امریکی صدر ڈونلڈ ٹرمپ جنگ خاتمے کی ایرانی نئی تجویز سے ناخوش

امریکہ اور ایران کے درمیان دو ماہ سے جاری جنگ کے خاتمے کی کوششیں ایک بار پھر تعطل کا شکار ہو گئی ہیں، جس کے باعث نہ صرف توانائی کی فراہمی متاثر ہو رہی ہے بلکہ عالمی مہنگائی میں بھی اضافہ دیکھا جا رہا ہے۔ ایک امریکی عہدیدار کے مطابق امریکی صدر ڈونلڈ ٹرمپ ایران کی تازہ پیشکش سے ناخوش ہیں، جس سے تنازع کے حل کی امیدیں مزید کمزور پڑ گئی ہیں۔

ایرانی تجویز میں کہا گیا ہے کہ جوہری پروگرام پر بات چیت جنگ بندی اور خلیج سے جہاز رانی کے تنازعات کے حل کے بعد کی جائے گی، تاہم امریکہ کا مؤقف ہے کہ جوہری معاملہ ابتدا ہی سے مذاکرات کا حصہ ہونا چاہیے۔ اسی اختلاف کے باعث فریقین کے درمیان ڈیڈلاک برقرار ہے۔

وائٹ ہاؤس کی ترجمان اولیویا ویلز نے کہا ہے کہ امریکہ میڈیا کے ذریعے مذاکرات نہیں کرے گا اور اپنی سرخ لکیریں واضح کر چکا ہے۔ یاد رہے کہ 2015 کا جوہری معاہدہ، جس میں امریکہ سمیت کئی ممالک شامل تھے، ٹرمپ کے پہلے دورِ صدارت میں ختم ہو گیا تھا۔

ادھر ایران کے وزیر خارجہ عباس عراقچی نے خطے کے مختلف ممالک کے دورے کیے، جن میں پاکستان، عمان اور روس شامل ہیں۔ روس میں انہوں نے صدر ولادیمیر پیوٹن سے ملاقات کی اور حمایت حاصل کی۔

دوسری جانب جنگ کے باعث آبنائے ہرمز میں جہاز رانی شدید متاثر ہوئی ہے۔ حالیہ دنوں میں کم از کم چھ ایرانی آئل ٹینکرز کو امریکی ناکہ بندی کے باعث واپس لوٹنا پڑا، جبکہ عام حالات میں روزانہ 125 سے 140 جہاز اس گزرگاہ سے گزرتے تھے، مگر اب یہ تعداد انتہائی کم ہو گئی ہے۔

ماہرین کے مطابق تیل کی ترسیل میں رکاوٹ کے باعث قیمتوں میں مسلسل اضافہ ہو رہا ہے اور صورتحال میں بہتری فوری طور پر ممکن نظر نہیں آتی۔