ملک کے بالائی اور وسطی علاقوں میں 8 جولائی تک بارشوں اور آندھی کی پیشگوئی

محکمہ موسمیات (پی ایم ڈی) نے ملک کے بالائی اور وسطی علاقوں میں اگلے دو دنوں کے دوران وسیع پیمانے پر بارشوں، آندھی اور گرج چمک کی پیشگوئی کی ہے اور خبردار کیا ہے کہ بعض مقامات پر موسلا دھار بارش سے شہری سیلاب (اربن فلڈنگ)، لینڈ سلائیڈنگ اور ندی نالوں میں طغیانی کا خطرہ پیدا ہو سکتا ہے۔

بحیرہ عرب اور خلیج بنگال سے آنے والی نم آلود ہواؤں اور مغربی ہواؤں کے ایک سلسلے کے باعث کشمیر، خیبر پختونخوا، پنجاب، اسلام آباد، گلگت بلتستان اور شمال مشرقی بلوچستان میں 8 جولائی تک وقفے وقفے سے بارش کا امکان ہے، جبکہ سندھ کے چند مقامات پر بھی بوند باندی ہو سکتی ہے۔

محکمہ موسمیات نے انتباہ جاری کیا ہے کہ شدید بارشوں کی وجہ سے اسلام آباد، راولپنڈی، پشاور، نوشہرہ، گوجرانوالہ، لاہور اور فیصل آباد میں شہری علاقوں میں سیلابی صورتحال پیدا ہو سکتی ہے۔ اس کے علاوہ بالائی خیبر پختونخوا، گلگت بلتستان، کشمیر اور ڈیرہ غازی خان کے پہاڑی علاقوں میں لینڈ سلائیڈنگ اور مقامی ندی نالوں اور برساتی نالوں میں پانی کے بہاؤ میں اضافے کا خدشہ ہے۔

پی ایم ڈی نے یہ بھی خبردار کیا ہے کہ تیز ہواؤں اور آسمانی بجلی گرنے سے کمزور انفرااسٹرکچر جیسے کہ سولر پینلز، بجلی کے کھمبوں اور سائن بورڈز کو نقصان پہنچ سکتا ہے۔ محکمے نے سیاحوں، مسافروں اور کسانوں کو احتیاطی تدابیر اختیار کرنے کی ہدایت کی ہے اور تمام متعلقہ اداروں پر زور دیا ہے کہ وہ اس دوران الرٹ رہیں اور ضروری حفاظتی انتظامات کو یقینی بنائیں۔