اسٹاک ایکسچینج میں خریداری کا رجحان، انڈیکس 350 سے زائد پوائنٹس بڑھ گیا

پاکستان اسٹاک ایکسچینج (پی ایس ایکس) میں بدھ کو خریداری کا رجحان دیکھا گیا اور بینچ مارک کے ایس ای 100 انڈیکس 350 سے زائد پوائنٹس کے اضافے کے ساتھ بند ہوا۔

کاروبار کے آغاز میں بینچ مارک انڈیکس میں تیزی دیکھی گئی اور یہ دورانِ کاروبار کی بلند ترین سطح 171,492.52 پوائنٹس تک پہنچ گیا، جس سے خریداری کے مضبوط رجحان کی عکاسی ہوئی۔

تاہم کاروبار آگے بڑھنے کے ساتھ ابتدائی تیزی بتدریج کم ہوگئی اور دوپہر تک انڈیکس 171,000 پوائنٹس کی سطح کے آس پاس محدود رہا، جس کے بعد ایک بار پھر فروخت کا دباؤ بڑھ گیا۔

کاروبار کے دوسرے نصف حصے میں بھی مارکیٹ دباؤ کا شکار رہی اور کے ایس ای 100 انڈیکس مسلسل گرتے ہوئے اختتامی مرحلے میں دورانِ کاروبار کی کم ترین سطح 169,872.13 پوائنٹس تک پہنچ گیا۔

کاروبار کے اختتام پر بینچ مارک انڈیکس 368.92 پوائنٹس یا 0.22 فیصد اضافے سے 169,969.32 پوائنٹس پر بند ہوا۔

بروکریج ہاؤس ٹاپ لائن سیکیورٹیز نے اپنی پوسٹ مارکیٹ رپورٹ میں بتایا کہ انڈیکس میں مثبت کردار ادا کرنے والی نمایاں کمپنیوں میں ایچ بی ایل، ایم ای بی ایل، لکی سیمنٹ، فاطمہ اور ایف ایف سی شامل رہیں، جنہوں نے مجموعی طور پر انڈیکس میں 311 پوائنٹس کا اضافہ کیا۔

رپورٹ میں کہا گیا کہ منتخب حصص میں خریداری کے باعث کے ایس ای 100 انڈیکس دورانِ کاروبار 1.12 فیصد تک بڑھا، تاہم منافع کے حصول اور امریکا ایران تنازع سے پیدا ہونے والے جغرافیائی سیاسی خدشات کے باعث بیشتر تیزی ختم ہوگئی۔ انڈیکس 0.22 فیصد یومیہ اضافے سے 169,969 پوائنٹس پر بند ہوا۔

ایک اہم پیش رفت میں وزارت خزانہ نے منگل کو پاکستان کے مقامی کرنسی بانڈ مارکیٹ (ایل سی بی ایم) کے لیے ایک اسٹریٹجک ایکشن پلان پیش کیا۔ یہ منصوبہ آئی ایم ایف کے تعاون سے جاری پروگرام کے تحت پاکستان کے اس عزم کا حصہ ہے جس کا مقصد مارکیٹ میں موجود رکاوٹوں کو دور کرنا ہے جبکہ ثانوی مارکیٹ میں زیادہ گہرائی اور لیکویڈیٹی، سرمایہ کاروں کے وسیع تر دائرے، حکومت کی جانب سے زیادہ قابلِ پیش گوئی قرض گیری اور روپے میں جاری ہونے والی سیکیورٹیز سے متعلق قانونی، ٹیکس اور مالیاتی مارکیٹ کے بنیادی ڈھانچے میں اصلاحات کرنا ہے۔

منگل کو اسٹاک ایکسچینج میں فروخت کا دباؤ دیکھا گیا کیونکہ عالمی سطح پر خام تیل کی بڑھتی ہوئی قیمتوں اور مشرق وسطیٰ میں مسلسل جغرافیائی سیاسی کشیدگی نے کاروبار کے اختتامی مرحلے میں فروخت کا رجحان بڑھا دیا،جس کے نتیجے میں بینچ مارک کے ایس ای 100 انڈیکس 170,000 پوائنٹس کی سطح سے نیچے آگیا۔ گزشتہ روز انڈیکس 825.22 پوائنٹس یا 0.48 فیصد کی کم سے 169,600.41 پوائنٹس پر بند ہوا۔

