خلیجی ممالک کو غذائی اشیا برآمد کرنے کا منصوبہ تیار کیا جائے، وزیراعظم

وزیراعظم محمد شہباز شریف نے اتوار کے روز حکام کو ہدایت کی ہے کہ غذائی اشیا کی طلب اور رسد کی مکمل نگرانی یقینی بنائی جائے تاکہ قومی سطح پر خوراک کی ضروریات کا تحفظ کیا جا سکے۔

بدلتی ہوئی علاقائی صورتحال کے تناظر میں ملک کی غذائی صورتحال اور زائد غذائی اشیا کی برآمدات کا جائزہ لینے کے لیے منعقدہ اجلاس کی صدارت کرتے ہوئے وزیراعظم کو بریفنگ دی گئی کہ پاکستان میں اس وقت خوراک کی تمام بنیادی اشیا کے وافر ذخائر موجود ہیں اور ملک میں کسی بھی ضروری شے کی کمی نہیں ہے۔

وزیراعظم نے کہا کہ عالمی سپلائی چین میں رکاوٹوں کے باعث علاقائی منڈیوں میں پاکستانی مصنوعات کے لیے نئے مواقع پیدا ہوئے ہیں۔ انہوں نے ہدایت کی کہ خلیجی ممالک کی غذائی ضروریات پوری کرنے پر خصوصی توجہ دی جائے جبکہ ملکی غذائی تحفظ کو بھی یقینی بنایا جائے۔

شہباز شریف نے متعلقہ حکام کو ہدایت کی کہ زائد غذائی اشیا کو خلیجی ممالک برآمد کرنے کے لیے جامع حکمت عملی تیار کی جائے تاکہ ملکی ضروریات متاثر ہوئے بغیر برآمدات میں اضافہ کیا جا سکے۔ انہوں نے اس بات پر بھی زور دیا کہ دوست خلیجی ریاستوں کو برآمد کی جانے والی غذائی مصنوعات کے معیار کو یقینی بنایا جائے۔

وزیراعظم نے پاکستان نیشنل شپنگ کارپوریشن کو ہدایت کی کہ سمندری راستوں کے ذریعے خلیجی ممالک کو غذائی اشیا کی برآمدات میں سہولت فراہم کرنے کے لیے ضروری اقدامات کیے جائیں۔

اجلاس کو ملک میں مختلف غذائی اشیا کے موجودہ ذخائر اور پیداوار کے بارے میں بھی آگاہ کیا گیا۔ حکام نے بتایا کہ پاکستان کا زرعی شعبہ، جس میں فصلیں، گوشت، پولٹری، ڈیری اور سمندری خوراک شامل ہیں، برآمدات کے حوالے سے نمایاں صلاحیت رکھتا ہے۔

وزیراعظم نے صورتحال کا روزانہ جائزہ لینے کے لیے ایک کمیٹی قائم کرنے کی ہدایت بھی کی۔ انہوں نے خلیجی ممالک میں تعینات پاکستان کے سفیروں اور تجارتی افسران کو بھی ہدایت دی کہ وہ برآمدات کے فروغ کے لیے فعال کردار ادا کریں۔

اجلاس میں نائب وزیراعظم اور وزیر خارجہ اسحاق ڈار، وفاقی وزرا جام کمال خان، رانا تنویر حسین اور احسن اقبال، وزیراعظم کے معاون خصوصی ہارون اختر، اعلیٰ حکام، صوبائی چیف سیکریٹریز اور متعلقہ نجی تنظیموں کے نمائندوں نے شرکت کی۔