محسن نقوی کی ایرانی ہم منصب اسکندر مومنی سے ملاقات، علاقائی صورتحال پر تبادلہ خیال

وفاقی وزیر داخلہ محسن نقوی نے پیر کو تہران میں اپنے ایرانی ہم منصب اسکندر مومنی سے ملاقات کی، جس میں پاکستان اور ایران کے دوطرفہ تعلقات اور خطے کی تازہ ترین صورتحال پر تبادلہ خیال کیا گیا۔ اس سے قبل محسن نقوی سرکاری دورے پر تہران پہنچے تھے۔

پاکستان کی وزارت داخلہ کی جانب سے جاری بیان کے مطابق ایرانی وزیر داخلہ نے ہوائی اڈے پر محسن نقوی کا استقبال کیا۔

بیان میں کہا گیا کہ ملاقات کے دوران دونوں ممالک کی وزارت داخلہ کے درمیان مختلف شعبوں میں جاری تعاون پر پیش رفت کا جائزہ لیا گیا۔

ایرانی وزیر داخلہ اسکندر مومنی نے خطے میں امن اور استحکام کے فروغ کے لیے وزیراعظم شہباز شریف اور چیف آف ڈیفنس فورسز (سی ڈی ایف) و چیف آف آرمی اسٹاف (سی او اے ایس) فیلڈ مارشل عاصم منیر کی کوششوں کو سراہا۔

انہوں نے کہا کہ ایران خطے میں امن کے لیے پاکستان کی مسلسل کوششوں کا شکر گزار ہے اور اپنے حالیہ دورہ پاکستان کو انتہائی مفید قرار دیا۔

محسن نقوی نے کہا کہ آنے والے دنوں میں پاکستان اور ایران کے دوطرفہ تعلقات کو مزید مضبوط بنایا جائے گا۔