قلات کے قریب سکیورٹی فورسز کی کارروائی، 5 دہشت گرد ہلاک، 23 مغوی بازیاب

انٹر سروسز پبلک ریلیشنز (آئی ایس پی آر) نے اتوار کو بتایا ہے کہ بلوچستان میں قلات کے قریب سکیورٹی فورسز نے کارروائی کرتے ہوئے 5 دہشت گردوں کو ہلاک کردیا جبکہ 23 مغوی افراد کو بحفاظت بازیاب کرالیا۔

آئی ایس پی آر کے مطابق فتنہ الہندوستان سے تعلق رکھنے والے دہشت گردوں نے 18 اور 19 ستمبر کی درمیانی شب پاکستان ہائی وے (چمن، کراچی، این-25) پر لوگوں کی آمدورفت میں خلل ڈالنے کی کوشش کی۔ دہشت گردوں نے اغوا برائے تاوان، بھتہ خوری اور گاڑیاں چھیننے کیلئے ایک چیک پوسٹ قائم کی تھی۔

سکیورٹی فورسز نے فوری کارروائی کی اور شدید فائرنگ کے تبادلے کے بعد 5 دہشت گردوں کو ہلاک کردیا۔

فوج کے شعبہ تعلقات عامہ کے مطابق فورسز نے دہشت گردوں کے ٹھکانے سے 23 مغوی افراد کو بھی بحفاظت بازیاب کرالیا۔ کارروائی کے دوران 6 ٹرک، 3 بسیں اور 2 کاریں بھی برآمد کی گئیں۔

آئی ایس پی آر کے مطابق کارروائی کے دوران بڑی مقدار میں اسلحہ، گولہ بارود اور دھماکا خیز مواد بھی برآمد کیا گیا۔

وزیراعظم شہباز شریف نے کامیاب کارروائی پر سکیورٹی فورسز کو خراج تحسین پیش کرتے ہوئے کہا کہ فورسز نے قومی شاہراہ پر پُرامن آمدورفت میں خلل ڈالنے اور اغوا برائے تاوان، بھتہ خوری اور گاڑیاں چھیننے کی دہشت گردوں کی کوشش ناکام بنادی۔

صدر مملکت آصف علی زرداری نے بھی دہشت گردوں کو ہلاک کرنے، مغویوں کو بازیاب کرانے اور گاڑیاں برآمد کرنے پر سکیورٹی فورسز کو سراہا۔

وزیراعظم نے کہا کہ دہشت گردی کے خلاف آپریشن عزمِ استحکام جاری رہے گا اور حکومت بیرون ملک سے حمایت اور سرپرستی حاصل کرنے والی دہشت گردی کے خاتمے کیلئے پرعزم ہے۔

آئی ایس پی آر کے مطابق علاقے میں باقی ماندہ دہشت گردوں کے خاتمے اور مقامی آبادی اور قومی شاہراہوں کی سلامتی یقینی بنانے کیلئے کلیئرنس آپریشن جاری ہے۔