شی جن پنگ کا چین اور آسٹریلیا کے تعلقات میں جامع بہتری کا خیرمقدم
- چین اور آسٹریلیا میں زراعت، مصنوعی ذہانت اور توانائی کے شعبوں میں تعاون بڑھانے پر اتفاق
چین کے صدر شی جن پنگ نے جمعہ کو آسٹریلیا کے وزیراعظم انتھونی البانیز سے ملاقات میں کہا ہے کہ دونوں ممالک زراعت، مصنوعی ذہانت، توانائی اور سبز معیشت سمیت مختلف شعبوں میں باہمی تعاون کو مزید فروغ دے سکتے ہیں۔
ایشیا پیسیفک اکنامک کوآپریشن (ایپیک) کے سربراہی اجلاس کے موقع پر چین کے شہر شینزن میں ہونے والی ملاقات میں شی جن پنگ نے دونوں ممالک کے تعلقات میں جامع بہتری کو سراہتے ہوئے کہا کہ چین اختلافات کو پس پشت ڈال کر آسٹریلیا کے ساتھ شراکت داری کو ترقی کے نئے مرحلے تک لے جانے کے لیے تیار ہے۔
چینی صدر نے کہا کہ 2022 میں انتھونی البانیز کے وزیراعظم بننے کے بعد دونوں رہنماؤں کی چار مرتبہ ملاقات ہو چکی ہے اور دونوں نے مل کر چین اور آسٹریلیا کے تعلقات میں جامع تبدیلی لائی ہے۔
چین کی سرکاری خبر رساں ایجنسی ژنہوا کے مطابق ملاقات میں عوامی سطح پر روابط بڑھانے پر بھی زور دیا گیا۔
واضح رہے کہ کووڈ 19 کی ابتدا کی تحقیقات کے مطالبے کے بعد دونوں ممالک کے تعلقات کشیدہ ہوگئے تھے، تاہم چین نے بعد ازاں آسٹریلوی برآمدات پر عائد متعدد پابندیاں ختم کردی تھیں۔
ملاقات کے بعد البانیز نے کہا کہ اختلافات پر تعمیری انداز میں براہ راست بات چیت کی جائے گی اور مستحکم تعلقات دونوں ممالک کے مفاد میں ہیں۔
آسٹریلوی وزیراعظم جمعہ کو بیجنگ پہنچیں گے، جہاں ان کی چینی وزیراعظم لی چیانگ سے ملاقات متوقع ہے۔ ان کے ہمراہ آسٹریلیا کی بڑی کان کنی کمپنیوں کے اعلیٰ عہدیدار بھی چین کے کاروباری رہنماؤں سے ملاقات کریں گے۔

























Comments