اسحاق ڈار نے سنگاپور سے 11 پاکستانی اور 20 ایرانی ملاحوں کی وطن واپسی کیلئے مدد مانگ لی

نائب وزیراعظم و وزیر خارجہ سینیٹر اسحاق ڈار نے کہا ہے کہ انہوں نے سنگاپور کے وزیر خارجہ ویوین بالا کرشنن سے ٹیلیفونک گفتگو میں امریکا کی جانب سے ضبط کئے گئے جہازوں پر سوار 11 پاکستانی اور 20 ایرانی ملاحوں کی فلاح و بہبود اور وطن واپسی میں سہولت فراہم کرنے کےلئے سنگاپور کی حمایت کی درخواست کی جو اس وقت سنگاپور کی سمندری حدود کے قریب موجود ہیں۔

نائب وزیراعظم نے کہا کہ ہم سنگاپور کی جانب سے تعاون فراہم کرنے اور حمایت کو سراہتے ہیں۔

سینیٹر محمد اسحاق ڈار نے کہا کہ پاکستان وزارت خارجہ اور متعلقہ اداروں کے ذریعے امریکی حکام اور دیگر فریقین کے ساتھ قریبی رابطے میں ہے تاکہ ہمارے شہریوں کی حفاظت، فلاح و بہبود اور جلد از جلد واپسی کو یقینی بنایا جا سکے۔

یہ پیشرفت پاکستان کی جانب سے امریکی قبضے میں لیے گئے ایرانی جہاز کے عملے کی واپسی میں سہولت فراہم کرنے کے چند دن بعد سامنے آئی ہے جس کے نتیجے میں پیر کو کم از کم 15 ملاح پڑوسی ملک (ایران) پہنچ گئے تھے۔

دفترِ خارجہ کے مطابق عملے کے ارکان کی منتقلی اعتماد سازی کے اقدامات کا حصہ تھی۔

مذکورہ جہاز پر 19 اپریل کو امریکی افواج نے دھاوا بول کر اسے قبضے میں لے لیا تھا۔

نائب وزیراعظم نے کہا کہ انہوں نے ایران کے وزیر خارجہ عباس عراقچی سے بھی بات کی ہے اور اس معاملے پر قریبی رابطہ برقرار ہے۔

انہوں نے کہا کہ پاکستان ایران کے شہریوں کی پاکستان کے راستے ایران تک محفوظ واپسی میں بھی تعاون کےلئے تیار ہے۔