کابینہ کمیٹی نے ایگزم بینک آف پاکستان کی پروکیورمنٹ پالیسی کی منظوری دیدی

کابینہ کمیٹی برائے اسٹیٹ اونڈ انٹرپرائزز (سی سی او ایس او ایز) نے ایکسپورٹ امپورٹ (ایگزم) بینک آف پاکستان کی پروکیورمنٹ پالیسی 2025 کی منظوری دے دی، جس کا مقصد ایگزم بینک کی خریداری کے عمل کو مؤثر اور منظم بنانا ہے۔ یہ پالیسی اسٹیٹ اونڈ انٹرپرائزز ایکٹ 2023 سے ہم آہنگ ہے۔

وفاقی وزیر خزانہ و محصولات محمد اورنگزیب نے منگل کو کابینہ کمیٹی کے اجلاس کی صدارت کی۔ اجلاس میں پاکستان ٹورازم ڈیولپمنٹ کارپوریشن (پی ٹی ڈی سی) کے بنیادی کردار کو برقرار رکھنے کی بھی منظوری دی گئی، جسے ایک مختصر اور مؤثر ساخت کے حامل سینٹر آف ایکسیلنس کی صورت میں جاری رکھا جائے گا تاکہ برانڈ پاکستان کو فروغ دیا جا سکے۔

اجلاس میں وفاقی وزیر برائے بحری امور محمد جنید انور چوہدری نے ورچوئلی شرکت کی، جبکہ متعلقہ وزارتوں، ڈویژنز اور ریگولیٹری اداروں کے سیکریٹریز اور سینئر حکام بھی شریک ہوئے۔

کابینہ کمیٹی نے ایگزم بینک آف پاکستان کی پروکیورمنٹ پالیسی 2025 کا جائزہ لے کر منظوری دی، جو بینک کی خریداری کے نظام کو بہتر بنانے کے لیے تیار کی گئی ہے۔ یہ پالیسی اسٹیٹ اونڈ انٹرپرائزز ایکٹ 2023 کے مطابق ہے اور اس میں چارٹرڈ انسٹی ٹیوٹ آف پروکیورمنٹ اینڈ سپلائی (سی آئی پی ایس) کے عالمی معیارات اور پبلک پروکیورمنٹ ریگولیٹری اتھارٹی (پی پی آر اے) کے ضوابط کی پاسداری بھی یقینی بنائی گئی ہے۔

اس کے علاوہ، کمیٹی نے وزارت تجارت کی جانب سے پیش کردہ ایجنڈا آئٹمز کا بھی جائزہ لے کر منظوری دی۔ ان میں نیشنل انشورنس کمپنی لمیٹڈ (این آئی سی ایل) کے بورڈ میں ایک آزاد ڈائریکٹر کی خالی اسامی کو پر کرنے اور چیئرمین بورڈ کی تقرری، اسٹیٹ لائف انشورنس کارپوریشن (اس لِک) کے بورڈ میں ایک آزاد ڈائریکٹر کی خالی اسامی کو پُر کرنا، اور ٹریڈنگ کارپوریشن آف پاکستان (ٹی سی پی) کے بورڈ میں دو خالی آسامیوں میں سے ایک پر آزاد ڈائریکٹر کی تقرری شامل تھی۔

کمیٹی نے وزارت بین الصوبائی رابطہ کی جانب سے پاکستان ٹورازم ڈیولپمنٹ کارپوریشن (پی ٹی ڈی سی) سے متعلق پیش کیے گئے بزنس پلان کا بھی جائزہ لیا اور منظوری دی کہ پی ٹی ڈی سی کے بنیادی کردار کو ایک مختصر مگر مؤثر سینٹر آف ایکسیلنس کی شکل میں برقرار رکھا جائے۔ یہ ادارہ برانڈ پاکستان کے فروغ، دنیا کے سامنے پاکستان کے مثبت تشخص کو اجاگر کرنے، بین الحکومتی رابطہ کاری، پالیسی سپورٹ، اور سیاحت کے فروغ کے لیے مارکیٹنگ اور برانڈ ڈیولپمنٹ میں کردار ادا کرے گا۔ اس مقصد کے لیے عملے کی تعداد کو معقول بنایا جائے گا اور بورڈ آف ڈائریکٹرز کی تشکیل نو بھی گورننس تقاضوں کے مطابق کی جائے گی۔

کابینہ کمیٹی نے وزارت کو ہدایت کی کہ وہ مجوزہ ادارے کی فنڈنگ اور پی ٹی ڈی سی کے پاس پہلے سے موجود اثاثوں کے انتظام سے متعلق لا ڈویژن کے ساتھ مل کر ایک علیحدہ تجویز بھی پیش کرے۔

کاپی رائٹ بزنس ریکارڈر، 2026