عالمی منڈی میں غیر یقینی صورتحال، پیٹرولیم قیمتوں میں شفافیت کے لیے اصلاحات کی تجویز

پاکستان میں پیٹرولیم مصنوعات کی قیمتوں کے تعین کے طریقہ کار کا جائزہ لینے کے لیے قائم اعلیٰ سطح کی کمیٹی نے تیل کی عالمی منڈی میں بڑھتی ہوئی غیر یقینی صورتحال کے پیش نظر شفافیت، مارکیٹ کے استحکام اور توانائی کے تحفظ کو بہتر بنانے کے لیے متعدد اصلاحات کی سفارش کی ہے۔

وزیراعظم کی ہدایت پر قائم کمیٹی کا چوتھا اجلاس پیر کو وفاقی وزیر پیٹرولیم علی پرویز ملک کی زیر صدارت منعقد ہوا۔

اجلاس سے خطاب کرتے ہوئے وفاقی وزیر نے کہا کہ آبنائے ہرمز کی دوبارہ بندش کے باعث عالمی توانائی کی منڈیوں میں غیر یقینی صورتحال بڑھ گئی ہے، جس سے کمیٹی کی سفارشات کی اہمیت مزید بڑھ گئی ہے۔

انہوں نے کے پی ایم جی کی ایک رپورٹ کا حوالہ دیتے ہوئے کہا کہ پاکستان میں پیٹرول کی قیمتیں بنگلہ دیش، سری لنکا اور ترکیے کے مقابلے میں کم جبکہ بھارت کے برابر ہیں۔

وفاقی وزیر نے بتایا کہ حکومت نے ریفائنری پالیسی میں ترامیم کی تجویز دی ہے تاکہ ملک میں ڈیزل کی مقامی پیداوار میں اضافہ کیا جا سکے اور درآمدی ڈیزل پر انحصار کم ہو، جس سے توانائی کے تحفظ کو مزید مضبوط بنایا جا سکے گا۔

اجلاس میں پیٹرولیم قیمتوں کے تعین کے نظام میں اصلاحات کے مختلف آپشنز کا جائزہ لیا گیا۔ کمیٹی نے فوری اقدام کے طور پر سفارش کی کہ آئل اینڈ گیس ریگولیٹری اتھارٹی (اوگرا) اپنی ویب سائٹ پر روزانہ پلیٹس بینچ مارک قیمتیں جاری کرے، تاکہ عوام کو ان عالمی قیمتوں تک براہِ راست رسائی حاصل ہو سکے جن کی بنیاد پر پاکستان میں پیٹرولیم مصنوعات کی قیمتوں کا تعین کیا جاتا ہے۔

کمیٹی نے اس بات پر بھی اتفاق کیا کہ حال ہی میں قائم کیے گئے پیٹرولیم پرائس اسٹیبلائزیشن فنڈ کو مکمل طور پر قواعد پر مبنی نظام کے تحت چلایا جائے، جس میں فنڈ میں رقوم جمع کرنے اور ان کے اجراء کا طریقہ کار واضح طور پر متعین ہو تاکہ شفافیت یقینی بنائی جا سکے اور صوابدیدی فیصلوں کی گنجائش نہ رہے۔

اجلاس میں تیل کی سپلائی چین کو ڈیجیٹل بنانے کی ضرورت پر بھی زور دیا گیا تاکہ نظام کی کارکردگی بہتر ہو اور نگرانی کا عمل مزید مؤثر بنایا جا سکے۔

وفاقی وزیر پیٹرولیم نے ہدایت کی کہ کمیٹی کا آئندہ اجلاس اس کا آخری اجلاس ہوگا، جس کے بعد سفارشات وزیراعظم کو منظوری اور غور کے لیے پیش کی جائیں گی۔

اجلاس میں وفاقی وزیر اقتصادی امور احد خان چیمہ، وزیر مملکت برائے خزانہ بلال اظہر کیانی، اوگرا کے چیئرمین نبیل اعوان، کے پی ایم جی، وزارت خزانہ، پاکستان اسٹیٹ آئل (پی ایس او)، وزارت قانون و انصاف، پیٹرولیم ڈویژن اور دیگر متعلقہ اداروں کے نمائندوں نے شرکت کی۔