد الیکٹرانک سیلز ٹیکس انوائس میں ترمیم کی درخواست (Application for Amendment in Electronic Sales Tax Invoice (after 72 hrs)) منتخب کریں۔

متعلقہ ٹیکس کی مدت کا انتخاب کریں اور Continue پر کلک کریں۔

تیسرا مرحلہ: انوائس شامل کریں

ڈی آئی سیل انوائس (DI Sale Invoice) کا سیکشن کھولیں اور Add Invoice پر کلک کریں۔

اس مرحلے پر آپ کو ایف بی آر انوائس ٹرانزیکشن نمبر درکار ہوگا، جسے ماسٹر انوائس نمبر بھی کہا جاتا ہے۔ یہ نمبر منتخب کردہ ٹیکس مدت کے لیے ڈی آئی انوائس مینجمنٹ سیکشن میں دستیاب ہوتا ہے۔ یہ انوائس نمبر میں ہائفن (-) سے پہلے درج ہوتا ہے۔

یہ نمبر سرچ فیلڈ میں درج کریں اور Search پر کلک کریں۔ نتائج میں سے متعلقہ انوائس منتخب کریں۔

چوتھا مرحلہ: ترمیم یا منسوخی کا انتخاب کریں

انوائس منتخب کرنے کے بعد دستیاب دو اختیارات میں سے ایک کا انتخاب کریں:

- ترمیم کے لیے: Load For Modification منتخب کریں۔ انوائس کھولیں، Edit پر کلک کریں، مطلوبہ تبدیلیاں کریں اور Save Item منتخب کریں۔

- منسوخی کے لیے: Load For Discard منتخب کریں۔ متعلقہ انوائس منتخب کریں، Delete/Discard پر کلک کریں اور Yes منتخب کرکے کارروائی کی تصدیق کریں۔

ایک ہی درخواست میں ترمیم کے لیے منتخب کی گئی انوائس کو منسوخی کے لیے شامل نہیں کیا جاسکتا۔ اسی طرح منسوخی کے لیے منتخب کردہ انوائس میں اسی درخواست کے ذریعے ترمیم بھی نہیں کی جاسکتی۔

پانچواں مرحلہ: معاون دستاویزات منسلک کریں

Attachments ٹیب کھولیں اور متعلقہ معاون دستاویزات پی ڈی ایف فارمیٹ میں اپ لوڈ کرنے کے لیے + کے نشان پر کلک کریں۔ دستاویزات منسلک کرنے کے بعد OK پر کلک کریں۔

درخواست کا جائزہ لیں اور Submit پر کلک کرکے اسے جمع کرادیں۔

درخواست جمع ہونے کے بعد کیا ہوگا؟

درخواست جمع ہونے کے بعد جائزے کے لیے ٹیکس حکام کو بھیج دی جائے گی۔ متعلقہ ٹیکس افسر یا کمشنر آئی آر آئی ایس کے اندرونی خط و کتابت کے نظام کے ذریعے مزید معلومات یا وضاحت طلب کرسکتا ہے۔

اگر وضاحت طلب کی جائے تو ٹیکس دہندگان Outbox کھول کر Sales Tax منتخب کریں اور 72 گھنٹے کے بعد الیکٹرانک سیلز ٹیکس انوائس میں ترمیم کی درخواست کا انتخاب کرکے جواب دے سکتے ہیں۔

Assignment ٹیب میں متعلقہ اسائنمنٹ منتخب کریں اور Reply پر کلک کریں۔ اس کے بعد Clarification Provided منتخب کریں، مطلوبہ وضاحت درج کریں اور Save پر کلک کریں۔

اس کے بعد ٹیکس حکام درخواست کا جائزہ لیں گے۔ کمشنر یا ٹیکس افسر ہر انوائس آئٹم کی الگ الگ یا متعدد آئٹمز کی بیک وقت منظوری یا درخواست مسترد کرسکتا ہے۔

اہم پابندیاں جن کا خیال رکھنا ضروری ہے

ٹیکس دہندگان ایسی انوائسز میں ترمیم یا انہیں منسوخ کرنے کے لیے درخواست نہیں دے سکتے جو پہلے ہی سیلز ٹیکس ریٹرن یا فیڈرل ایکسائز ریٹرن کے اینکسچر-سی میں شامل کی جاچکی ہوں۔

