ایران نے امریکا سے مذاکرات کی تردید کردی

امریکہ کے صدر ڈونلڈ ٹرمپ کی جانب سے ایران کے ساتھ مثبت بات چیت کا دعویٰ کرنے کے بعد ایران نے پیر کے روز اس بات کی سختی سے تردید کر دی کہ اس نے امریکہ کے ساتھ کسی قسم کے مذاکرات کیے ہیں۔ ٹرمپ نے اس سے قبل ایران کے بجلی کے نظام پر حملے کی دھمکی دی تھی، تاہم انہوں نے کہا کہ ایرانی حکام کے ساتھ مفید بات چیت کے باعث یہ منصوبہ پانچ دن کے لیے مؤخر کر دیا گیا ہے۔

ایک یورپی عہدیدار کے مطابق دونوں ممالک کے درمیان براہ راست مذاکرات نہیں ہوئے، تاہم مصر، پاکستان اور خلیجی ریاستیں پیغامات کے تبادلے میں ثالثی کا کردار ادا کر رہی ہیں۔ ذرائع کے مطابق جنگ کے خاتمے کے حوالے سے براہ راست مذاکرات رواں ہفتے اسلام آباد میں بھی ہو سکتے ہیں۔ اس حوالے سے ٹرمپ نے اپنے سوشل میڈیا پلیٹ فارم پر کہا کہ مشرق وسطیٰ میں کشیدگی کے مکمل خاتمے کے لیے امریکہ اور ایران کے درمیان انتہائی مثبت گفتگو ہوئی ہے۔

ٹرمپ نے مزید بتایا کہ ان کے خصوصی ایلچی اسٹیو وٹکوف اور داماد جیرڈ کشنر نے اتوار کی شام ایک اعلیٰ ایرانی عہدیدار کے ساتھ تفصیلی گفتگو کی اور یہ رابطے پیر کو بھی جاری رہیں گے۔ بعد ازاں ٹرمپ نے صحافیوں سے گفتگو میں کہا کہ دونوں فریق کئی اہم نکات پر تقریباً اتفاق کے قریب ہیں۔

تاہم ایران کی پارلیمنٹ کے اسپیکر محمد باقر قالیباف نے اس دعوے کو مسترد کرتے ہوئے اسے جعلی خبر قرار دیا اور کہا کہ امریکہ اور اسرائیل مالی اور تیل کی منڈیوں پر اثر انداز ہونے کے لیے اس طرح کی اطلاعات پھیلا رہے ہیں۔

دوسری جانب ایران کی پاسدارانِ انقلاب فورس نے اعلان کیا کہ اس نے امریکی اہداف کے خلاف نئے حملے شروع کیے ہیں اور اسرائیل کے کئی شہروں پر میزائل داغے ہیں۔ اسرائیلی فوج کے مطابق ایران سے داغے گئے میزائلوں کا پتہ چلایا گیا اور یروشلم میں کم از کم ایک میزائل کو فضا میں ہی تباہ کر دیا گیا۔

ادھر اسرائیلی وزیر اعظم بنیامین نیتن یاہو نے کہا کہ انہوں نے ڈونلڈ ٹرمپ سے گفتگو کی ہے اور اسرائیل لبنان اور ایران میں اپنی فوجی کارروائیاں جاری رکھے گا۔ ان کا کہنا تھا کہ اگر کوئی معاہدہ ہوتا ہے تو وہ اسرائیل کے اہم مفادات کو محفوظ بنائے گا۔ جنگ کے باعث اب تک 2,000 سے زیادہ افراد ہلاک ہو چکے ہیں جبکہ توانائی کی عالمی منڈیوں میں بھی شدید اتار چڑھاؤ دیکھنے میں آ رہا ہے۔