کشیدگی کم کرنے کیلئے پاکستان اور دیگر ثالثوں سے بات چیت جاری ہے ، ایران

ایران نے پیر کو کہا کہ وہ امریکہ کے ساتھ کشیدگی میں کمی لانے کے لیے قطر، پاکستان اور عمان کی ثالثی میں سفارتی رابطے اور بات چیت جاری رکھے ہوئے ہے۔

ایرانی وزارتِ خارجہ کے ترجمان اسماعیل بقائی نے کہا کہ ثالث ممالک کشیدگی میں مزید اضافے کو روکنے کے لیے اپنی سفارتی کوششیں مسلسل جاری رکھے ہوئے ہیں۔

اس سے قبل ایران کے پاسدارانِ انقلاب نے بحرین اور عمان پر حملوں کا دعویٰ کرتے ہوئے کہا کہ انہوں نے عمان میں ریڈار سسٹمز کو تباہ کردیا اور منامہ کے جنوبی کنارے پر واقع امریکی فوجی تنصیبات کو نشانہ بنایا ہے۔

پاسدارانِ انقلاب کے نیوز آؤٹ لیٹ سپاہ کی جانب سے پیر کو جاری کردہ بیان میں کہا گیا ہے کہ بحرین کے علاقے جفیر میں امریکی فوجی تنصیبات اور انفرااسٹرکچر کو نشانہ بنانے کے علاوہ پاسدارانِ انقلاب کی بحریہ نے سلطنتِ عمان میں طویل فاصلے تک مار کرنے والے ایئر بورن ایف پی ایس (ایف پی ایس) ریڈار اور جہازوں کا پتہ لگانے والے ریڈار کو تباہ کردیا ہے۔

یہ کشیدگی اس عبوری معاہدے کو نقصان پہنچانے والا تازہ ترین واقعہ ہے جو واشنگٹن اور تہران کے درمیان جنگ کے خاتمے کے لیے ہوا تھا جس نے فروری کے اواخر میں شروع ہونے کے بعد سے عالمی معیشت کو شدید جھٹکے دیے ہیں۔