ایسی انوائسز کے لیے بھی درخواست کی اجازت نہیں ہوگی جنہیں کسی دوسری درخواست کے تحت کمشنر پہلے ہی منظور کرچکا ہو، جن کے لیے پہلے درخواست جمع کرائی جاچکی ہو اور کمشنر اسے مسترد کرچکا ہو، یا جن کے متعلق کسی دوسری درخواست پر فیصلہ ہونا باقی ہو۔

جب تک درخواست زیر التوا رہے گی، ٹیکس دہندہ سیلز ٹیکس ریٹرن کا اینکسچر-سی جمع نہیں کراسکے گا۔ آئی آر آئی ایس سسٹم فیصلہ ہونے تک اس کی جمع آوری روک دے گا۔

اگر درخواست منظور ہوجاتی ہے تو ترمیم شدہ انوائسز سسٹم کی توثیق سے مشروط اینکسچر-سی میں شامل کرنے کے لیے دستیاب ہوں گی۔ اگر درخواست مسترد کردی جاتی ہے تو اصل انوائسز میں کوئی تبدیلی نہیں ہوگی اور انہیں اینکسچر-سی اور جہاں قابل اطلاق ہو، فیڈرل ایکسائز ریٹرن میں شامل کیا جائے گا۔

ٹیکس دہندگان ایک ہی ٹیکس مدت کے لیے ایک سے زیادہ درخواستیں بھی جمع کراسکتے ہیں، بشرطیکہ ہر درخواست میں شامل انوائسز مذکورہ پابندیوں کے زمرے میں نہ آتی ہوں۔

ایک مثال

فرض کریں کہ ایک دکان دار لیپ ٹاپ کی الیکٹرانک سیلز ٹیکس انوائس جاری کرتا ہے، لیکن بعد میں اسے پتا چلتا ہے کہ فروخت کی رقم، سیلز ٹیکس کی رقم یا انوائس کی دیگر تفصیلات غلط درج ہوگئی ہیں۔ اگر اس غلطی کا پتا پانچ دن بعد چلتا ہے تو ٹیکس دہندہ عام 72 گھنٹے کی سہولت استعمال نہیں کرسکے گا۔

نئے طریقہ کار کے تحت ٹیکس دہندہ آئی آر آئی ایس کے ذریعے اہل انوائس میں ترمیم کے لیے درخواست دے سکتا ہے، معاون دستاویزات منسلک کرسکتا ہے اور کمشنر کی منظوری حاصل کرسکتا ہے۔ اگر کوئی انوائس غلطی سے جاری ہوگئی ہو تو ٹیکس دہندہ اسے منسوخ کرنے کے لیے بھی درخواست دے سکتا ہے۔

تاہم، انوائس میں تبدیلی یا اس کی منسوخی خودکار طور پر نہیں ہوگی۔ اس کا اطلاق صرف اسی صورت میں ممکن ہوگا جب متعلقہ ٹیکس حکام درخواست کا جائزہ لینے کے بعد اسے منظور کریں گے۔

مذکورہ مضمون بزنس ریکارڈر (ڈیجیٹل) کے ہیڈ آف پولیٹکس ڈیسک بصیر احمد کی جانب سے تحریر کیا گیا ہے۔

خبر رساں ادارے اے ایف پی کے مطابق عینی شاہدین نے بتایا کہ کنگ عبداللہ فنانشل ڈسٹرکٹ (کے اے ایف ڈی) میں واقع آرامکو ٹاور کی عمارت کے کئی حصوں کو نقصان پہنچا اور اس کے شیشے ٹوٹ گئے۔

حوثیوں نے اپنے بیان میں دعویٰ کیا کہ انہوں نے بیلسٹک اور کروز میزائلوں سمیت ڈرونز کے ذریعے چار فوجی کارروائیاں کیں، جن میں ریاض کا مالیاتی مرکز، ہوائی اڈہ، آرامکو کے تیل ذخیرہ کرنے کے مراکز اور مشرقی شہر ابقیق کو نشانہ بنایا گیا۔

