وزیر خزانہ کی سنگاپور میں پاکستان کو سرمایہ کاری مرکز بنانے کی دعوت
- محمد اورنگزیب کی پاکستانی تارکین وطن اور کاروباری برادری کے ارکان سے ملاقات
وفاقی وزیر خزانہ محمد اورنگزیب نے سنگاپور میں مقیم پاکستانی تاجروں پر زور دیا ہے کہ وہ پاکستان کو سرمایہ کاری کے لیے ایک پُرکشش مقام کے طور پر متعارف کرانے اور غیر ملکی سرمایہ کاروں کو راغب کرنے میں اپنا کردار ادا کریں۔ انہوں نے مختلف شعبوں میں سرمایہ کاری کے مواقع اور حکومت کے نجکاری پروگرام کو بھی اجاگر کیا۔
یہ پیش رفت بدھ کی شام سنگاپور میں پاکستانی ہائی کمشنر رابعہ شفیق کی جانب سے پاکستان ہاؤس میں دیے گئے عشائیے کے موقع پر سامنے آئی، جہاں وزیر خزانہ نے پاکستانی تارکین وطن اور کاروباری برادری کے ارکان سے ملاقات کی۔ ایک بیان کے مطابق، اس موقع پر مختلف امور پر تبادلہ خیال کیا گیا۔
ملاقات کے دوران وزیر خزانہ نے شرکا کو پاکستان میں بہتر ہوتے معاشی استحکام کی صورتحال اور معیشت کو مضبوط بنانے اور مالیاتی خسارہ کم کرنے کے لیے حکومت کی جانب سے کیے جانے والے اقدامات سے آگاہ کیا۔ انہوں نے مالیاتی نظم و ضبط برقرار رکھنے، معاشی اصلاحات متعارف کرانے اور سرمایہ کاری کے لیے سازگار ماحول پیدا کرنے کے حکومتی عزم کو بھی اجاگر کیا۔
سنگاپور میں اپنے قیام کے دنوں کا ذکر کرتے ہوئے محمد اورنگزیب نے پاکستانی تارکین وطن کو ملک کا ایک قیمتی اثاثہ اور پاکستان کی معاشی ترقی میں اہم شراکت دار قرار دیا۔ انہوں نے بیرون ملک مقیم پاکستانیوں، بالخصوص کاروباری برادری کے ارکان پر زور دیا کہ وہ پاکستان کو سرمایہ کاری کے لیے ایک پُرکشش مقام کے طور پر متعارف کرائیں اور پاکستان اور سنگاپور کے سرمایہ کاروں کے درمیان روابط اور تعاون کو فروغ دینے میں فعال کردار ادا کریں۔
وزیر خزانہ نے شرکا کو پاکستان کے مختلف شعبوں میں دستیاب سرمایہ کاری کے مواقع سے بھی آگاہ کیا۔ انہوں نے حکومت کے نجکاری پروگرام کو اجاگر کرتے ہوئے کہا کہ سرکاری ملکیتی اداروں (ایس او ایز) کی نجکاری سے قومی خزانے پر مالی بوجھ کم کرنے، حکومتی اخراجات محدود رکھنے اور معاشی کارکردگی بہتر بنانے میں مدد ملے گی۔
پاکستانی کاروباری برادری کے ارکان نے پاکستان کو سرمایہ کاری کے لیے زیادہ پُرکشش بنانے اور غیر ملکی سرمایہ کاروں کو راغب کرنے کے حوالے سے اپنی آرا پیش کیں۔ انہوں نے کاروباری اداروں کے درمیان روابط اور تعاون بڑھانے کے مواقع پر بھی تبادلہ خیال کیا اور سرمایہ کاری کے فروغ اور معاشی تعاون کو وسعت دینے کے لیے تجاویز پیش کیں۔
























Comments