حکومت نے حامد یعقوب کو سیکرٹری پٹرولیم ڈویژن تعینات کر دیا
- حامد یعقوب شیخ سیکرٹری نیشنل ہیلتھ سروسز ریگولیشنز اینڈ کوآرڈینیشن ڈویژن کے طور پر فرائض انجام دے رہے تھے
وفاقی حکومت نے پاکستان ایڈمنسٹریٹو سروس کے گریڈ 22 کے افسر حامد یعقوب شیخ کو فوری طور پر سیکرٹری پٹرولیم ڈویژن تعینات کر دیا ہے۔
اسٹیبلشمنٹ ڈویژن کی جانب سے جمعرات کو جاری کردہ نوٹیفکیشن کے مطابق حامد یعقوب شیخ جو اس وقت سیکرٹری نیشنل ہیلتھ سروسز ریگولیشنز اینڈ کوآرڈینیشن ڈویژن کے طور پر فرائض انجام دے رہے تھے ان کا تبادلہ کر کے انہیں فوری طور پر اور اگلے احکامات تک سیکرٹری پٹرولیم ڈویژن مقرر کر دیا گیا ہے۔
انتظامیہ میں یہ تبدیلی ایک ایسے وقت میں آئی ہے جب پاکستان کا توانائی کا شعبہ سنگین چیلنجز کا شکار ہے، جن میں سپلائی کی کمی اور مشرق وسطیٰ میں جاری کشیدگی کی وجہ سے عالمی سطح پر تیل کی بڑھتی ہوئی قیمتیں شامل ہیں۔ پٹرولیم ڈویژن ملک کے تیل و گیس کے شعبے، توانائی کی درآمدات اور پٹرولیم وسائل سے متعلق پالیسی سازی میں کلیدی کردار ادا کرتا ہے۔
بدھ کے روز وفاقی وزیر برائے پٹرولیم علی پرویز ملک نے سعودی عرب کے سفیر نواف بن سعید المالکی سے ملاقات کے بعد بتایا کہ سعودی حکام نے پاکستان کی توانائی کی ضروریات پوری کرنے کے لیے بحیرہ احمر پر واقع ینبع بندرگاہ کے ذریعے تیل کی محفوظ فراہمی کی یقین دہانی کرائی ہے۔
انہوں نے بتایا کہ پاکستان سے ایک بحری جہاز کو خام تیل لانے کے لیے ینبع بندرگاہ بھیجنے کی یقین دہانی کرائی گئی ہے اور مزید امید ظاہر کی کہ ینبع بندرگاہ سے تیل کی فراہمی میں پاکستان کو ترجیح دی جائے گی۔
Comments