قطر کے وزیراعظم کا تہران کا دورہ، ایران اور امریکا کے درمیان سفارت کاری بحال کرنے کی کوشش

قطر کے وزیراعظم شیخ محمد بن عبدالرحمٰن الثانی جمعرات کو تہران کا دورہ کریں گے، جس کا مقصد ایران اور امریکا کے درمیان سفارتی رابطوں کو دوبارہ بحال کرنے کی کوشش کرنا ہے۔ یہ دورہ ایسے وقت میں ہو رہا ہے جب واشنگٹن نے ایران پر اقتصادی دباؤ بڑھانے اور اس کے تجارتی شراکت داروں پر پابندیاں عائد کرنے کا عندیہ دیا ہے۔

ایران کے خلیجی ہمسایہ اور امریکا کے اتحادی قطر نے دونوں فریقوں کے درمیان پس پردہ مذاکرات میں اہم کردار ادا کیا ہے۔ قطر نے جون میں ہونے والی عارضی جنگ بندی کے حصول میں بھی براہِ راست کردار ادا کیا تھا، تاہم جنگ کو تقریباً چھ ماہ مکمل ہونے کے باوجود سفارتی سطح پر کوئی بڑی پیش رفت نہیں ہوسکی۔

دونوں فریقوں کے درمیان اہم اختلاف آبنائے ہرمز کے کنٹرول پر برقرار ہے، جو عالمی تیل کی ترسیل کا اہم راستہ ہے۔ جنگ سے قبل اس آبنائے سے روزانہ تقریباً 20 ملین بیرل خام تیل گزرتا تھا، تاہم تازہ شپ ٹریکنگ ڈیٹا کے مطابق پیر کو یہ مقدار کم ہوکر صرف 5 ملین بیرل یومیہ رہ گئی۔

ایرانی پاسداران انقلاب نے بدھ کو دعویٰ کیا کہ ایران اور عمان آبنائے ہرمز اور اس سے حاصل ہونے والی آمدنی کی تقسیم پر اتفاق کرچکے ہیں، تاہم ایک سینئر ایرانی عہدیدار نے بعد میں کہا کہ معاہدے کی تفصیلات پر بات چیت ابھی جاری ہے۔

قطری وزارت خارجہ کے مطابق وزیراعظم تہران میں آبنائے ہرمز میں آزادانہ آمدورفت، کشیدگی کم کرنے اور مذاکرات کے لیے سازگار ماحول پیدا کرنے سمیت علاقائی معاملات پر گفتگو کریں گے۔

اقوام متحدہ کی عالمی میری ٹائم تنظیم کے مطابق 28 فروری سے آبنائے ہرمز میں 70 واقعات پیش آچکے ہیں، جن میں 19 بحری کارکن ہلاک ہوئے ہیں۔