بنگلہ دیش کے ساتھ ناروا سلوک کیا جا رہا ہے، چیئرمین پی سی بی

پاکستان کرکٹ بورڈ (پی سی بی) کے چیئرمین محسن نقوی نے کہا ہے کہ بھارت میں شیڈول ٹی 20 ورلڈ کپ کھیلنے سے انکار کرنے والے ملک بنگلہ دیش کے ساتھ ناروا سلوک کیا جا رہا ہے جب کہ انہیں اس میگا ایونٹ میں شرکت کی اجازت ملنی چاہیے۔

میڈیا سے گفتگو کرتے ہوئے محسن نقوی جو وفاقی وزیر داخلہ بھی ہیں نے واضح کیا کہ اس صورتحال پر پی سی بی کا موقف حکومتِ پاکستان کی ہدایات کے تابع ہوگا۔ انہوں نے کہا بنگلہ دیش کے ساتھ ناانصافی ہوئی ہے، میں نے آئی سی سی کے اجلاس میں بھی یہی کہا کہ آپ دہرا معیار نہیں رکھ سکتے جہاں ایک ملک کے لیے فیصلے کچھ اور ہوں اور دوسرے کے لیے بالکل مختلف۔ بنگلہ دیش ایک اہم اسٹیک ہولڈر ہے اور ان کے ساتھ یہ زیادتی نہیں ہونی چاہیے۔

ورلڈ کپ کے ممکنہ بائیکاٹ سے متعلق سوال پر محسن نقوی نے کہا کہ حتمی فیصلہ حکومتِ پاکستان کرے گی۔ انہوں نے بتایا ہم وزیر اعظم کی واپسی کا انتظار کر رہے ہیں، جس کے بعد ہی کوئی حتمی فیصلہ کیا جائے گا۔

بنگلہ دیش کے لیے ’ہائبرڈ ماڈل‘ کی تجویز کے حوالے سے انہوں نے کہا کہ بنگلہ دیش بھی پاکستان کی طرح آئی سی سی کا مکمل رکن ہے۔ اگر پاکستان اور بھارت کے لیے ہائبرڈ ماڈل اپنایا جا سکتا ہے تو بنگلہ دیش کو بھی یہی رعایت ملنی چاہیے۔

انہوں نے سخت لہجے میں کہا کہ کوئی ایک ملک دوسرے پر اپنی مرضی مسلط نہیں کر سکتا، اگر ایسی کوشش کی گئی تو پاکستان اپنا سخت موقف رکھتا ہے۔ وفاقی حکومت کے فیصلے کے بعد ہی پی سی بی اپنے اگلے لائحہ عمل (پلان اے، بی یا سی) پر بات کرے گا۔