یوکرینی وزیر خارجہ کی ایرانی ہم منصب سے ملاقات، کشیدگی کم رکھنے پر تبادلہ خیال

یوکرین کے وزیر خارجہ آندری سیبیہا نے کہا ہے کہ انہوں نے اپنے ایرانی ہم منصب عباس عراقچی سے ملاقات میں دونوں ممالک کے درمیان کشیدگی کو قابو میں رکھنے کے طریقوں پر تبادلہ خیال کیا ہے۔

آندری سیبیہا نے سماجی رابطے کی ویب سائٹ ایکس پر بتایا کہ نیویارک میں اقوام متحدہ کی جنرل اسمبلی کے موقع پر ہونے والی ملاقات جولائی میں دونوں وزرائے خارجہ کے درمیان ہونے والی ٹیلی فونک گفتگو کا تسلسل تھی۔

انہوں نے کہا کہ مذاکرات کا مرکز دونوں ممالک کے درمیان کشیدگی میں مزید اضافے کو روکنے کے لیے باہمی اقدامات تھا اور دونوں فریق موجودہ رابطہ ذرائع کھلے رکھنے پر متفق ہوئے۔

سیبیہا کے مطابق دونوں وزرائے خارجہ نے مشرق وسطیٰ اور یورپ کی صورتحال کے ساتھ ساتھ جاری امن کوششوں کے مختلف طریقہ کار پر بھی تبادلہ خیال کیا۔

انہوں نے کہا کہ انہوں نے دونوں خطوں میں جلد از جلد امن اور استحکام کی بحالی کے لیے یوکرین کے مؤقف کو دہرایا۔

جولائی میں یوکرینی ڈرون حملے کے بعد دونوں وزرائے خارجہ میں رابطہ ہوا تھا، جس میں ایک ایرانی ملاح ہلاک اور دوسرا زخمی ہوا تھا۔ ایران نے حملے کی مذمت کرتے ہوئے جوابی کارروائی کی دھمکی دی تھی۔