اکتوبر میں فیڈ کی شرح سود بڑھنے کے امکانات معدوم، سونے کی قیمت میں اضافہ

عالمی منڈی میں سونے کی قیمت پیر کو بڑھ گئی، جس کی وجہ حالیہ کمزور معاشی اعداد و شمار کے بعد اکتوبر میں امریکی فیڈرل ریزرو کی جانب سے شرح سود بڑھانے کے امکانات میں نمایاں کمی ہے، جس سے منافع نہ دینے والے اثاثے سونے کی کشش میں اضافہ ہوا۔

اسپاٹ گولڈ کی قیمت 0.4 فیصد اضافے سے 4,158.17 ڈالر فی اونس ہوگئی، جبکہ دسمبر کیلئے امریکی گولڈ فیوچرز 0.6 فیصد بڑھ کر 4,186.40 ڈالر فی اونس پر پہنچ گئے۔

اعداد و شمار کے مطابق ستمبر میں امریکا میں روزگار میں اضافہ توقعات سے زیادہ سست رہا، جبکہ گزشتہ دو ماہ کے نان فارم پے رولز کے اعداد و شمار میں بھی نمایاں کمی کی گئی۔

کے سی ایم ٹریڈ کے چیف مارکیٹ تجزیہ کار ٹم واٹرر نے کہا کہ کمزور لیبر مارکیٹ کے اعداد و شمار نے اکتوبر میں فیڈ کی شرح سود میں اضافے کی توقعات کم کردی ہیں، جس سے سونے کو کچھ سہارا ملا ہے۔ تاہم مارکیٹ اب بھی فیڈ کے مجموعی شرح سود بڑھانے کے چکر کو برقرار سمجھ رہی ہے۔

سی ایم ای فیڈ واچ ٹول کے مطابق اکتوبر میں شرح سود میں اضافے کا امکان اب 22 فیصد رہ گیا ہے، جو ایک ہفتہ قبل 64 فیصد تھا، جبکہ دسمبر میں اضافے کا امکان 87 فیصد پر برقرار ہے۔ امریکی مرکزی بینک نے گزشتہ ماہ شرح سود میں 25 بیسس پوائنٹس کا اضافہ کرکے اسے 3.75 سے 4 فیصد کی حد میں کردیا تھا۔

دریں اثنا مشرق وسطیٰ کی صورتحال بھی سونے کی قیمتوں پر اثرانداز ہو رہی ہے۔ یمن کی سعودی حمایت یافتہ حکومت نے حوثیوں کے زیر قبضہ علاقوں کو واپس لینے کیلئے بڑی فوجی کارروائی شروع کرنے کا اعلان کیا ہے۔

دیگر قیمتی دھاتوں میں چاندی 1.7 فیصد اضافے سے 61.40 ڈالر فی اونس، پلاٹینم 0.6 فیصد بڑھ کر 1,708.48 ڈالر اور پیلیڈیم 0.6 فیصد اضافے سے 1,175.04 ڈالر فی اونس ہوگیا۔