نائب وزیراعظم اسحاق ڈار کل امریکی وزیر خارجہ سے ملاقات کریں گے، علاقائی صورتحال پر اہم گفتگو متوقع
- مذاکرات میں علاقائی امن کے فروغ کے لیے پاکستان کی سفارتی کوششوں پر بھی توجہ مرکوز کیے جانے کا امکان ہے
نائب وزیراعظم اور وزیر خارجہ سینیٹر محمد اسحاق ڈار نیویارک میں اقوامِ متحدہ کی سلامتی کونسل کے اجلاس اور دیگر مصروفیات مکمل کرنے کے بعد امریکی قیادت سے اعلیٰ سطح کی ملاقاتوں کے لیے کل (29 مئی کو) واشنگٹن ڈی سی کا دورہ کریں گے۔
دفترِ خارجہ کے مطابق نائب وزیراعظم اسحاق ڈار امریکی وزیرِ خارجہ اور قومی سلامتی کے مشیر مارکو روبیو سے ملاقات کریں گے، جس میں دوطرفہ تعلقات کا جائزہ اور باہمی دلچسپی کے علاقائی و عالمی امور پر تبادلہ خیال کیا جائے گا۔
ان مذاکرات میں اہم شعبوں میں تعاون بڑھانے اور مذاکرات و سفارت کاری کے ذریعے علاقائی امن و استحکام کے فروغ کے لیے پاکستان کی کوششوں پر بھی توجہ مرکوز کیے جانے کا امکان ہے۔
دفترِ خارجہ کا کہنا ہے کہ یہ دورہ امریکہ کے ساتھ پاکستان کے دیرینہ اور وسیع البنیاد تعلقات کو مزید مضبوط بنانے کے عزم کا عکاس ہے۔ واشنگٹن میں اپنی سرکاری مصروفیات مکمل کرنے کے بعد نائب وزیراعظم اسی روز اسلام آباد کے لیے روانہ ہو جائیں گے۔
واضح رہے کہ اس سے قبل اسحاق ڈار نے منگل کو اقوامِ متحدہ کی سلامتی کونسل کے ایک کھلے مباحثے میں شرکت کی تھی، جس کا عنوان ”بین الاقوامی امن و سلامتی کا قیام: اقوامِ متحدہ کے چارٹر کے مقاصد و اصولوں کی پاسداری اور اقوامِ متحدہ کے مرکزی عالمی نظام کی مضبوطی“ تھا۔ سلامتی کونسل کی گھومتی ہوئی صدارت کے تحت اس اہم مباحثے کا انعقاد چین نے کیا تھا، جس کی صدارت چینی وزیرِ خارجہ وانگ ای نے کی۔
Comments