پوتن نے شدید سردی کے دوران کیف پر حملے روکنے پر رضامندی ظاہر کردی، ٹرمپ کا دعویٰ

امریکی صدر ڈونلڈ ٹرمپ نے جمعرات کو کہا کہ روسی صدر ولادیمیر پوتن نے ان کی ذاتی درخواست پر کیف اور دیگر یوکرینی شہروں پر حملے روکنے پر اتفاق کیا ہے، جب کہ ماسکو کے حملوں نے سرد موسم میں لاکھوں افراد کو ہیٹنگ سے محروم کر دیا تھا۔

ٹرمپ نے وائٹ ہاؤس میں کابینہ کے اجلاس کے دوران کہا کہ شدید سردی کی وجہ سے انہوں نے پوتن سے درخواست کی کہ ایک ہفتے کے لیے کیف اور دیگر شہروں پر فائرنگ نہ کی جائے، اور روسی صدر نے اس پر رضا مندی ظاہر کی۔ انہوں نے مزید کہا کہ یہ فیصلہ بہت اچھا رہا اور انہوں نے روسی قیادت پر اعتماد ظاہر کیا کہ وہ اس معاہدے کی پاسداری کریں گے۔

یوکرینی صدر وولودیمیر زیلنسکی نے ٹرمپ کا شکریہ ادا کیا اور کہا کہ وہ واشنگٹن پر انحصار کر رہے ہیں کہ حملوں میں وقفہ یقینی بنایا جائے۔ زیلنسکی نے بتایا کہ یہ وقفہ ابتدائی طور پر ابو ظہبی میں روس، یوکرین اور امریکہ کے درمیان ہونے والی تین طرفہ بات چیت میں زیرِ غور آیا تھا۔

جرمن چانسلر فریڈرش مرز نے بھی اس کوشش کو خوش آئند قرار دیا، تاہم انہوں نے روسی حملوں سے شہری انفراسٹرکچر کی تباہی کی مذمت کی۔

یوکرین اس وقت اپنی تاریخ کے سب سے مشکل دور میں ہے، جب روسی افواج مشرق میں آہستہ آہستہ پیش قدمی کر رہی ہیں اور شدید سردی نے مشکلات بڑھا دی ہیں۔ حکومت نے متوقع درجہ حرارت منفی 30 ڈگری سینٹی گریڈ تک گرنے کی پیش گوئی کی ہے، جبکہ روسی حملوں میں جمعرات کو چھ افراد ہلاک ہوئے۔

ٹرمپ نے کہا کہ بات چیت میں کافی پیش رفت ہوئی ہے اور ان کے نمائندے نے بھی یقین ظاہر کیا کہ روس اور امریکہ کے درمیان دوستانہ تعلقات کے سبب ایک عارضی معاہدہ ممکن ہے، جو انسانی جانیں بچانے میں مددگار ثابت ہو سکتا ہے۔