مشرق وسطیٰ کشیدگی : خام تیل کی قیمت 100 ڈالر فی بیرل سے تجاوز کرگئی

مشرق وسطیٰ میں بڑھتی کشیدگی کے باعث تیل کی ترسیل متاثر ہونے کے خدشات میں اضافہ ہوا ہے، جس کے نتیجے میں برینٹ خام تیل کی قیمت بدھ کو 100 ڈالر فی بیرل سے تجاوز کرکے چھ ہفتوں کی بلند ترین سطح پر پہنچ گئی۔

برینٹ کروڈ کے فیوچرز 2.77 ڈالر یا 2.83 فیصد اضافے سے 100.69 ڈالر فی بیرل ہوگئے، جبکہ کاروبار کے دوران قیمت 100.95 ڈالر تک پہنچ گئی۔ امریکی ویسٹ ٹیکساس انٹرمیڈیٹ (ڈبلیو ٹی آئی ) 2.18 ڈالر یا 2.34 فیصد اضافے سے 95.21 ڈالر فی بیرل پر پہنچ گیا۔

ماہرین کے مطابق مشرق وسطیٰ میں جاری تنازع طویل ہونے کے خدشات کے باعث مارکیٹ میں تیل کی سپلائی سے متعلق خطرات بڑھ رہے ہیں۔ حوثیوں کے سعودی توانائی تنصیبات پر حملوں سے تیل کی تنصیبات کو نقصان پہنچا، جبکہ بحیرہ احمر سے تیل کی ترسیل بھی متاثر ہونے کا خطرہ ہے۔

اہم آبنائے ہرمز سے تیل کی ترسیل پہلے ہی نمایاں کم ہوچکی ہے۔ رائسٹڈ انرجی کے مطابق 30 اگست کو لڑائی دوبارہ شروع ہونے سے قبل ہرمز سے تقریباً 80 سے 90 لاکھ بیرل یومیہ تیل گزرتا تھا، جو حالیہ عرصے میں کم ہوکر 20 لاکھ بیرل یومیہ سے بھی نیچے آگیا۔

دریں اثنا فزیکل مارکیٹ میں بھی برینٹ کی قیمت 3 ستمبر سے 100 ڈالر فی بیرل سے زائد رہی ہے۔ یورپی ڈیزل تقریباً 199 ڈالر فی بیرل پر پہنچ گیا جبکہ ڈیزل کی ریفائننگ مارجن یکم ستمبر کو ریکارڈ 78.90 ڈالر فی بیرل تک پہنچ گئی۔

ماہرین کا کہنا ہے کہ ایندھن کی قلت اور بلند تیل قیمتیں عالمی افراط زر پر مزید دباؤ ڈال سکتی ہیں۔