’’لائف سائیکل مکمل‘‘: ہونڈا اٹلس نے پاکستان میں بی آر-وی کی پروڈکشن بند کردی

بزنس ریکارڈر کو بدھ کو معلوم ہوا ہے کہ ہونڈا اٹلس کارز لمیٹڈ (ایچ اے سی ایل) نے پاکستان میں ہونڈا بی آر-وی کی پروڈکشن بند کردی ہے، جبکہ ایچ آر-وی، سٹی اور سوک کمپنی کی مقامی گاڑیوں کی فہرست میں شامل رہیں گی۔

ایچ اے سی ایل کے ایک اعلیٰ عہدیدار نے پیش رفت کی تصدیق کرتے ہوئے بتایا کہ کمپنی نے تین سے چار ماہ قبل بی آر-وی کی پروڈکشن بتدریج بند کرنے کا منصوبہ بنایا تھا۔

انہوں نے کہا، ’’موجودہ معاشی حالات میں نیا ماڈل متعارف کرانا واقعی ایک بڑا چیلنج ہے، جبکہ بی آر-وی کو تقریباً 10 سال قبل متعارف کرایا گیا تھا۔‘‘ انہوں نے مزید کہا کہ ہونڈا سوک، سٹی اور ایچ آر-وی مقامی مارکیٹ میں دستیاب رہیں گی۔

انہوں نے کہا، ’’ملک کے موجودہ مشکل کاروباری ماحول میں جدید خصوصیات سے لیس نیا ماڈل متعارف کرانا آسان نہیں۔ دوسری جانب بی آر-وی اپنی مصنوعات کی مقررہ مدتِ کار مکمل کرچکی ہے، اس لیے اب اس کی پروڈکشن بند کردی گئی ہے۔‘‘

آٹو ماہر عثمان انصاری نے کہا کہ تقریباً 2016 میں متعارف کرائی گئی بی آر-وی پرانی خصوصیات اور ٹربو چارجڈ انجن نہ ہونے کے باوجود اپنی ابتدائی قیمت کے مقابلے میں تقریباً تین گنا قیمت پر فروخت ہورہی تھی۔

انہوں نے کہا کہ اگرچہ گاڑی کی شکل و صورت ایس یو وی جیسی تھی، ’’حقیقت میں یہ صرف سات نشستوں والی وین تھی۔‘‘

انہوں نے کہا، ’’اسی گاڑی (بی آر-وی) کی بھارت میں چند سال قبل پروڈکشن بند کردی گئی تھی۔ تاہم ملائیشیا اور انڈونیشیا میں اس گاڑی کی شکل تبدیل کی گئی، جہاں اسے اب بھی فروخت کیا جارہا ہے۔‘‘