او جی ڈی سی ایل کو اوچ پاور لمیٹڈ سے 8.3 ارب روپے موصول

آئل اینڈ گیس ڈیولپمنٹ کمپنی (اوجی ڈی سی ایل) نے جمعرات کو اعلان کیا ہے کہ اسے اوچ پاور (پرائیویٹ) لمیٹڈ کی جانب سے 8.3 ارب روپے موصول ہو گئے ہیں۔

اسٹاک ایکسچینج کو دیے گئے نوٹس کے مطابق یہ ادائیگی واجب الادا وصولیوں کے عوض گردشی قرضے کے تصفیے کے طور پر کی گئی ہے۔ نوٹس میں مزید کہا گیا کہ او جی ڈی سی ایل کو اوچ پاور سے مزید 8.3 ارب روپے کی رقم موصول ہوئی ہے، جو توانائی کے شعبے میں گردشی قرضوں کے مسئلے کو حل کرنے کے لیے حکومتِ پاکستان کے جاری اقدامات کی عکاسی کرتی ہے۔

واضح رہے کہ گزشتہ ماہ بھی او جی ڈی سی ایل کو اوچ پاور سے 4.18 ارب روپے موصول ہوئے تھے۔

اس سے قبل ذرائع نے بزنس ریکارڈر کو بتایا تھا کہ سینٹرل پاور پرچیزنگ ایجنسی-گارنٹیڈ (سی پی پی اے- جی ) اوچ پاور لمیٹڈ اور اوچ پاور-II کی جانب سے او جی ڈی سی ایل کو گردشی قرضہ فنانسنگ سہولت کے تحت 89.5 ارب روپے ادا کرے گی۔ یہ ادائیگی 18 مساوی ماہانہ اقساط کے بجائے یکمشت انتظام کے تحت کی جائے گی۔

ذرائع کے مطابق یہ ادائیگی اس منصوبے کا حصہ ہے جس کی منظوری اقتصادی رابطہ کمیٹی (ای سی سی) نے پاور ڈویژن کی اس سمری پر دی تھی جس کا عنوان نیوکلیئر پاور پلانٹس (چشمہ-1، 2، 3، 4 اور کراچی کے-2، کے-3) کے ایل پی آئی (ایل پی آئی) کی ریشنلائزیشن اور ممکنہ کمی تھا۔

یہ فیصلہ وزیراعظم شہباز شریف کی جانب سے 4 اگست 2024 کو قائم کردہ اس ٹاسک فورس کی سفارشات پر کیا گیا ہے جسے پاور سیکٹر میں ڈھانچہ جاتی اصلاحات (اسٹریکچرریفارمز) کے نفاذ کی ذمہ داری دی گئی ہے۔ مذکورہ فورس توانائی کے شعبے میں ضروری اصلاحات کی نشاندہی اور ان پر عملدرآمد کی نگرانی کر رہی ہے۔