امریکی ایف-35 اسٹیلتھ لڑاکا طیارہ ایرانی فائرنگ کا نشانہ بن گیا

مشرق وسطیٰ میں جاری جنگ کے دوران ایک امریکی اسٹیلتھ جنگی طیارہ ایف-35 مبینہ طور پر ایرانی فائرنگ کی زد میں آ گیا اور اسے ہنگامی طور پر خطے میں قائم ایک امریکی فضائی اڈے پر اتارنا پڑا۔ امریکی میڈیا نے جمعرات کو اس واقعے کی اطلاع دی۔

امریکی سینٹرل کمانڈ کے ترجمان کیپٹن ٹِم ہاکنز نے ایک بیان میں کہا کہ طیارہ بحفاظت لینڈ کر گیا اور پائلٹ کی حالت مستحکم ہے۔ تاہم انہوں نے امریکی نشریاتی اداروں اے بی سی نیوز اور سی این این کی جانب سے نشر ہونے والی اس رپورٹ کی باضابطہ تصدیق نہیں کی کہ طیارہ ایرانی فائرنگ سے متاثر ہوا۔

کیپٹن ٹِم ہاکنز نے مزید کہا کہ اس واقعے کی تحقیقات جاری ہیں۔

جنگ کے دوران امریکا کو اس سے قبل بھی متعدد طیاروں کا نقصان اٹھانا پڑا ہے۔ اطلاعات کے مطابق تین ایف-15 لڑاکا طیارے غلطی سے کویتی افواج کی فائرنگ کا نشانہ بن گئے تھے، جبکہ ایک کے سی-135 ری فیولنگ طیارہ عراق میں گر کر تباہ ہو گیا تھا۔ تاہم اب تک کسی امریکی طیارے کے ایرانی فائرنگ سے براہ راست متاثر ہونے کی باضابطہ تصدیق نہیں ہوئی۔

امریکا اور اسرائیل نے خطے میں امریکی فوجی طاقت کے بڑے پیمانے پر اجتماع کے بعد ایران کے خلاف وسیع فضائی مہم شروع کی تھی، جس میں جدید ایف-35 طیارے بھی شامل ہیں۔

28 فروری سے شروع ہونے والی اس کارروائی کے بعد اب تک 13 امریکی فوجی ہلاک ہو چکے ہیں، جن میں 6 فوجی ری فیولنگ طیارے کے حادثے میں جبکہ 7 جنگ کے ابتدائی مرحلے میں ایرانی حملوں میں مارے گئے۔ امریکی فوج کے مطابق مشرق وسطیٰ کے سات ممالک میں تعینات تقریباً 200 امریکی اہلکار زخمی بھی ہوئے ہیں، جن میں سے بیشتر دوبارہ ڈیوٹی پر واپس آ چکے ہیں۔