عالمی سطح پر بدھ کو عالمی بانڈ مارکیٹوں میں اتار چڑھاؤ دیکھا گیا اور وہ کئی برسوں میں اپنی بدترین ماہانہ کارکردگی کی جانب گامزن تھیں۔ اس کی وجہ حکومتی مالیات کی بگڑتی صورتحال، بانڈز کے اجرا کی بھرمار اور بڑھتی ہوئی مہنگائی کا ایک مشکل امتزاج ہے، جبکہ ایران کے خلاف سات ماہ سے جاری امریکی۔اسرائیلی جنگ کے باعث توانائی کی لاگت بلند سطح پر برقرار ہے۔

دریں اثنا اسٹاک مارکیٹوں کی کارکردگی نسبتاً بہتر رہی، جو بڑی حد تک بانڈ ییلڈز میں اضافے سے متاثر نہیں ہوئیں، جبکہ ایشیائی مارکیٹوں میں مثبت رجحان دیکھا گیا۔

قرض لینے کی لاگت میں اضافہ سرمایہ کاروں کی توجہ کا مرکز رہا ہے، کیونکہ خودمختار بانڈز کی ییلڈز عالمی مارکیٹوں کے لیے ایک بنیادی حوالہ، زیادہ خطرے والے حصص میں سرمایہ کاری کے لیے ایک ریفرنس قیمت اور رہن و کارپوریٹ قرض گیری کے لیے ایک بینچ مارک کا کردار ادا کرتی ہیں۔

اگرچہ مستقل طور پر بلند خطرے سے پاک شرح کمپنیاں کے لیے قرضوں کی ری فنانسنگ کی لاگت بڑھاتی ہے اور اقتصادی نمو پر دباؤ ڈالتی ہے، تاہم اب تک اس کے اسٹاکس پر اثرات نسبتاً محدود رہے ہیں۔

ایم ایس سی آئی کا جاپان کے علاوہ ایشیا بحرالکاہل کے حصص کا وسیع ترین انڈیکس ابتدائی کاروبار میں 0.2 فیصد بڑھ گیا اور رواں ماہ صرف 1 فیصد سے کچھ زیادہ کمی کے ساتھ اختتام کی جانب گامزن تھا۔

جاپان کا نکیئی 0.9 فیصد بڑھا اور رواں ماہ معمولی تبدیلی کے ساتھ اختتام پذیر ہونے کی جانب گامزن تھا، جبکہ جنوبی کوریا کا کوسپی ماہانہ بنیاد پر 1.4 فیصد اضافے کی جانب بڑھ رہا تھا۔

دریں اثنا پاکستانی روپے نے بدھ کو انٹربینک مارکیٹ میں امریکی ڈالر کے مقابلے میں معمولی بہتری کا سلسلہ جاری رکھا۔ مقامی کرنسی ایک پیسے کے اضافے سے 277.11 روپے فی ڈالر پر بند ہوئی۔

آل شیئر انڈیکس میں کاروباری حجم گزشتہ سیشن کے 568.04 ملین کے مقابلے میں بڑھ کر 591.23 ملین حصص ہوگیا۔

حصص کی مالیت گزشتہ سیشن کے 20.81 ارب روپے کے مقابلے میں کم ہوکر 20.19 ارب روپے رہی۔

پاک انٹرنیشنل بلک 73.45 ملین حصص کے کاروبار کے ساتھ حجم کے لحاظ سے سرفہرست رہی، اس کے بعد کوہِ نور اسپننگ کے 58.39 ملین اور تصدیق انفارمیشن کے 50.88 ملین حصص کا کاروبار ہوا۔

بدھ کو 495 کمپنیوں کے حصص میں کاروبار ہوا، جن میں 253 کے حصص کی قیمتوں میں اضافہ، 195 میں کمی جبکہ 47 کمپنیوں کے حصص کی قیمتیں مستحکم رہیں۔