مشرق وسطیٰ تنازع: سعودی، مصری، پاکستانی اور ترک وزرائے خارجہ کا اہم اجلاس آج سے اسلام آباد میں ہوگا

سفارتی محاذ پر ایک اہم پیش رفت کے طور پر پاکستان کا دارالحکومت اسلام آباد آج (اتوار) ایک اعلیٰ سطح اور نہایت اہم دو روزہ چار فریقی اجلاس کی میزبانی کرنے جا رہا ہے، جس میں پاکستان، ترکیہ، سعودی عرب اور مصر کے وزرائے خارجہ شرکت کریں گے۔ یہ اجلاس مشرق وسطیٰ میں پائیدار امن اور کشیدگی کے خاتمے کی جانب ایک اہم پیش رفت قرار دیا جا رہا ہے۔

دفتر خارجہ کے ترجمان طاہر اندرابی نے ہفتے کے روز ایک بیان میں اس کا اعلان کیا۔ عالمی برادری کی نظریں اسلام آباد پر مرکوز ہیں، جہاں پاکستان نے امریکا-اسرائیل اور ایران کے درمیان کئی ہفتوں سے جاری جنگ کے بعد مشرق وسطیٰ کے مسائل کے حل کے لیے اپنی سفارتی سرگرمیوں اور رابطوں کو تیز کر دیا ہے۔

بیان کے مطابق نائب وزیر اعظم اور وزیر خارجہ محمد اسحاق ڈار کی دعوت پر سعودی عرب کے وزیر خارجہ شہزادہ فیصل بن فرحان السعود، ترکیہ کے وزیر خارجہ ہاکان فیدان اور مصر کے وزیر خارجہ ڈاکٹر بدر عبدالعاطی 29 سے 30 مارچ 2026 تک اسلام آباد کا دورہ کریں گے۔

ترجمان کے مطابق اس دورے کے دوران وزرائے خارجہ خطے میں کشیدگی کم کرنے سمیت مختلف امور پر تفصیلی تبادلہ خیال کریں گے، جبکہ اجلاس کے بعد وہ وزیر اعظم سے بھی ملاقات کریں گے۔

انہوں نے کہا کہ پاکستان سعودی عرب، ترکیہ اور مصر کے ساتھ اپنے برادرانہ تعلقات کو بہت اہمیت دیتا ہے، اور یہ دورہ مختلف شعبوں میں باہمی تعاون کو مزید مضبوط بنانے کا موقع فراہم کرے گا۔

دوسری جانب نائب وزیر اعظم اور وزیر خارجہ اسحاق ڈار نے قطر کے وزیراعظم اور وزیر خارجہ شیخ محمد بن عبدالرحمن بن جاسم الثانی سے ٹیلیفون پر گفتگو کی۔

دونوں رہنماؤں نے علاقائی اور عالمی صورتحال پر تبادلہ خیال کیا اور فوری طور پر کشیدگی کم کرنے کی اہمیت پر زور دیا۔ قطری قیادت نے مکالمے اور سفارت کاری کے ذریعے امن کے فروغ میں پاکستان کی کوششوں کو سراہا۔

دونوں ممالک نے پاکستان اور قطر کے گہرے برادرانہ تعلقات کی توثیق کی اور باہمی رابطے جاری رکھنے پر اتفاق کیا۔

جمعہ کی رات جاری ایک بیان میں دفتر خارجہ نے کہا کہ پاکستان اور چین نے مشرق وسطیٰ کے تنازع کے خاتمے کے لیے علاقائی امن اور سفارتی کوششوں کے عزم کا اعادہ کیا ہے۔

اسحاق ڈار اور چینی وزیر خارجہ کے درمیان ٹیلیفونک گفتگو میں بیجنگ نے ایران اور امریکا کے درمیان امن مذاکرات کے آغاز کا خیر مقدم کیا اور اسے خطے کے استحکام کے لیے نہایت اہم قرار دیا۔ انہوں نے کہا کہ عالمی برادری کو دونوں فریقین کو مذاکرات کی میز پر واپس لانے کی حوصلہ افزائی کرنی چاہیے۔

چین نے کشیدگی میں کمی کے لیے پاکستان کے تعمیری کردار کو سراہتے ہوئے اس کی سفارتی کوششوں کی مکمل حمایت کا یقین دلایا۔

پاکستان اور چین کے وزرائے خارجہ نے فوری جنگ بندی، مذاکرات کی بحالی، شہریوں کے تحفظ، بحری راستوں کی سکیورٹی اور اقوام متحدہ کے منشور کے اصولوں کی پاسداری کی اہمیت پر اتفاق کیا۔

کاپی رائٹ بزنس ریکارڈر، 2026