ٹرمپ کا فیڈ سے شرح سود میں فوری کمی کا مطالبہ، سرمایہ کاروں کی رائے مختلف

ایران کے ساتھ جاری جنگ میں شدت اور تیل کی قیمتوں میں اضافے کے بعد جمعرات کو امریکی صدر ڈونلڈ ٹرمپ نے ایک بار پھر فیڈرل ریزرو کے چیئرمین جیروم پاول سے فوری طور پر شرح سود کم کرنے کا مطالبہ کیا۔

ڈونلڈ ٹرمپ نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ فیڈرل ریزرو کو فوری طور پر شرح سود میں کمی کرنی چاہیے۔ تاہم سرمایہ کاروں کا مؤقف اس کے برعکس دکھائی دیتا ہے کیونکہ ان کا خیال ہے کہ تیل کی بڑھتی ہوئی قیمتیں مہنگائی میں اضافہ کریں گی اور اس کے نتیجے میں امریکی مرکزی بینک کے لیے شرح سود کم کرنا مشکل ہو جائے گا۔

امریکہ اور اسرائیل کی جانب سے 28 فروری کو ایران کے خلاف حملوں کے آغاز کے بعد مالیاتی منڈیوں میں توقعات تبدیل ہو گئی ہیں۔ اس جنگ سے قبل سرمایہ کاروں کا اندازہ تھا کہ سال کے اختتام تک شرح سود میں کم از کم دو مرتبہ ایک چوتھائی فیصد کمی ہوگی، لیکن اب سودی فیوچر مارکیٹ صرف ایک ممکنہ کمی کا امکان ظاہر کر رہی ہے۔

اسی دوران سابق فیڈ گورنر کیون وارش کو ٹرمپ کی جانب سے آئندہ فیڈ چیئرمین کے طور پر نامزد کیے جانے کی توقع بھی زیر بحث ہے، جو ممکنہ طور پر مئی کے وسط میں جیروم پاول کی مدت ختم ہونے کے بعد امریکی مرکزی بینک کی قیادت سنبھال سکتے ہیں۔

دوسری جانب ایران کے نئے سپریم لیڈر مجتبیٰ خامنہ ای نے آبنائے ہرمز کو بند رکھنے کا عزم ظاہر کیا ہے۔ آبنائے ہرمز دنیا کے تیل کا تقریباً پانچویں حصے کی ترسیل کا اہم راستہ ہے۔ اس پیش رفت کے بعد امریکی خام تیل ویسٹ ٹیکساس انٹرمیڈیٹ کی قیمت بڑھ کر 95.70 ڈالر فی بیرل تک پہنچ گئی۔

ماہرین کے مطابق تیل کی قیمتوں میں اضافے سے پٹرول مہنگا ہوگا جس سے نقل و حمل کے اخراجات بڑھیں گے اور خوراک سمیت دیگر اشیا کی قیمتوں پر بھی اثر پڑے گا۔ تجزیہ کاروں کا کہنا ہے کہ آبنائے ہرمز کھاد کی عالمی ترسیل کا بھی اہم راستہ ہے، اس لیے زرعی لاگت اور غذائی قیمتوں میں اضافے کا خدشہ ہے۔

سرمایہ کاری بینک گولڈمین سیکس کے ماہرین کے مطابق ذاتی صارف اخراجات کے اشاریے پی سی ای کے تحت مہنگائی کی شرح دسمبر تک بڑھ کر تقریباً 2.9 فیصد تک پہنچ سکتی ہے، جبکہ انہوں نے امریکی فیڈرل ریزرو کی جانب سے شرح سود میں اگلی ممکنہ کمی کی توقع جون کے بجائے ستمبر تک مؤخر کر دی ہے۔