جنگ بندی کا خاتمہ قریب، امریکا ایران سے معاہدے کیلئے پرامید

امریکا نے پاکستان میں ایران کے ساتھ امن مذاکرات کے انعقاد پر اعتماد ظاہر کیا ہے، جبکہ ایک سینئر ایرانی عہدیدار نے کہا ہے کہ تہران مذاکرات میں شرکت پر غور کر رہا ہے، تاہم جنگ بندی کے خاتمے کے قریب آتے ہی اہم رکاوٹیں اور غیر یقینی صورتحال برقرار ہے۔

امریکی صدر ڈونلڈ ٹرمپ چاہتے ہیں کہ ایسا معاہدہ ہو جس سے تیل کی قیمتوں میں مزید اضافہ اور عالمی اسٹاک مارکیٹ میں جھٹکوں کو روکا جا سکے، لیکن ان کا مؤقف ہے کہ ایران کو جوہری ہتھیار بنانے کی صلاحیت نہیں دی جا سکتی۔

ایرانی حکام کے مطابق تہران آبنائے ہرمز پر اپنے کنٹرول کو استعمال کرتے ہوئے ایسا معاہدہ چاہتا ہے جو جنگ کے دوبارہ آغاز کو روکے، پابندیوں میں نرمی لائے لیکن اس کے جوہری پروگرام کو متاثر نہ کرے۔

ایک پاکستانی ذریعے نے بتایا کہ بدھ کو مذاکرات کے دوبارہ آغاز کا امکان ہے اور ٹرمپ براہِ راست یا آن لائن شرکت کر سکتے ہیں۔

ادھر تیل کی قیمتیں ابتدائی ایشیائی تجارت میں گر گئیں، برینٹ کروڈ 0.6 فیصد کمی کے ساتھ 94.94 ڈالر فی بیرل جبکہ ڈبلیو ٹی آئی 1.2 فیصد کمی کے ساتھ 88.50 ڈالر پر آ گیا۔

تاہم کشیدگی برقرار ہے کیونکہ ایران نے امریکا پر اپنے تجارتی جہاز پر حملے کا الزام لگایا ہے، جبکہ امریکا نے کہا ہے کہ جہاز نے پابندیوں کی خلاف ورزی کی۔ مذاکرات کے باوجود خطے میں صورتحال بدستور غیر یقینی ہے۔