حوثیوں کے حملوں کے بعد عالمی منڈی میں خام تیل مہنگا ہوگیا

عالمی منڈی میں جمعرات کو خام تیل کی قیمتوں میں اضافہ ریکارڈ کیا گیا، جس کی وجہ سعودی عرب میں حوثیوں کے مزید حملوں کے بعد امریکا کی جانب سے مملکت میں تعینات بعض سفارت کاروں اور ان کے اہل خانہ کو واپس بلانے کا فیصلہ ہے۔

خبر رساں ادارے رائٹرز کے مطابق پاکستانی وقت کے مطابق صبح 5 بج کر 34 منٹ پر برینٹ خام تیل کے مستقبل کے سودے 1.29 ڈالر یا 1.2 فیصد اضافے سے 110.11 ڈالر فی بیرل ہوگئے، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) کی قیمت 97 سینٹ یا ایک فیصد بڑھ کر 98.12 ڈالر فی بیرل ہوگئی۔ بدھ کو برینٹ کی قیمت تقریباً مستحکم رہی تھی، جبکہ ڈبلیو ٹی آئی 67 سینٹ سستا ہوا تھا۔

امریکی حکام کے مطابق محکمہ خارجہ خطے میں متعدد دیگر امریکی سفارتی مشنز سے بھی اہل خانہ کو واپس بلانے کا منصوبہ بنا رہا ہے۔

حوثیوں نے بدھ کو متعدد اہداف کو نشانہ بنایا۔ دمام کے ایک شہری ہوائی اڈے پر حملے میں کم از کم ایک شخص ہلاک اور آٹھ زخمی ہوئے، جبکہ سعودی عرب کے ایک آئل فیلڈ پر ڈرون حملے میں دو افراد ہلاک ہوگئے۔

دوسری جانب ایرانی میڈیا کے مطابق جنوبی ایران کے علاقے سیریک میں بھی دھماکوں کی آوازیں سنی گئیں، تاہم ان کی نوعیت اور وجہ معلوم نہیں ہوسکی۔

ایران کے وزیر خارجہ عباس عراقچی نے کہا کہ ایران اپنے دفاع کے لیے مکمل طور پر تیار ہے، جبکہ صدر مسعود پزشکیان نے کہا کہ ناکہ بندی اور دھمکیوں کے ماحول میں امریکا ایران سے مذاکرات کی توقع نہیں کرسکتا۔

اعداد و شمار فراہم کرنے والے ادارے کیلپر کے مطابق گزشتہ دو ہفتوں میں بحری جہازوں پر کم از کم 18 حملے ہوئے۔ ایل ایس ای جی کے تجزیہ کاروں نے خبردار کیا کہ ایران آبنائے ہرمز سے آگے خلیج عمان میں بھی ٹینکروں کو نشانہ بنا رہا ہے، جس سے خطے میں خام تیل کی ترسیل متاثر ہونے کا خدشہ ہے۔

ادھر امریکی ادارہ برائے توانائی اطلاعات کے مطابق گزشتہ ہفتے امریکا کے خام تیل کے ذخائر 30 لاکھ 60 ہزار بیرل کم ہوکر 41 کروڑ 25 لاکھ بیرل رہ گئے، جبکہ ڈیزل اور ہیٹنگ آئل سمیت کشید شدہ ایندھن کے ذخائر 16 لاکھ 80 ہزار بیرل بڑھ گئے۔ امریکی حکومت نے ڈیزل کی قلت کے باعث بڑھتی قیمتوں پر قابو پانے کے لیے ہنگامی ہیٹنگ آئل ذخائر کے تقریباً ایک تہائی حصے تک قرض کی صورت میں رسائی دینے کی پیشکش بھی کی ہے۔