ڈرون حملے کے بعد کویت ایئرپورٹ کے فیول ٹینک میں آگ بھڑک اٹھی

ایران اور اسرائیل کے درمیان جاری تقریباً چار ہفتوں پر محیط علاقائی جنگ کے دوران بدھ کے روز ڈرون حملوں میں کویت انٹرنیشنل ایئرپورٹ کے ایک فیول ٹینک کو نشانہ بنایا گیا جس سے آگ بھڑک اٹھی۔ خلیجی ریاست کے سول ایوی ایشن حکام کے مطابق اس حملے کے نتیجے میں محدود نقصان ہوا تاہم کسی جانی نقصان کی اطلاع نہیں ملی۔

ڈائریکٹوریٹ جنرل آف سول ایوی ایشن نے ابتدائی معلومات کا حوالہ دیتے ہوئے ایک بیان میں کہا کہ حملے کے بعد فائر فائٹرز نے فوری کارروائی کرتے ہوئے آگ پر قابو پانے کی کوششیں شروع کر دیں۔ ادارے کے ترجمان عبداللہ الراجحی کے مطابق آگ کو محدود رکھنے کے لیے ہنگامی ٹیمیں موقع پر موجود ہیں۔

ادھر ایران کے پاسداران انقلاب نے سرکاری نشریاتی ادارے کے ذریعے جاری بیان میں کہا کہ انہوں نے کویت، اردن اور بحرین میں امریکی افواج کی میزبانی کرنے والے فوجی اڈوں کے ساتھ ساتھ اسرائیل میں اہداف پر میزائل اور ڈرون حملے کیے ہیں۔

کویت نیشنل گارڈ نے بتایا کہ اس کی فورسز نے بدھ کی صبح چھ ڈرون مار گرائے جبکہ کویتی فوج کے مطابق فضائی دفاعی نظام دشمن کے میزائل اور ڈرون حملوں کا مؤثر جواب دے رہا ہے۔

بحرین کی وزارت داخلہ کے مطابق ملک میں فضائی حملے کے سائرن بجائے گئے، جبکہ اردن کے پبلک سکیورٹی ڈائریکٹوریٹ نے بتایا کہ دارالحکومت عمان کے قریب میزائل کے ٹکڑے گرے تاہم اس سے کوئی جانی یا مالی نقصان نہیں ہوا۔ سعودی عرب نے بھی اعلان کیا کہ اس کے مشرقی علاقے میں کم از کم چار ڈرون تباہ کر دیے گئے۔

اسرائیلی فوج کے مطابق ایرانی میزائلوں کے بعد ملک کے وسطی حصوں میں وارننگ سائرن بجائے گئے اور فضائی دفاعی نظام متحرک کر دیا گیا۔

کویت انٹرنیشنل ایئرپورٹ 28 فروری کو اسرائیل اور امریکہ کے ایران پر حملوں کے بعد شروع ہونے والی جنگ کے دوران کئی بار نشانہ بن چکا ہے اور اس وقت زیادہ تر کمرشل پروازوں کے لیے بند ہے، جبکہ بڑی ایئرلائنز نے بھی ایندھن کی قلت کے باعث خلیجی ممالک کے لیے پروازیں معطل یا محدود کر دی ہیں۔