امریکی روزگار کے اعداد و شمار کا انتظار، سونے کی قیمتوں میں کمی

عالمی مارکیٹ میں سونے کی قیمتیں منگل کو محدود رہیں کیونکہ سرمایہ کار مشرق وسطیٰ میں بڑھتی ہوئی کشیدگی کا جائزہ لینے کے ساتھ رواں ہفتے جاری ہونے والے اہم امریکی روزگار کے اعداد و شمار کے منتظر ہیں، جو امریکی فیڈرل ریزرو کی آئندہ مانیٹری پالیسی سے متعلق توقعات پر اثرانداز ہوسکتے ہیں۔

اسپاٹ گولڈ کی قیمت 0.3 فیصد کمی کے ساتھ 4,437.10 ڈالر فی اونس رہی۔ گزشتہ سیشن میں سونا 19 اگست کے بعد کی کم ترین سطح پر آگیا تھا۔ دوسری جانب امریکی گولڈ فیوچرز 0.1 فیصد اضافے کے ساتھ 4,485.30 ڈالر فی اونس پر پہنچ گئے۔

رواں ہفتے امریکا میں ملازمتوں کے مواقع، اے ڈی پی روزگار رپورٹ اور نان فارم پے رولز کے اعداد و شمار جاری ہوں گے۔ سرمایہ کار ان اعداد و شمار کا جائزہ لے کر امریکی لیبر مارکیٹ کی صورتحال اور شرح سود کے آئندہ فیصلوں سے متعلق اشارے حاصل کریں گے۔

گزشتہ ہفتے اسپاٹ گولڈ 3 ماہ سے زائد کی بلند ترین سطح پر پہنچا تھا، تاہم جمعہ کو فیڈرل ریزرو کے چیئرمین کیون وارش کے مہنگائی سے متعلق محتاط مؤقف کے بعد قیمت میں 3 فیصد سے زیادہ کمی ہوئی۔

آئی جی کے مارکیٹ تجزیہ کار ٹونی سائکامور نے کہا کہ وارش کی جیکسن ہول تقریر کے علاوہ آبنائے ہرمز میں نئی کشیدگی نے تیل کی قیمتوں اور مہنگائی کی توقعات میں اضافہ کیا ہے، جس سے سونے پر دباؤ بڑھا۔

انہوں نے کہا کہ ایک مرتبہ شرح سود میں اضافہ سونے کے لیے بڑا مسئلہ نہیں ہوگا، تاہم دو یا تین اضافے اہم اثر ڈال سکتے ہیں۔

دیگر قیمتی دھاتوں میں چاندی 0.3 فیصد اضافے سے 66.34 ڈالر، پلاٹینم 0.1 فیصد بڑھ کر 1,793.03 ڈالر جبکہ پیلیڈیم 1,356.75 ڈالر فی اونس پر مستحکم رہا۔