امریکا کا ایران پر مسلسل گیارھویں رات بھی حملہ

امریکی سینٹرل کمانڈ نے منگل کو کہا کہ اس نے ایران میں فوجی اہداف پر لگاتار گیارھویں رات حملے کیے، جبکہ مشرقِ وسطیٰ میں جاری جنگ مزید شدت اختیار کر گئی ہے۔

سینٹکام نے سوشل میڈیا پلیٹ فارم ایکس پر جاری بیان میں کہا کہ ان حملوں کا مقصد آبنائے ہرمز میں تجارتی جہاز رانی کو خطرے میں ڈالنے کی ایران کی صلاحیت کو مزید کمزور کرنا ہے۔

امریکی فوج نے بعد ازاں ایک اور بیان میں کہا کہ امریکی فورسز نے ایران کے فوجی آپریشن مراکز، بحری صلاحیتوں، طیاروں کے ہینگرز، ڈرون ذخیرہ گاہوں اور فوجی لاجسٹک انفراسٹرکچر کو نشانہ بنایا۔

سینٹکام کے مطابق، ایران نے گزشتہ تین ماہ کے دوران آبنائے ہرمز سے گزرنے والے 30 سے زائد تجارتی جہازوں پر حملے کیے ہیں۔

بیان میں کہا گیا کہ یہ بلاجواز حملے سیکڑوں بے گناہ ملاحوں کی جانوں کو خطرے میں ڈالنے کے ساتھ ساتھ سمندری آمدورفت کی آزادی کو بھی نقصان پہنچا رہے ہیں۔

امریکی فوج نے مزید کہا کہ اس نے مئی کے آغاز سے اب تک آبنائے ہرمز کے ذریعے تقریباً 900 جہازوں کی محفوظ آمدورفت میں سہولت فراہم کی ہے، جس کے نتیجے میں 450 ملین بیرل خام تیل کی ترسیل ممکن بنائی گئی۔