سعودی وزارت توانائی نے تصدیق کی کہ ریاض میں سعودی آرامکو کی ایک انتظامی عمارت پر حملے کی کوشش کی گئی، جس کے نتیجے میں گرنے والے ملبے سے عمارت کو معمولی نقصان پہنچا، تاہم کوئی جانی نقصان نہیں ہوا۔

دوسری جانب سعودی اتحاد کے ترجمان ترکی المالکی نے کہا کہ یمن کے علاقے صعدہ میں حوثیوں کے دو بیلسٹک میزائل لانچرز تباہ کردیے گئے ہیں۔

واضح رہے کہ یمن میں 2022 میں قائم ہونے والی جنگ بندی جولائی میں ختم ہوگئی تھی، جس کے بعد سعودی عرب اور حوثیوں کے درمیان حملوں کا سلسلہ دوبارہ شروع ہوگیا۔ اقوام متحدہ کے مطابق لڑائی دوبارہ شروع ہونے کے بعد یمن میں 1,600 سے زائد افراد ہلاک اور 3 لاکھ سے زیادہ بے گھر ہوچکے ہیں۔

اتوار کو سی این این کو انٹرویو دیتے ہوئے ٹرمپ نے کہا کہ امریکا نے ایران کو پہلے ہی شدید نقصان پہنچایا ہے، تاہم اگر ضرورت پڑی تو دوبارہ حملے کیے جاسکتے ہیں۔ ان کا کہنا تھا کہ ایران کے ساتھ دوبارہ جنگ کا فیصلہ اس بات پر منحصر ہوگا کہ آیا تہران امریکا کی شرائط پر ایک مضبوط معاہدے پر دستخط کرتا ہے یا نہیں۔

ٹرمپ نے دعویٰ کیا کہ ایران شدید معاشی دباؤ کا شکار ہے اور اس کی معیشت زوال پذیر ہے۔ ان کے مطابق ایران میں مہنگائی کی شرح 301 فیصد تک پہنچ چکی ہے اور امریکی فوجی کارروائیوں نے اسے مزید کمزور کردیا ہے۔

دوسری جانب ایرانی وزیر خارجہ عباس عراقچی نے اتوار کو سرکاری ٹیلی ویژن سے گفتگو کرتے ہوئے کہا کہ امن مذاکرات فی الحال رک گئے ہیں کیونکہ امریکی انتخابات میں ڈیموکریٹک پارٹی کی بڑی کامیابی کے سیاسی اثرات کا جائزہ لیا جارہا ہے۔

عباس عراقچی کے مطابق ثالثوں کی گزشتہ چند روز سے آمدورفت بھی بند ہے۔

ادھر ایران آبنائے ہرمز کے ذریعے بحری آمدورفت جزوی طور پر بدستور روک رہا ہے، جس سے خلیجی خطے سے تیل کی فراہمی متاثر ہوئی ہے۔ اس صورتحال کے نتیجے میں امریکا میں پٹرول کی قیمتوں میں اضافہ ہوا ہے، جس نے ایران کے ساتھ جنگ کی مخالفت میں مزید اضافہ کیا ہے۔

ٹرمپ نے ہفتے کو اپنے سوشل میڈیا پلیٹ فارم ٹروتھ سوشل پر جاری بیان میں ڈانا وائٹ کو ایک پرتشدد فائٹر اور جنگجو قرار دیا۔

انہوں نے یو ایف سی کے موجودہ اور سابق چھ چیمپئنز کو بھی ڈانا وائٹ کے ساتھ شامل ہونے کی دعوت دی، جن میں روس کے علاقے داغستان سے تعلق رکھنے والے اسلام ماخاچیف اور حبیب نورماگومیدوف، امریکی فائٹرز جسٹن گیتھجے، ڈینیئل کورمیئر اور کائلا ہیریسن، جبکہ برازیل میں پیدا ہونے والی امانڈا نونیز شامل ہیں۔

ٹرمپ نے کہا کہ ان افراد کی ضرورت ہے تاکہ امریکا کو بائیں بازو کے انتہا پسندوں سے محفوظ رکھا جاسکے۔

