میپل لیف سیمنٹ کی پایونیر کے حصص کی خریداری پرغور

میپل لیف سیمنٹ فیکٹری لمیٹڈ (ایم ایل سی ایف) نے جمعرات کو پاکستان اسٹاک ایکسچینج (پی ایس ایکس) کو آگاہ کیا کہ وہ پایونیر سیمنٹ لمیٹڈ کے حصص خریدنے پر غور کر رہی ہے۔

کمپنی کے جاری کردہ نوٹس میں بتایا گیا کہ بورڈ آف ڈائریکٹرز نے 13 نومبر 2025 کو اپنی میٹنگ میں پایونیئر سیمنٹ کے حصص کے ممکنہ حصول پر غور کیا جو تجارتی شرائط کی حتمی منظوری، ڈیو ڈیلیجنس کی تکمیل، حتمی معاہدوں کا نفاذ، عوامی پیشکش اور ریگولیٹری منظوریوں کی مشروط تکمیل پر مبنی ہے۔

تاہم کمپنی نے یہ ظاہر نہیں کیا کہ وہ کتنے حصص خریدنے کا ارادہ رکھتی ہے۔

نوٹس کے مطابق نیکسٹ کیپیٹل لمیٹڈ کو منیجر آف دا آفر مقرر کیا گیا ہے اور اسے ایم ایل سی ایف کی جانب سے عوامی اعلان اور پیشکش کے تمام قانونی و پروسیجرل تقاضے پورے کرنے کا اختیار حاصل ہے۔

میپل لیف سیمنٹ فیکٹری کو 1960 میں پاکستان میں ایک پبلک لمیٹڈ کمپنی کے طور پر قائم کیا گیا تھا۔ کمپنی سیمنٹ کی تیاری اور فروخت کے کاروبار میں سرگرم ہے اور مقامی مارکیٹ کے ساتھ ساتھ افغانستان، مشرق وسطیٰ اور دیگر افریقی ممالک کو بھی برآمدات کرتی ہے۔ کمپنی کی ہولڈنگ کمپنی کوہ نور ٹیکسٹائل ملز لمیٹڈ ہے۔

دریں اثنا پایونیئر سیمنٹ لمیٹڈ کو 1986 میں ایک پبلک لمیٹڈ کمپنی کے طور پر قائم کیا گیا۔ کمپنی کے پلانٹس پنجاب میں واقع ہیں اور اس کے پاس تین پروڈکشن لائنز ہیں جہاں یہ سیمنٹ تیار اور فروخت کرتی ہے۔ کمپنی نے اپنی پیداوار کا آغاز روزانہ 2,000 ٹن کی صلاحیت کے ساتھ کیا تھا۔ علاوہ ازیں، کمپنی نے 12 میگاواٹ ویسٹ ہیٹ ریکوری پاور پلانٹ اور 24 میگاواٹ کوئلے کا پاور پلانٹ میں بھی سرمایہ کاری کی ہے۔