حبیب میٹروپولیٹن بینک کا ذیلی اداروں کے سرمائے میں اضافے کا فیصلہ

حبیب میٹروپولیٹن بینک لمیٹڈ نے اپنے مکمل ملکیتی ذیلی اداروں حبیب میٹرو ایکسچینج سروسز لمیٹڈ اور حبیب میٹروپولیٹن فنانشل سروسز لمیٹڈ کے سرمائے میں اضافے کی منظوری دے دی ہے تاکہ ان کے آپریشنز کی ہموار ترسیل کو یقینی بنایا جاسکے۔

اسٹاک ایکسچینج کو جاری کیے گئے نوٹس کے مطابق حبیب میٹرو ایکسچینج سروسز کا سرمایہ ایک ارب روپے سے بڑھا کر 1.5 ارب روپے کیا جارہا ہے۔

یہ فیصلہ بورڈ آف ڈائریکٹرز کے اجلاس میں لیا گیا جو 12 فروری کو منعقد ہوا تھا۔

اجلاس میں بینک کے مکمل ملکیتی ذیلی ادارے حبیب میٹروپولیٹن فنانشل سروسز لمیٹڈ کے مجاز اور ادا شدہ سرمائے میں اضافے کی بھی منظوری دی گئی جسے موجودہ 300 ملین روپے سے بڑھا کر 500 ملین روپے کردیا گیا ہے۔

حبیب میٹروپولیٹن بینک 1992 میں پاکستان میں ایک پبلک لمیٹڈ کمپنی کے طور پر قائم کیا گیا تھا۔ یہ بینک سوئٹزرلینڈ کی حبیب بینک اے جی زیورخ کی ذیلی کمپنی ہے جو بینک کی ہولڈنگ کمپنی ہے۔