ڈانا وائٹ نے ہفتے کو لندن میں ایک باکسنگ ایونٹ کے بعد پریس کانفرنس میں بتایا کہ وہ پیر کو وائٹ ہاؤس میں صدر ٹرمپ سے ملاقات کریں گے۔

وائٹ ہاؤس میں پریس سیکریٹری کا عہدہ گزشتہ ماہ کیٹی زکریا کی ایک ہفتے سے بھی کم مدت کے بعد رخصتی سے خالی ہے۔

ٹرمپ اور ڈانا وائٹ کے تعلقات 2000 کی دہائی کے آغاز سے ہیں، تاہم 2016 میں وائٹ کی جانب سے ٹرمپ کی صدارتی مہم کی حمایت کے بعد دونوں مزید قریب آگئے۔

یہ فیصلہ وزیراعظم کی زیر صدارت اعلیٰ سطح کے اجلاس میں کیا گیا، جس میں دونوں اسکیموں پر عمل درآمد اور ملک بھر میں نوجوانوں کو مالی معاونت کی فراہمی سے متعلق پیش رفت کا جائزہ لیا گیا۔

وزیراعظم نے متعلقہ حکام کو ہدایت کی کہ نوجوانوں کو آسان اقساط پر قرض فراہم کیا جائے تاکہ وہ مالی مشکلات کے بغیر اپنے کاروبار قائم اور وسعت دے سکیں اور زرعی سرگرمیوں میں حصہ لے سکیں۔

اجلاس کو بتایا گیا کہ رواں مالی سال کے دوران ان اسکیموں کے تحت نوجوانوں کو قرض فراہم کرنے کے لیے مجموعی طور پر 292 ارب روپے مختص کیے گئے ہیں، جبکہ مالی سال 27-2026 کے دوران تقریباً 2 لاکھ 66 ہزار 700 نوجوان اس پروگرام سے مستفید ہوں گے۔

اجلاس کو مزید بتایا گیا کہ جنوری 2023 سے اب تک 5 لاکھ 81 ہزار 341 نوجوانوں کو قرض فراہم کیا جاچکا ہے، جو گزشتہ ایک دہائی کے دوران مستفید ہونے والے افراد کی تعداد سے 10 گنا زیادہ ہے۔ اس پروگرام کے تحت اب تک 313 ارب 90 کروڑ روپے کے قرضے تقسیم کیے جاچکے ہیں۔

وزیراعظم نے ہدایت کی کہ پروگرام کے تحت مجموعی قرضوں کا 30 فیصد خواتین کے لیے مختص کیا جائے تاکہ ان کی معاشی خودمختاری اور کاروباری سرگرمیوں میں شمولیت کو فروغ دیا جاسکے۔

انہوں نے قرض حاصل کرنے کے لیے کم از کم عمر کی حد بھی 21 سال سے کم کرکے 18 سال کرنے کا حکم دیا، تاکہ نوجوان کم عمری میں کاروبار شروع کرسکیں اور زرعی منصوبوں میں حصہ لے سکیں۔

وزیراعظم نے اسمال اینڈ میڈیم انٹرپرائزز ڈیولپمنٹ اتھارٹی (سمیڈا) کو ہدایت کی کہ نوجوان درخواست گزاروں کو کاروبار کے قیام، مشاورت، تکنیکی معاونت اور دیگر ضروری رہنمائی فراہم کی جائے۔

انہوں نے نوجوانوں میں قرض اسکیموں سے متعلق آگاہی کے لیے ملک گیر مہم شروع کرنے کی بھی ہدایت کی تاکہ زیادہ سے زیادہ اہل نوجوان ان سہولیات سے فائدہ اٹھا سکیں۔

شہباز شریف نے کہا کہ نوجوان پاکستان کا قیمتی اثاثہ ہیں اور حکومت انہیں بااختیار بنانے، روزگار کے مواقع فراہم کرنے اور ان کی صلاحیتوں سے بھرپور استفادہ کرنے کے لیے پرعزم ہے۔ ان کا کہنا تھا کہ نوجوان کاروباری افراد اور زرعی منصوبوں کی معاونت قومی معیشت کے استحکام، روزگار کی فراہمی اور پائیدار معاشی ترقی کے لیے ضروری ہے۔

