پاکستان اور یورپی یونین کا مشرق وسطیٰ میں جنگ بندی برقرار اور مذاکرات جاری رکھنے پر زور

نائب وزیرِ اعظم اور وزیرِ خارجہ محمد اسحاق ڈار اور یورپی یونین کی خارجہ امور کی سربراہ کاجا کالاس نے مشرقِ وسطیٰ کی تیزی سے بدلتی ہوئی صورتحال پر تبادلہ خیال کیا، جس میں انہوں نے جنگ بندی کے معاہدے کو برقرار رکھنے اور مواصلاتی رابطے کھلے رکھنے کی ضرورت پر زور دیا۔

دفترِ خارجہ کے مطابق اسحاق ڈار نے کاجا کالاس کے ساتھ ٹیلی فون پر گفتگو کی جس کے دوران انہوں نے حالیہ علاقائی پیش رفت کا جائزہ لیا۔

کاجا کالاس نے پاکستان کی ان سفارتی کوششوں کو سراہا جن کے نتیجے میں اسلام آباد مفاہمت کی یادداشت (ایم او یو) پر دستخط ممکن ہو سکے۔ تاہم انہوں نے حالیہ جنگ بندی کی خلاف ورزیوں پر شدید تشویش کا اظہار کیا اور رابطے کے ذرائع کھلے رکھنے کی اہمیت پر زور دیا۔

اسحاق ڈار نے یورپی یونین کی چیف کو مشرقِ وسطیٰ میں امن و استحکام کے لیے ایک جامع فریم ورک کے حصول کے لیے پاکستان کی مسلسل سفارتی کوششوں سے آگاہ کیا۔ انہوں نے اس بات پر بھی زور دیا کہ مزید کشیدگی کو روکنے کے لیے تمام فریقین جنگ بندی کے معاہدے کی پاسداری کریں۔دونوں رہنماؤں نے علاقائی صورتحال کے پیشِ نظر مسلسل اور قریبی رابطے میں رہنے پر اتفاق کیا۔