آئی ایم ایف سربراہ کرسٹالینا جارجیوا کا 2023 کے بعد پہلا دورۂ یوکرین

آئی ایم ایف کی منیجنگ ڈائریکٹر کرسٹالینا جورجیوا جمعرات کی صبح خفیہ سفری انتظامات کے تحت یوکرین کے دارالحکومت کیف پہنچ گئیں جہاں وہ اعلیٰ سطح سیاسی و معاشی مذاکرات میں شرکت کریں گی۔ معاملے سے واقف دو ذرائع کے مطابق کرسٹالینا جورجیوا کا یہ دورہ ایسے وقت میں ہو رہا ہے جب 24 فروری کو یوکرین پر روس کے حملے کو چار برس مکمل ہورہے ہیں۔

ان کے دورے میں یوکرین کے صدر ولادیمیر زیلنسکی، وزیر اعظم یولیا سوویرائیدنکو، مرکزی بینک کے سربراہ اندرے پشنی اور متعدد نجی شعبوں کے کاروباری رہنماؤں سے ملاقاتیں شامل ہیں۔ سیکیورٹی خدشات کے پیش نظر دورے کی تفصیلات سخت رازداری میں رکھی گئیں۔

کرسٹالینا جورجیوا نے آخری بار فروری 2023 میں یوکرین کا دورہ کیا تھا۔ ان کے خاندانی رشتوں کا یوکرین سے براہ راست تعلق ہے، ان کا بھائی ایک یوکرینی خاتون سے شادی شدہ ہے اور روسی حملے کے وقت خارکیف میں موجود تھا۔

یوکرین اور آئی ایم ایف نے نومبر میں چار برسوں پر مشتمل 8.2 ارب ڈالر کے قرض پروگرام پر ابتدائی معاہدہ کیا تھا جو بجٹ پاس کرنے اور بین الاقوامی ڈونرز کی مالی یقین دہانی سمیت متعدد شرائط سے مشروط ہے۔ آئی ایم ایف حکام کا کہنا ہے کہ یوکرین نے اصلاحاتی اقدامات میں پیش رفت دکھائی ہے اور توقع ہے کہ چند ہفتوں میں بورڈ اس پیکج پر غور کرے گا۔

ادارہ کے مطابق قرض کی منظوری فیصلہ کن ثابت ہو گی کیونکہ اس کے بعد اضافی بیرونی سرمایہ کاری بھی کھل جائے گی۔ آئی ایم ایف اندازہ لگاتا ہے کہ جاری جنگ کے پیش نظر 2029 تک یوکرین کو تقریباً 136.5 ارب ڈالر کی مالی ضرورت ہو گی۔