اجلاس میں وزیر خزانہ سینیٹر محمد اورنگزیب، وزیراعظم کے معاون خصوصی برائے امور نوجوانان رانا مشہود احمد خان اور معاون خصوصی برائے سیاسی امور طلحہ برکی نے شرکت کی۔

کاپی رائٹ بزنس ریکارڈر، 2026

وزارت اقتصادی امور کے سیکریٹری محمد حمیر کریم کے نام عالمی بینک کے خط کے مطابق، یکم جولائی 2026 کو پریکٹس منیجر کا عہدہ سنبھالنے کے بعد معیز شریف کا یہ پاکستان کا پہلا دورہ ہوگا۔

دورے کے دوران عالمی بینک کا وفد اعلیٰ حکومتی حکام اور توانائی کے شعبے سے متعلق اہم اداروں کے نمائندوں سے ملاقاتیں کرے گا، جن میں جاری تعاون اور توانائی کے شعبے کے منصوبوں سے متعلق امور کا جائزہ لیا جائے گا۔

وفد میں انرجی پروگرام کوآرڈینیٹر اور سینئر انرجی اسپیشلسٹ محمد انیس، مشیر حسام بیدیس، سینئر انرجی اسپیشلسٹس کی ہانگ ٹران، گن جن گوتم، وقاص ادریس اور انرجی اسپیشلسٹ مناہل رضا شامل ہوں گے۔

پروگرام کا آغاز 9 نومبر کو اسلام آباد میں عالمی بینک کے اندرونی اجلاسوں سے ہوگا، جس کے بعد وفد 10 نومبر کو لاہور کا دورہ کرے گا۔

لاہور میں وفد نیشنل گرڈ کمپنی (این جی سی) کے منیجنگ ڈائریکٹر سے ملاقات کرے گا۔ اس کے بعد واٹر اینڈ پاور ڈویلپمنٹ اتھارٹی (واپڈا) کے چیئرمین سے واپڈا ہاؤس میں ملاقات طے ہے۔

شیڈول میں کان کنی کے حوالے سے سی ڈی/سی ایم یو کے ساتھ آن لائن اجلاس بھی شامل ہے، جس کے بعد وفد اسلام آباد واپس آجائے گا۔ 11 نومبر کو عالمی بینک کی ٹیم وزارت توانائی (پاور ڈویژن) میں سیکریٹری پاور سے ملاقات کرے گی۔

وفد وزارت توانائی (پیٹرولیم ڈویژن) کے سیکریٹری پیٹرولیم سے بھی ملاقات کرے گا۔ ایشیائی ترقیاتی بینک اور انٹرنیشنل فنانس کارپوریشن (آئی ایف سی) کے ساتھ اجلاس دوپہر کے وقت عالمی بینک کے دفتر میں ہوں گے۔

12 نومبر کو وفد صبح پاکستان منرلز انویسٹمنٹ فورم میں شرکت کرے گا، جبکہ خیبر پختونخوا انرجی ڈیولپمنٹ آرگنائزیشن (پیڈو) اور نیشنل انرجی ایفیشنسی اینڈ کنزرویشن اتھارٹی (نیکا) کے ساتھ ملاقاتیں بھی پروگرام میں شامل ہیں۔

پیڈو کے ساتھ اجلاس عالمی بینک کے دفتر میں ہوگا، جبکہ توانائی کی بچت کے حوالے سے نیکا کے قائم مقام منیجنگ ڈائریکٹر سے ملاقات ان کے دفتر میں طے ہے۔

عالمی بینک کی ٹیم کوہسار بلاک میں سیکریٹری نجکاری کمیشن اور سیکریٹری اقتصادی امور ڈویژن سے بھی ملاقات کرے گی۔

شام کے وقت ایشیائی انفرااسٹرکچر انویسٹمنٹ بینک (اے آئی آئی بی) اور اسلامی ترقیاتی بینک (آئی ایس ڈی بی) کے ساتھ آن لائن اجلاس بھی شیڈول ہے۔

وفد 13 نومبر کو اسلام آباد سے روانہ ہوگا۔

کاپی رائٹ: بزنس ریکارڈر، 2026