مشرق وسطیٰ میں کشیدگی کے خاتمے کیلئے سفارتی حل کا کوئی متبادل نہیں، روس اور ایران کا اتفاق

روس کے وزیر خارجہ سرگئی لاوروف اور ایرانی ہم منصب عباس عراقچی نے جمعرات کو نیویارک میں اقوام متحدہ کی جنرل اسمبلی کے موقع پر ملاقات کی، جس میں دونوں ممالک نے اس بات پر اتفاق کیا کہ مشرق وسطیٰ میں کشیدگی کے خاتمے کے لیے سفارتی حل کا کوئی متبادل نہیں۔

روسی وزارت خارجہ کے مطابق ملاقات میں علاقائی اور بین الاقوامی امور، بالخصوص ایران کی صورتحال پر تبادلہ خیال کیا گیا۔ روس نے کہا کہ امریکا اور اسرائیل کی جانب سے کیے گئے غیر قانونی اقدامات سے پیدا ہونے والے بحران کے سفارتی حل کے علاوہ کوئی راستہ نہیں۔

روس اور ایران نے 2025 میں اسٹریٹجک تعاون کی شراکت داری پر دستخط کیے تھے، جس کے تحت دوطرفہ تعلقات اور دفاعی تعاون کو مزید مضبوط بنانا ہے، تاہم معاہدے میں باہمی دفاع کی شق شامل نہیں۔

دونوں ممالک ایک دوسرے کو فوجی معلومات اور سازوسامان بھی فراہم کرتے رہے ہیں۔

ایرانی صدر مسعود پزشکیان نے رواں ماہ کے آغاز میں ایران جنگ پر روس کے مؤقف پر صدر ولادیمیر پیوٹن کا شکریہ ادا کیا تھا۔ انہوں نے ایک انٹرویو میں کہا کہ ایران جنگ کب ختم ہوگی، اس کا فیصلہ امریکا کو کرنا ہے۔