خام تیل کی قیمتوں میں اضافہ، روس پر ممکنہ پابندیوں کے خدشات نے اوپیک پلس کی پیداوار بڑھانے کے اثرات کم کردیے

خام تیل کی قیمتوں میں پیر کو ایک فیصد سے زائد کا اضافہ ریکارڈ کیا گیا، جس سے گزشتہ ہفتے کے کچھ نقصانات کم ہوگئے۔ یوکرین پر رات گئے روسی حملے کے بعد روسی خام تیل پر مزید پابندیوں کے امکانات نے اوپیک پلس کی پیداوار بڑھانے کے منصوبے کے اثرات زائل کر دیے۔

برینٹ خام تیل 80 سینٹ یا 1.2 فیصد بڑھ کر 66.30 ڈالر فی بیرل پر جا پہنچا جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل 75 سینٹ یا 1.2 فیصد بڑھ کر 62.62 ڈالر فی بیرل تک پہنچ گیا۔

گزشتہ جمعہ کو دونوں بینچ مارکس میں 2 فیصد سے زائد کمی ریکارڈ کی گئی تھی کیونکہ کمزور امریکی روزگار کی رپورٹ نے توانائی کی طلب کے امکانات کو مدھم کر دیا تھا۔ گزشتہ ہفتے کے دوران مجموعی طور پر ان میں 3 فیصد سے زیادہ کی گراوٹ دیکھی گئی تھی۔

اوپیک پلس نے اتوار کو اکتوبر سے تیل کی پیداوار میں مزید اضافے پر اتفاق کیا۔ سعودی عرب نے مارکیٹ میں اپنا حصہ دوبارہ حاصل کرنے کے لیے یہ اقدام اٹھایا ہے، تاہم اضافہ گزشتہ مہینوں کے مقابلے میں کہیں کم رکھا گیا ہے۔

اوپیک پلس کے 8 رکن ممالک اکتوبر سے پیداوار میں یومیہ ایک لاکھ 37 ہزار بیرل کا اضافہ کریں گے جو ستمبر اور اگست میں تقریباً 5 لاکھ 55 ہزار بیرل یومیہ اور جولائی و جون میں 4 لاکھ 11 ہزار بیرل یومیہ اضافے کے مقابلے میں کہیں کم ہے۔

راکوتین سیکیورٹیز کے کموڈٹی تجزیہ کار ساتورو یوشیدا نے کہا ہے کہ قیمتوں میں بہتری اس وقت سامنے آئی جب پیداوار میں اضافہ توقعات سے کم رہا جبکہ روس-یوکرین جنگ میں امن کے امکانات کے مدھم ہونے اور اس رائے نے بھی قیمتوں کو سہارا دیا کہ روسی تیل مارکیٹ میں زیادہ مقدار میں نہیں آئے گا۔

یوکرینی حکام کے مطابق، روس نے اتوار کو یوکرین پر اب تک کا سب سے بڑا فضائی حملہ کیا، جس کے نتیجے میں وسطی کیف میں مرکزی سرکاری عمارت کو آگ لگ گئی اور کم از کم 4 افراد ہلاک ہوگئے۔

امریکی صدر ڈونلڈ ٹرمپ نے اتوار کو کہا کہ یورپ کے انفرادی رہنما پیر اور منگل کو امریکہ کا دورہ کریں گے تاکہ روس-یوکرین جنگ کے حل پر بات چیت کی جاسکے۔

ٹرمپ نے مزید کہا کہ وہ جنگ کی موجودہ صورتحال سے خوش نہیں ہیں تاہم انہوں نے ایک بار پھر یقین ظاہر کیا کہ یہ جنگ جلد حل ہو جائے گی۔

فوجیٹومی سیکیورٹیز کے تجزیہ کار توشیتاکا تزوا نے کہا کہ تیل کی مارکیٹ کو اوپیک پلس کی معمولی پیداوار میں اضافے پر اطمینان اور گزشتہ ہفتے کی کمی کے بعد تکنیکی بہتری نے سہارا دیا۔ اوپیک پلس کی پیداوار میں اضافے کو گزشتہ ہفتے ہی قیمتوں میں شامل کر لیا گیا تھا۔

انہوں نے مزید کہا کہ روس پر ممکنہ نئی امریکی پابندیوں سے سپلائی مزید محدود ہونے کی توقعات بھی قیمتوں کو سہارا دے رہی ہیں۔

گولڈمین سیکس نے ہفتے کے آخر میں جاری ایک نوٹ میں کہا کہ اسے 2026 میں تیل کی قدرے زیادہ اضافی سپلائی (سرپلس) کی توقع ہے کیونکہ امریکہ کے خطے میں سپلائی میں بہتری روسی سپلائی میں کمی اور مضبوط عالمی طلب پر غالب آ جائے گی۔

یہ انٹرا ڈے اپڈیٹ ہے