پہلی سہ ماہی میں غیر ملکی اقتصادی معاونت میں تین گنا اضافہ

پاکستان کو رواں مالی سال کی پہلی سہ ماہی (جولائی تا ستمبر) کے دوران غیر ملکی اقتصادی معاونت کی مد میں مجموعی طور پر 5.445 ارب امریکی ڈالر موصول ہوئے جو مالی سال 2025-26 کی اسی مدت میں موصول ہونے والے 1.815 ارب ڈالر کے مقابلے میں تین گنا زیادہ ہیں۔

اقتصادی امور ڈویژن (ای اے ڈی) کی جانب سے جاری کردہ اعدادوشمار کے مطابق جاری مالی سال کی پہلی سہ ماہی کے دوران حکومت کی بیرونِ ملک سے حاصل کردہ قرضوں کی رقم بڑھ کر 3.63 ارب امریکی ڈالر ہو گئی جبکہ گزشتہ مالی سال کی اسی مدت میں یہ رقم 1.81 ارب ڈالر تھی۔ یہ اضافہ غیر ملکی مالی معاونت پر بڑھتے ہوئے انحصار کو نمایاں کرتا ہے۔

ستمبر 2026 میں ملٹی لیٹرل، بائی لیٹرل قرضے اور گرانٹس 952.26 ملین امریکی ڈالر رہیں جبکہ اس سے پچھلے مہینے یہ رقم 626.19 ملین امریکی ڈالر تھی۔ ستمبر میں پاکستان کو چین سے صرف 0.03 ملین ڈالر موصول ہوئے جبکہ پچھلے مہینے چین نے کوئی گرانٹ فراہم نہیں کی تھی، تاہم جولائی میں چین نے 146.62 ملین امریکی ڈالر کا قرض فراہم کیا تھا۔

اقتصادی امور ڈویژن (ای اے ڈی) کے مطابق مجموعی رقم میں سے 4.2 ارب ڈالر بجٹ سپورٹ کے لیے موصول ہوئے جبکہ 111.63 ملین امریکی ڈالر پروگرام قرض اور238.44 ملین ڈالر قلیل مدتی اسلامی ترقیاتی بینک (آئی ایس ڈی بی) کے قرض کی مد میں فراہم کیے گئے۔ مجموعی طور پر موصول ہونے والی 5.445 ارب امریکی ڈالر کی غیر ملکی اقتصادی معاونت میں سے 4.541 ڈالر نان پروٹیکٹ لان جبکہ 907.71 ملین ڈالر منصوبہ جاتی قرضوں کی مد میں حاصل ہوئے۔

اعداد و شمار کے مطابق جولائی تا ستمبر 2026 ملک کو دوطرفہ (بائی لیٹرل) قرضوں اور گرانٹس کی مد میں کل 58.10 ملین امریکی ڈالر موصول ہوئے جن میں سے 14.69 ملین ڈالر جرمنی، 20 ملین ڈالر فرانس، 12.87 ملین ڈالر سعودی عرب، 5.02 ملین ڈالر کوریا، 3.15 ملین ڈالر ڈنمارک، 2.26 ملین ڈالر جاپان اور 0.08 ملین ڈالر امریکہ سے حاصل ہوئے۔