وزیر خزانہ کی آئی ایم ایف سربراہ کرسٹالینا جارجیوا سے ملاقات

وزیر خزانہ محمد اورنگزیب نے عالمی مالیاتی فنڈ (آئی ایم ایف) کی منیجنگ ڈائریکٹر کرسٹالینا جارجیوا سے ملاقات کی اور بینکاک میں آئی ایم ایف اور عالمی بینک کے سالانہ اجلاس 2026 کے موقع پر بین الاقوامی سرمایہ کاروں کو پاکستان کی معیشت کے استحکام، مالیاتی استحکام کے اقدامات اور بیرونی مالی معاونت کے ذرائع میں تنوع پیدا کرنے کی کوششوں سے آگاہ کیا۔

محمد اورنگزیب نے ’’پاکستان: غیر یقینی عالمی معاشی صورتحال میں مستحکم رہنے کا راستہ‘‘ کے موضوع پر جے پی مورگن کے سرمایہ کاری سیمینار میں بھی شرکت کی۔

سیمینار کے دوران وزیر خزانہ نے مجموعی معاشی استحکام، مالیاتی استحکام، محصولات میں اضافے اور مسلسل بنیادی مالیاتی سرپلس کے حصول میں ہونے والی پیش رفت کو اجاگر کیا۔ اس موقع پر ترسیلات زر میں اضافے، زرمبادلہ کے ذخائر میں بہتری، کرنٹ اکائونٹ کے خسارے کو محدود رکھنے اور بیرونی قرضوں کی ادائیگیوں پر بھی تبادلہ خیال کیا گیا۔

انہوں نے بیرونی قرضوں کے مجموعی حجم میں اضافہ کیے بغیر بین الاقوامی مالی معاونت کے ذرائع میں تنوع پیدا کرنے اور مہنگے قرضوں کی جگہ نسبتاً بہتر متبادل ذرائع اختیار کرنے کی کوششوں کی وضاحت کی۔ انہوں نے آئی ایم ایف پروگرام سے وابستگی اور مسلسل ڈھانچہ جاتی اصلاحات کے عزم کا اعادہ کیا، جبکہ مہنگائی پر قابو پانے کے لیے محتاط مالیاتی پالیسی جاری رکھنے پر بھی زور دیا۔

محمد اورنگزیب نے کمزور اور مستحق گھرانوں کو ہدفی معاونت فراہم کرنے، توانائی کی محتاط خریداری اور برآمدات پر مبنی پائیدار معاشی ترقی کی اہمیت پر زور دیا۔ اس موقع پر وفاق اور صوبوں کے درمیان مالیاتی امور میں رابطہ کاری بہتر بنانے اور تجارت و سرمایہ کاری کے شعبوں میں شراکت داری مضبوط کرنے پر بھی تبادلہ خیال کیا گیا۔