فیڈ اجلاس کی تفصیلات سے قبل سونے کی قیمت بڑھ گئی

ایشیائی مارکیٹ میں بدھ کے ابتدائی کاروبار کے دوران سونے کی قیمت میں معمولی اضافہ ہوا، کیونکہ امریکی ٹریژری ییلڈز حالیہ بلند ترین سطح سے نیچے آگئیں، جبکہ سرمایہ کار امریکی فیڈرل ریزرو کے اجلاس کی کارروائی کے منتظر ہیں۔

اسپاٹ گولڈ کی قیمت 0.2 فیصد اضافے سے 4,342.33 ڈالر فی اونس ہوگئی۔ منگل کو سونے کی قیمت میں تقریباً 2 فیصد کمی ریکارڈ کی گئی تھی۔ دوسری جانب امریکی گولڈ فیوچرز برائے دسمبر 0.6 فیصد کمی سے 4,396.30 ڈالر فی اونس پر آگئے۔

امریکی ییلڈز میں ابتدائی اضافے کے بعد کمی دیکھی گئی، جبکہ عالمی سطح پر بانڈز کی فروخت کا رجحان جاری رہا۔ اس کے نتیجے میں بڑی معیشتوں میں طویل مدتی قرض لینے کی لاگت کئی دہائیوں کی بلند ترین سطح کے قریب پہنچ گئی ہے۔

فیڈرل ریزرو کی حالیہ مالیاتی پالیسی اجلاس کی تفصیلات بدھ کو 1800 جی ایم ٹی پر جاری کی جائیں گی، جن سے آئندہ شرح سود کے فیصلوں کے حوالے سے مارکیٹ کو مزید اشارے ملنے کی توقع ہے۔

سی این ای فیڈ واچ ٹول کے مطابق، ٹریڈرز فی الحال 65 فیصد امکان دیکھ رہے ہیں کہ امریکی مرکزی بینک ستمبر میں شرح سود موجودہ سطح پر برقرار رکھے گا، جبکہ 35 فیصد امکان شرح سود میں اضافے کا ہے۔

دریں اثنا رائٹرز کے ایک سروے میں شامل بیشتر ماہرین اقتصادیات کی رائے ہے کہ بینک آف انگلینڈ رواں سال کے اختتام تک شرح سود 3.75 فیصد پر برقرار رکھے گا۔

دیگر قیمتی دھاتوں میں اسپاٹ سلور 0.5 فیصد کمی سے 62.99 ڈالر فی اونس، پلاٹینم 0.3 فیصد اضافے سے 1,717.03 ڈالر جبکہ پیلاڈیم 0.3 فیصد کمی سے 1,286.73 ڈالر فی اونس ہوگیا۔