مشرق وسطیٰ میں جنگ: تازہ ترین صورتحال

مشرق وسطیٰ میں جاری جنگ کے دوران جمعرات کو اہم پیش رفت سامنے آئی ہیں، جنہوں نے خطے میں کشیدگی کو مزید بڑھا دیا ہے۔ لبنان کی مزاحمتی تنظیم حزب اللہ نے دعویٰ کیا ہے کہ اس کے جنگجوؤں نے شمالی اسرائیل میں فوجی اہداف اور ایک گاؤں کو نشانہ بناتے ہوئے ڈرونز اور راکٹ حملے کیے۔ اسرائیلی فوج کے مطابق سرحدی علاقوں میں سائرن بجائے گئے، تاہم فوری طور پر کسی جانی یا مالی نقصان کی اطلاع نہیں ملی۔

دوسری جانب اسرائیل نے کہا ہے کہ اس کے فضائی دفاعی نظام نے ایران کی جانب سے داغے گئے میزائلوں کی لہروں کو ناکام بنایا۔ جبکہ ایران کے ایک حملے کے بعد وسطی اسرائیل میں متعدد مقامات پر میزائل گرنے کی اطلاعات ملیں جبکہ میڈیا رپورٹس کے مطابق کم از کم چار افراد معمولی زخمی ہوئے۔

ادھر امریکی صدر ڈونلڈ ٹرمپ کے بیان کے بعد عالمی منڈی میں تیل کی قیمتوں میں نمایاں اضافہ دیکھا گیا۔ برینٹ خام تیل تقریباً 7 فیصد بڑھ کر 108 ڈالر فی بیرل سے تجاوز کر گیا جبکہ ویسٹ ٹیکساس انٹرمیڈیٹ بھی 105 ڈالر سے اوپر چلا گیا۔ ٹرمپ نے اعلان کیا کہ امریکہ آئندہ دو سے تین ہفتوں تک ایران پر سخت حملے جاری رکھے گا۔

آسٹریلیا کے وزیراعظم نے کہا کہ جنگ کے ابتدائی اہداف حاصل ہو چکے ہیں لیکن اس کا اختتام ابھی واضح نہیں، اور طویل جنگ عالمی معیشت پر منفی اثرات ڈالے گی۔

متحدہ عرب امارات کی وزارت دفاع کے مطابق ملک کے فضائی دفاعی نظام نے میزائل اور ڈرون خطرات کا جواب دیا، جبکہ ایران نے امریکی مطالبات کو غیر منطقی قرار دیتے ہوئے کہا کہ جنگ بندی پر کوئی براہ راست مذاکرات جاری نہیں ہیں، اگرچہ پاکستان سمیت ثالثوں کے ذریعے پیغامات کا تبادلہ ہوا ہے۔

عالمی بینک نے خبردار کیا ہے کہ یہ تنازع مہنگائی، روزگار اور غذائی تحفظ پر سنگین اثرات ڈال سکتا ہے۔ اسرائیل میں میزائل حملوں کے نتیجے میں 14 افراد زخمی ہوئے، جن میں ایک بچی بھی شامل ہے۔

ایران کے صدر نے امریکہ پر جنگی جرائم کے الزامات عائد کرتے ہوئے سوال اٹھایا کہ آیا یہ جنگ واقعی امریکی مفادات کے لیے ہے۔ دریں اثنا ایرانی پاسداران انقلاب نے کہا ہے کہ آبنائے ہرمز دشمنوں کے لیے بند رہے گی، جس سے عالمی تجارت کو مزید خطرات لاحق ہو سکتے ہیں۔