وزیراعظم کے دورہ واشنگٹن سے قبل اسحاق ڈار کی اعلیٰ امریکی سفارت کار سے ملاقات

نائب وزیراعظم اور وزیر خارجہ سینیٹر اسحاق ڈار نے اسلام آباد میں اعلیٰ امریکی سفارت کار کے ساتھ اہم مذاکرات کیے، یہ ملاقات وزیراعظم شہباز شریف کے دورہ واشنگٹن سے قبل ہوئی ہے جہاں وہ 15 فروری کو شیڈول بورڈ آف پیس کے پہلے افتتاحی سیشن میں شرکت کریں گے۔

ذرائع کا کہنا ہے کہ بورڈ آف پیس ے افتتاحی اجلاس میں شرکت کے علاوہ، پاکستانی وفد کی جانب سے تجارت اور سرمایہ کاری سمیت متعدد بین الاقوامی اور دوطرفہ امور پر اعلیٰ سطح کے مذاکرات کیے جانے کا بھی امکان ہے۔

دفترِ خارجہ کی جانب سےجاری اعلامیے کے مطابق اسحاق ڈار سے امریکہ کی ناظم الامورنیٹلی بیکر سے ملاقات کی۔

دفتر خارجہ کے مطابق ملاقات کے دوران دو طرفہ تعلقات اور خطے سمیت عالمی سطح پر امن و سلامتی کےلئے مشترکہ کوششوں کے فروغ سے متعلق تعاون پر تبادلہ خیال کیا گیا۔

دو طرفہ تعلقات میں مثبت پیش رفت کا خیرمقدم کرتے ہوئے نائب وزیراعظم نے باہمی دلچسپی کے متنوع شعبوں میں تعاون کو مزید مضبوط بنانے کےلئے اعلیٰ سطحی روابط کی اہمیت پر زور دیا۔

ذرائع کے مطابق وزارتِ خارجہ نے بورڈ آف پیس کے اجلاس کے موقع پر دونوں فریقین کے درمیان متوقع مذاکرات کے لیے وزارتِ تجارت اور وزارتِ خزانہ سمیت تمام متعلقہ وزارتوں سے ’ٹاکنگ پوائنٹس‘ (اہم نکات) اور بریفنگ مواد پہلے ہی طلب کر لیا ہے۔

کاپی رائٹ بزنس ریکارڈر 2026