جے ڈی وینس ایران امریکہ مذاکرات کے لیے پاکستان نہیں جا رہے، ٹرمپ

صدر ڈونلڈ ٹرمپ نے واضح کیا ہے کہ نائب صدر جے ڈی وینس ایران کے ساتھ مذاکرات کے لیے پاکستان جانے والے امریکی وفد کی قیادت نہیں کریں گے۔

اے بی سی نیوز کو دیے گئے انٹرویو میں ٹرمپ نے سیکیورٹی خدشات کو اس فیصلے کی وجہ قرار دیتے ہوئے کہا کہ وینس کی جگہ دیگر نمائندے پیر کی شام اسلام آباد پہنچیں گے۔ اس سے قبل اقوام متحدہ میں امریکی مندوب مائیک والٹز اور وزیر توانائی کرس رائٹ نے اشارہ دیا تھا کہ وینس اس دورے کی قیادت کریں گے۔

دوسری جانب مذاکرات کے پیش نظر اسلام آباد اور راولپنڈی میں سیکیورٹی کے انتہائی سخت انتظامات کیے گئے ہیں۔ حکام نے شہر کی اہم شاہراہوں کو بند کرکے ٹریفک کے متبادل منصوبے جاری کر دیے ہیں۔ خاص طور پر میریٹ اور سرینا ہوٹل کے اطراف خاردار تاریں اور رکاوٹیں کھڑی کر کے بھاری نفری تعینات کر دی گئی ہے۔

ٹرمپ نے ٹرتھ سوشل پر سخت لہجہ اختیار کرتے ہوئے تہران کو خبردار کیا کہ اگر منصفانہ ڈیل قبول نہ کی گئی تو امریکہ ایران کے پاور پلانٹس اور پلوں کو نشانہ بنائے گا۔ یہ مذاکرات 11 اپریل کو ہونے والے پہلے دور کی ناکامی کے بعد دوبارہ شروع ہو رہے ہیں۔