لبنان میں جنگ بندی کی خلاف ورزیاں، پاکستان اور سعودی عرب کا گہری تشویش کا اظہار

پاکستان اور سعودی عرب نے لبنان میں اسرائیل کی جانب سے جنگ بندی کی خلاف ورزیوں پر گہری تشویش کا اظہار کیا ہے۔

دفترِ خارجہ کے مطابق اس تشویش کا اظہار نائب وزیراعظم اسحاق ڈار اور سعودی وزیر خارجہ شہزادہ فیصل بن فرحان کے درمیان جمعرات کو ہونے والی ٹیلی فونک گفتگو کے دوران کیا گیا۔

دونوں رہنماؤں نے پائیدار امن اور استحکام کو یقینی بنانے کے لیے جنگ بندی کے مکمل احترام اور اس پر عمل درآمد کی فوری ضرورت پر زور دیا۔

نائب وزیراعظم اسحاق ڈار نے پائیدار امن کے حصول کے لیے پاکستان کی کوششوں کی مسلسل حمایت پر سعودی عرب کو سراہا۔ دونوں رہنماؤں نے ایک دوسرے سے قریبی رابطے میں رہنے پر اتفاق کیا۔

یہ پیشرفت لبنان پر اسرائیل کے ان شدید ترین حملوں کے درمیان سامنے آئی جو گزشتہ ماہ حزب اللہ کے ساتھ تنازع شروع ہونے کے بعد سے اب تک کیے گئے ہیں حالانکہ ایران نواز گروپ (حزب اللہ) نے امریکہ اور ایران کے درمیان ہونے والی دو ہفتوں کی جنگ بندی کے تحت شمالی اسرائیل اور لبنان میں موجود اسرائیلی افواج پر حملے روک دیے ہیں۔

بیروت میں ہونے والے پے در پے دھماکوں سے دارالحکومت لرز اٹھا اور فضا میں دھوئیں کے بادل چھا گئے جبکہ اسرائیلی فوج کا کہنا ہے کہ اس نے جنگ کا سب سے بڑا مربوط حملہ شروع کر دیا ہے۔

اسرائیلی وزیراعظم بنجمن نیتن یاہو نے رات گئے کہا کہ امریکہ اور اسرائیل کی ایران کے خلاف چھ ہفتوں سے جاری جنگ کو معطل کرنے والی جنگ بندی کا اطلاق لبنان پر نہیں ہوتا اور اسرائیلی فوج نے واضح کیا ہے کہ وہاں حزب اللہ کے خلاف آپریشن جاری رہے گا۔

یہ موقف پاکستانی وزیراعظم شہباز شریف کے بیانات کے متضاد ہے جو امریکہ اور ایران کے درمیان جنگ بندی کے مذاکرات میں کلیدی ثالث کا کردار ادا کر رہے ہیں اور جنہوں نے کہا تھا کہ اس معاہدے میں لبنان بھی شامل ہوگا۔

دریں اثنا ریڈیو پاکستان کی رپورٹ کے مطابق دفترِ خارجہ نے لبنان کے خلاف جاری اسرائیلی جارحیت کی بھی مذمت کی ہے جس کے نتیجے میں معصوم جانوں کا ضیاع اور بنیادی ڈھانچے کی بڑے پیمانے پر تباہی ہوئی ہے۔

ترجمان دفترِ خارجہ طاہر اندرا بی نے ایک بیان میں کہا کہ اسرائیلی اقدامات خطے میں امن و استحکام کے قیام کے لیے بین الاقوامی کوششوں کو نقصان پہنچاتے ہیں اور بین الاقوامی قانون و بنیادی انسانی اصولوں کی کھلی خلاف ورزی ہیں۔

انہوں نے کہا کہ پاکستان عالمی برادری سے مطالبہ کرتا ہے کہ وہ لبنان کے خلاف اسرائیلی جارحیت روکنے کے لیے فوری اور ٹھوس اقدامات کرے۔

ترجمان نے اس مشکل وقت میں حکومتِ لبنان اور وہاں کے عوام کے ساتھ پاکستان کی غیر متزلزل یکجہتی کا اعادہ کیا۔ انہوں نے مزید کہا کہ پاکستان لبنان کی خودمختاری، علاقائی سالمیت اور وہاں کے امن و استحکام کی بھرپور حمایت کرتا ہے۔