ہمیں جلدی نہیں، مگر وقت تیزی سے گزر رہا ہے، ٹرمپ کا ایران کو پیغام

امریکی صدر ڈونلڈ ٹرمپ نے جمعرات کو کہا ہے کہ امریکا ایران کے ساتھ جنگ کے خاتمے کے لیے کسی جلدی میں نہیں ہے، تاہم وقت تیزی سے گزر رہا ہے اور اسلامی جمہوریہ ایران کے لیے صورتحال مشکل ہو رہی ہے، جبکہ اس دوران تیسرا امریکی طیارہ بردار بحری جہاز مشرق وسطیٰ پہنچ گیا ہے۔

ایرانی میڈیا کے مطابق دارالحکومت تہران میں دھماکوں کی آوازیں سنی گئیں، جو مشرق وسطیٰ میں جاری جنگ کے بعد نازک جنگ بندی کے دو ہفتے بعد پہلی بار رپورٹ ہوئیں۔ تاہم یہ واضح نہیں ہو سکا کہ یہ دھماکے کس وجہ سے ہوئے، جبکہ ایک اسرائیلی سکیورٹی ذریعے نے اے ایف پی کو بتایا کہ اس وقت اسرائیل کی جانب سے ایران پر کوئی حملہ نہیں کیا جا رہا۔

اسی دوران آبنائے ہرمز کی صورتحال پر ایران اور امریکا کے درمیان کشیدگی برقرار ہے اور ممکنہ امن مذاکرات غیر یقینی کا شکار ہیں۔ یہ آبنائے عالمی تیل اور گیس کی ترسیل کا اہم راستہ ہے جہاں سے عالمی توانائی کا بڑا حصہ گزرتا ہے۔

امریکی صدر نے سوشل میڈیا پر کہا کہ ایران کے لیے گھڑی چل رہی ہے اور اس کی فوجی صلاحیتیں تباہ ہو چکی ہیں۔ انہوں نے ایرانی کشتیوں کو نشانہ بنانے کی ہدایت بھی دی۔

امریکی سینٹ کام کے مطابق خطے میں تین امریکی طیارہ بردار بحری جہاز موجود ہیں جبکہ امریکی بحریہ نے ایران سے منسلک ایک تیل بردار جہاز کو بھی روکا ہے۔ ایران نے آبنائے ہرمز پر اپنی گرفت مزید سخت کرنے کا اعلان کیا ہے، جس سے عالمی توانائی مارکیٹس میں بے یقینی بڑھ گئی ہے۔