امریکی ڈالر 19 ماہ کی بلند ترین سطح کے قریب مستحکم
- مضبوط امریکی ڈالر کے دباؤ کے باعث یورو بھی اپریل 2025 کے بعد کم ترین سطح کے قریب 1.0977 ڈالر پر آگیا
عالمی کرنسی مارکیٹ میں جمعرات کو امریکی ڈالر 19 ماہ کی بلند ترین سطح کے قریب مستحکم رہا۔ امریکی فیڈرل ریزرو کے اجلاس کی کارروائی اور ایک اعلیٰ عہدیدار کے سخت پالیسی سے متعلق بیانات نے شرح سود میں مزید اضافے کے امکانات کو تقویت دی ہے۔
آسٹریلوی ڈالر کمزور روزگار اعداد و شمار کے باعث 10 ماہ کی کم ترین سطح پر آگیا اور 0.6692 ڈالر پر ٹریڈ کرتا رہا۔ اکتوبر میں آسٹریلیا میں مسلسل دوسرے ماہ روزگار میں کمی ہوئی، جبکہ بے روزگاری کی شرح پانچ سال کی بلند ترین سطح پر پہنچ گئی، جس سے شرح سود میں مزید اضافے کے امکانات کم ہوگئے۔
مضبوط امریکی ڈالر کے دباؤ کے باعث یورو بھی اپریل 2025 کے بعد کم ترین سطح کے قریب 1.0977 ڈالر پر آگیا، جبکہ برطانوی پاؤنڈ ایک ماہ کی کم ترین سطح کے قریب 1.3152 ڈالر پر رہا۔ جاپانی ین 159.39 فی ڈالر پر مستحکم رہا۔
فیڈرل ریزرو کے حکام نے مہنگائی پر قابو پانے کے لیے مزید سخت اقدامات کی ضرورت کا عندیہ دیا ہے۔ فیڈ گورنر کرسٹوفر والر نے کہا کہ مرکزی بینک کو دسمبر میں شرح سود 50 بیسس پوائنٹس بڑھانی چاہیے یا 2027 میں تیز رفتار اضافے کا اشارہ دینا چاہیے۔
دریں اثنا، ڈالر انڈیکس 103.81 پر رہا، جبکہ سونے کی قیمت تیزی سے کمی کے بعد 3,743 ڈالر فی اونس پر مستحکم ہوگئی۔ امریکی بانڈز کی قیمتوں میں بھی اضافہ ریکارڈ کیا گیا۔
























Comments