ایران نے امریکہ کو جواب نہیں دیا، عباس عراقچی نے مذاکرات کا امکان مسترد کردیا

ایران کے وزیر خارجہ عباس عراقچی نے کہا ہے کہ امریکہ کے ساتھ کسی قسم کے مذاکرات جاری نہیں اور تہران نے جنگ کے خاتمے کے لیے واشنگٹن کی مبینہ 15 نکاتی تجویز کا کوئی جواب نہیں دیا۔

الجزیرہ کو دیے گئے ایک انٹرویو میں انہوں نے کہا کہ امریکہ کی جانب سے پیغامات موصول ہوتے ہیں، کچھ براہ راست اور کچھ خطے کے دوست ممالک کے ذریعے، اور ضرورت پڑنے پر ان کا جواب بھی دیا جاتا ہے۔ تاہم انہوں نے واضح کیا کہ اس وقت مذاکرات کی کوئی بنیاد موجود نہیں۔

عباس عراقچی نے یہ بھی بتایا کہ کچھ پیغامات کا امریکی خصوصی نمائندے اسٹیو وٹکوف کے ساتھ براہ راست بھی تبادلہ ہوا ہے، لیکن ایران نے امریکی منصوبے کے جواب میں کوئی باضابطہ پیشکش نہیں کی۔ ان کے مطابق میڈیا میں آنے والی ایرانی جوابی تجاویز محض قیاس آرائیاں ہیں۔

یہ جنگ 28 فروری کو اس وقت شروع ہوئی تھی جب امریکہ اور اسرائیل کے حملوں میں ایران کی اعلیٰ قیادت کو نشانہ بنایا گیا، جس کے بعد تنازع پورے خطے میں پھیل گیا۔ اس دوران ترکیہ، مصر اور پاکستان کی جانب سے سفارتی کوششیں بھی شروع کی گئی ہیں تاکہ جنگ کا خاتمہ ممکن ہو سکے۔

گزشتہ ہفتے پاکستانی حکام نے ایران کو امریکی تجاویز پر مبنی 15 نکاتی منصوبہ پہنچانے کی تصدیق کی تھی، تاہم ایران نے اس کی تردید کی ہے۔

عباس عراقچی نے کہا کہ ایران کو امریکہ پر بالکل بھی اعتماد نہیں اور وہ کسی عارضی جنگ بندی کے بجائے جنگ کے مکمل خاتمے اور نقصانات کے ازالے کا مطالبہ کرتا ہے۔

انہوں نے خبردار کیا کہ اگر امریکہ نے زمینی کارروائی کی تو اسے بھاری نقصان اٹھانا پڑے گا۔ ان کے مطابق ایران اس صورتحال کے لیے تیار ہے اور کسی بھی ممکنہ پیش رفت پر نظر رکھے ہوئے ہے۔