افغانستان، ایران اور روس، ای سی سی نے بارٹر ٹریڈ قواعد میں ترمیم کے مسودہ کی منظوری دیدی

کابینہ کی اقتصادی رابطہ کمیٹی (ای سی سی) نے جمعرات کو بزنس ٹو بزنس (بی ٹو بی) بارٹر ٹریڈ میکانزم میں ترمیم کے لیے ایک مسودہ ایس آر او کی منظوری دی، جو افغانستان، ایران اور روس کے ساتھ دوطرفہ تجارت کے ضابطوں سے متعلق ہے۔

وزیر خزانہ و ریونیو محمد اورنگزیب کی زیر صدارت ای سی سی کا اجلاس ہوا جس میں وزارتِ تجارت کی جانب سے پیش کردہ مسودہ ایس آر او پر غور کیا گیا اور منظوری دی گئی۔ یہ ایس آر او افغانستان، ایران اور روس کے ساتھ دوطرفہ بارٹر ٹریڈ میکانزم میں ترمیم کے لیے بنایا گیا ہے۔

ای سی سی نے وزارت دفاع و انسداد منشیات کی جانب سے روزویلٹ ہوٹل نیویارک کے لیے تکنیکی ضمنی گرانٹ (ٹی ایس جی) کی فراہمی کے بارے میں پیش کی گئی سمری پر غور کیا۔ یہ تجویز ہوٹل کے لیز معاہدے کی نیویارک سٹی کے ساتھ تنسیخ کے بعد مالی معاونت کے لیے پیش کی گئی تھی۔ کمیٹی نے ہوٹل کی فوری مالی ضروریات کو پورا کرنے کی حمایت کی اور وزارت کو ہدایت دی کہ وہ اپنے تخمینوں کا دوبارہ جائزہ لے کر معاملہ دوبارہ ای سی سی کے سامنے پیش کرے۔

کمیٹی نے وزارت دفاع کی ایک اور سمری پر بھی غور کیا، جس میں اسلام آباد میں ڈیفنس کمپلیکس کی تعمیر کے لیے حاصل کی گئی زمین کے متاثرہ رہائشیوں کو نقد معاوضے کی ادائیگی کے لیے فنڈز فراہم کرنے کی تجویز دی گئی تھی۔ ای سی سی نے 4 ارب روپے کے تکنیکی ضمنی گرانٹ کی منظوری دی جو وزارت خزانہ فراہم کرے گی، جبکہ باقی رقم کی فراہمی کیپٹل ڈویلپمنٹ اتھارٹی (سی ڈی اے) کرے گی۔

ای سی سی نے وزارت داخلہ و انسداد منشیات کی جانب سے امن و امان کی صورتحال کے لیے 20 ارب روپے مختص کرنے کی تجویز پر بھی غور کیا۔ کمیٹی نے اس تجویز کی منظوری دے دی اور فیصلہ کیا کہ یہ فنڈز ضرورت پڑنے پر اور مرحلہ وار وزارت خزانہ کی جانب سے وزارت داخلہ کے ساتھ مشاورت کے بعد جاری کیے جائیں گے۔ اس کے علاوہ ای سی سی نے وزارت داخلہ کے لیے مزید 174.8 ملین روپے کی تکنیکی ضمنی گرانٹ کی منظوری دی، جو فرنٹیئر کور ہیڈکوارٹرز خیبر پختونخوا (شمالی) پشاور کے قانون نافذ کرنے والے اقدامات پر خرچ ہوں گے۔

اجلاس میں وفاقی وزیر برائے پٹرولیم علی پرویز ملک، وفاقی وزیر برائے تجارت جام کمال خان، وفاقی وزیر سرمایہ کاری قیصر احمد شیخ، وزیراعظم کے مشیر برائے نجکاری و چیئرمین نجکاری کمیشن محمد علی، وفاقی سیکریٹریز اور متعلقہ وزارتوں و ریگولیٹری اداروں کے سینئر حکام شریک ہوئے۔

کاپی رائٹ بزنس ریکارڈر، 2025